ശ്രീനഗര്: കശ്മീരില് സിആര്പിഎഫിന്റെയും പോലീസിന്റെയും സംയുക്ത പട്രോളിംഗിനു നേരെ തീവ്രവാദികളുടെ ബോംബാക്രമണം. കഴിഞ്ഞ ദിവസം ശ്രീനഗറിലെ കരണ് നഗര് പ്രദേശത്താണ് സംഭവമുണ്ടായത്. ആക്രമണത്തില് ആറ് സിആര്പിഎഫ് ഉദ്യോഗസ്ഥര്ക്ക് പരിക്കേറ്റിട്ടുണ്ട്. 144 ാം ബറ്റാലിയനില് ജവാന്മാര്ക്കാണ് പരിക്കേറ്റത്. ഇവരെ അടുത്തുള്ള ആശുപത്രിയില് പ്രവേശിപ്പിച്ചു. ആക്രമണം പ്രതിരോധിക്കാന് ശ്രമിച്ച സുരക്ഷാ സേനയ്ക്കും നേരെയും ഭീകരര് വെടിയുതിര്ത്തു.
ചെക്ക് പോയിന്റില് ഡ്യൂട്ടിയിലായിരുന്ന സിആര്പിഎഫ് ജവാന്മാര്ക്കു നേരെ ഭീകരര് ഗ്രനേഡുകള് എറിയുകയായിരുന്നു. സുരക്ഷാ സേനയെ ആക്രമിച്ച ശേഷം ഓടി രക്ഷപ്പെടാന് ശ്രമിച്ച ഭീകരര്ക്ക് നേരെ സുരക്ഷാ ഉദ്യോഗസ്ഥര് വെടിയുതിര്ത്തെങ്ങിലും ഫലമുണ്ടായില്ല. ആക്രമണത്തെ തുടര്ന്ന് പ്രദേശത്ത് കനത്ത സുരക്ഷയാണ് ഏര്പ്പെടുത്തിരിക്കുന്നത്. അജ്ഞാത സംഘത്തിനായുള്ള തിരച്ചിലും ആരംഭിച്ചിട്ടുണ്ട്. സംസ്ഥാനത്ത് രണ്ടാഴ്ച്ചക്കുള്ളില് നടക്കുന്ന നാലാമത്തെ ആക്രമണമാണിത്.
