ചെന്നൈ: ഒരൊറ്റ ദിവസം കൊണ്ട് തമിഴ്നാട്ടില് പൗരാണിക കേന്ദ്രമായ മഹാബലിപുരവും മാമല്ലപുരം കടല്ത്തീരവും അന്താരാഷ്ട്ര പ്രശസ്തിയിലേക്ക് ഉയര്ന്നിരിക്കുകയാണ്. പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷീ ചിന് പിങ്ങും കൂടിക്കാഴ്ച നടത്തിയ മഹാബലിപുരത്തേക്ക് ഇപ്പോള് വിനോദസഞ്ചാരികളുടെ വന് ഒഴുക്കാണ്. നേതാക്കളുടെ സന്ദര്ശനം കഴിഞ്ഞു തൊട്ടടുത്ത ദിവസങ്ങളില് ഇവിടേക്ക് ഒരു ലക്ഷത്തോളം സഞ്ചാരികള് എത്തിയെന്നാണ കണക്ക്. സുരക്ഷാകാരണങ്ങളാല് സഞ്ചാരികള്ക്ക് വിലക്കുണ്ടായിരുന്ന ഇവിടേക്ക് ശനിയാഴ്ച വൈകീട്ട് മുതലാണ് സന്ദര്ശകരെ അനുവദിച്ചത്. പൊതുഅവധി ദിവസമായതിനാല് ഞായറാഴ്ച സന്ദര്ശകരുടെ എണ്ണം വന് തോതില് വര്ധിച്ചു. കൂടിക്കാഴ്ചയ്ക്കായി പ്രത്യേകം തയ്യാറാക്കിയിരുന്ന താത്കാലിക നിര്മിതികളെല്ലാം ശനിയാഴ്ചതന്നെ പൊളിച്ചുനീക്കി. മോദി-പിങ് കൂടിക്കാഴ്ചയുടെ ദൃശ്യങ്ങള് ടി.വിയില് കണ്ടതിന്റെ കൗതുകത്തിലാണ് സന്ദര്ശകരില് മിക്കവരും മഹാബലിപുരത്തേക്ക് എത്തിയത്. മുണ്ടുടുത്ത് സ്റ്റൈല് മന്നനായി എത്തിയ മോദിയുടെ ചിത്രങ്ങളും വീഡിയോകളും സോഷ്യല്മീഡിയയില് വൈറലായിരുന്നു.
നേതാക്കളുടെ കൂടിക്കാഴ്ചയ്ക്കു മുന്നോടിയായി നടപ്പാതകളും പുല്ത്തകിടികളുമടക്കം പുതുതായി നിര്മിക്കുകയും മോടിപിടിപ്പിക്കുകയും ചെയ്തു. അതേസമയം, പഞ്ചരഥങ്ങള്, തീരക്ഷേത്രം എന്നിവിടങ്ങളില് പ്രവേശിക്കുന്നതിന് ടിക്കറ്റ് വാങ്ങണമെങ്കിലും ശനിയാഴ്ച ഇവിടങ്ങളിലുള്പ്പെടെ സന്ദര്ശകരെ സൗജന്യമായി കടത്തിവിട്ടിരുന്നു. പഞ്ചരഥങ്ങള്ക്ക് രാത്രിയില് മിഴിവേകുന്നതിന് പ്രകാശസംവിധാനങ്ങളും ഉണ്ടായിരുന്നു. ഞായറാഴ്ച അതിരാവിലെ മുതല്ത്തന്നെ മഹാബലിപുരത്തേക്ക് ആളുകളുടെ ഒഴുക്കായിരുന്നു. ശനിയാഴ്ച സൗജന്യമായിരുന്നെങ്കിലും ഞായറാഴ്ച ആളുകളില്നിന്ന് പ്രവേശനത്തിന് നിരക്ക് ഈടാക്കിയിരുന്നു. രാഷ്ട്രത്തലവന്മാര്ക്കായി പ്രത്യേകം ഒരുക്കിയ സൗകര്യങ്ങളുടെ കാണാനായിരുന്നു മിക്കവരും എത്തിയത്. കുടുംബമായി ആണു ഭൂരിപക്ഷം ആള്ക്കാരും മഹാബലിപുരത്തേക്ക് എത്തിയത്. കോടിക്കണിക്കന് ആള്ക്കാരാണ് നേതാക്കളുടെ കൂടിക്കാഴ്ചയുടെ വീഡിയോ ഇപ്പോഴും യൂട്യൂബിലക്കം കാണുന്നത്. മോദി പ്രഭാതസവാരി നടത്തിയ കടല്ത്തീരത്തേക്കും വന്തോതില് കാഴ്ചക്കാര് എത്തുന്നുണ്ട്.
