ന്യൂദല്ഹി : ലോകത്തിലെ ഏറ്റവും ഉയരമുള്ള പ്രതിമയായ സ്റ്റാച്യു ഓഫ് യൂണിറ്റി ഒന്നാം വാര്ഷികത്തിന്റെ നിറവില്. ഗുജറാത്ത് സംസ്ഥാനത്തിനും ഇന്ത്യയ്ക്കും അഭിമാനമായി നിലകൊള്ളുന്ന ഈ പ്രതിമ പ്രവര്ത്തനം ആരംഭിച്ച് ഒരു വര്ഷത്തോട് അടുക്കുമ്പോള് ചുരുങ്ങിയ കാലയളവില് 26 ലക്ഷം പേരാണ് സന്ദര്ശനം നടത്തിയത്.
പട്ടേലിന്റെ 143ാമത് ജന്മവാര്ഷികത്തോടനുബന്ധിച്ച് കഴിഞ്ഞ വര്ഷം ഒക്ടോബര് 31ന് പ്രധാനമന്ത്രി നരേന്ദ്രമോദിയാണ് സര്ദാര് വല്ലഭായി പട്ടേലിന്റെ സ്റ്റാച്യൂ ഓഫ് യൂണിറ്റി ഉദ്ഘാടനം ചെയ്തത്. പ്രവര്ത്തനം ആരംഭിച്ച് ഇതുവരെ 57 കോടി രൂപയാണ് ഇവിടെ നിന്ന് സര്ക്കാരിന് വരുമാനം ലഭിച്ചിരിക്കുന്നത്. 2018 നവംബര് ഒന്നു മുതല് 2019 സെപ്തംബര് 12 വരെയുള്ള കാലയളവിലാണ് ഇത്രയും ടിക്കറ്റ് വില്പ്പന ഉണ്ടായിരിക്കുന്നത്. ഇതില് 12.35 ലക്ഷം പേര് എന്ആര്ഐകളാണ്.
ഗുജറാത്ത് വിനോദ സഞ്ചാര വകുപ്പാണ് ഇതുസംബന്ധിച്ചുള്ള കണക്കുകള് പുറത്തുവിട്ടത്. വരും വര്ഷങ്ങളില് വരുമാനം ഇനിയും വര്ധിക്കുമെന്നാണ് കണക്ക് കൂട്ടുന്നത്. 182 മീറ്റര് ഉയരമുള്ള ഇന്ത്യയുടെ ഉരുക്കു മനുഷ്യന്റെ പ്രതിമ നര്മ്മദ നദിക്കരയുടെ തെക്കായി സര്ദാര് സരോവര് ഡാമില് നിന്നും 3.5 കിലോമീറ്റര് ദൂരത്തായാണ് സ്ഥിതി ചെയ്യുന്നത്. ചൈനയിലെ ബുദ്ധ ക്ഷേത്രവും ജപ്പാനിലെ ഉഷികു ദയ്ബുത്സു, യുഎസിലെ സ്റ്റാച്യൂ ഓഫ് ലിബേര്ട്ടി, ക്രൈസ്റ്റ് ദ റഡീമര് എന്നിവയാണ് പിന്നീട് ലോകത്തില് ഏറ്റവും കൂടുതല് ഉയരത്തിലുള്ള കെട്ടിടങ്ങള്. 153 മീറ്റര് ഉയരത്തിലാണ് ചൈനയുടെ ബുദ്ധ ക്ഷേത്രം ഉള്ളത്. 120 മീറ്ററാണ് ഉഷികു ദായ്ബുത്സുവിന്റേത്. സ്റ്റാച്യു ഓഫ് ലിബേര്ട്ടിക്ക് 93 മീറ്ററുമാണ്.
വിനോദ സഞ്ചാരികളെ ആകര്ഷിക്കുന്നതിനായി സ്റ്റാച്യു ഓഫ് യൂണിറ്റിയില് പ്രദര്ശന കേന്ദ്രം ഒരുക്കിയിട്ടുണ്ട്. ഇതുകൂടാതെ ലേസര്ലൈറ്റ് ഷോ, വിശാലമായ പൂന്തോട്ടവും, ബോട്ടിങ്, ഹെലിക്കോപ്റ്റര് റൈഡ്, ട്രക്കിങ് പക്ഷി വളര്ത്തു കേന്ദ്രം തുടങ്ങിയവയും നിര്മിച്ചിട്ടുണ്ട്.
