ന്യൂദല്ഹി : കശ്മീര് വിഷയത്തില് വീണ്ടും നിലപാട് ആവര്ത്തിച്ച് ഇന്ത്യ. കശ്മീര് ഇന്ത്യയുട അവിഭാജ്യ ഘടകമാണ്. ചൈനയ്ക്ക് ഇക്കാര്യം അറിയാവുന്നതാണ്. മറ്റ് രാജ്യങ്ങള് ഈ വിഷയത്തില് പ്രസ്താവന നടത്തുന്നതില് നിന്നും മാറി നില്ക്കണമെന്നും വിദേശകാര്യ മന്ത്രാലയം വ്യക്തമാക്കി.
പാക് പ്രധാനമന്ത്രി ഇമ്രാന് ഖാന്റെ ബീജിങ് സന്ദര്ശന വേളയില് ചൈനീസ് പ്രസിഡന്റ് ഷിജിന്പിങ്ങുമായി കൂടിക്കാഴ്ച്ച നടത്തിയിരുന്നു. അതിനുശേഷം കശ്മീരില് ഏകപക്ഷീയ നടപടികള് പാടില്ലെന്ന് ഇരുവരും സംയുക്തമായി പ്രസ്താവന നടത്തിയതോടെയാണ് കേന്ദ്രം വീണ്ടും നിലപാട് വ്യക്തമാക്കിയത്. ഇന്ത്യാ- ചൈന അനൗപചാരിക ഉച്ചകോടി വെള്ളിയാഴ്ച്ച നടക്കാനിരിക്കെയാണ് ഈ പ്രസ്താവനകള് പുറത്തുവന്നിരിക്കുന്നത്.
അതേസമയം കശ്മീര് വിഷയം ചൈന സൂക്ഷ്മമായി നിരീക്ഷിക്കുകയാണെന്നും പാക്കിസ്ഥാന്റെ താല്പര്യത്തിനെ പിന്തുണക്കുമെന്നും ഷി ചിന്പിങ് പറഞ്ഞതായി ചൈനീസ് ഔദ്യോഗിക വാര്ത്താ ഏജന്സിയായ ഷിന്ഹുവ റിപ്പോര്ട്ട് ചെയ്തിരുന്നു. എന്നാല് കശ്മീര് വിഷയത്തില് ശരിയും തെറ്റും വ്യക്തമാണെന്നും ഇരു രാജ്യങ്ങളും സമാധാനപരമായ ചര്ച്ചയിലൂടെ പരിഹരിക്കണമെന്നും കഴിഞ്ഞ ദിവസം നടന്ന ചര്ച്ചയില് ഷി ജിന്പിങ് പാക് പ്രധാനമന്ത്രി ഇമ്രാന് ഖാനോട് പറഞ്ഞതായും റിപ്പോര്ട്ടിലുണ്ട്. ഇത് സംബന്ധിച്ച് ഔദ്യോഗിക സ്ഥിരീകരണമൊന്നും പുറത്തുവന്നിട്ടില്ല.
വെള്ളിയാഴ്ച്ച ഉച്ചയ്ക്കു ശേഷം ഷിജിന്പിങ് ചെന്നൈയില് എത്തും. ഒക്ടോബര് 11 മുതല് 13 വരെയാണ് മോദി- ഷിജിന്പിങ് കൂടിക്കാഴ്ച നടക്കുക. കശ്മീര് വിഷയം ചൈനീസ് പ്രസിഡന്റ് ചര്ച്ചയ്ക്കെടുത്താല് പ്രധാനമന്ത്രി നരേന്ദ്രമോദി വിശദീകരണം നല്കും. കൂടാതെ ഇരു രാജ്യങ്ങളും തമ്മിലുള്ള നയന്ത്ര വിഷയങ്ങളിലും ചര്ച്ച നടക്കും.
