ഡബ്ലിന്: ഓപ്പണര് സുനില് ആംബ്രൈസിന്റെ സെഞ്ചുറി മികവില് വെസ്റ്റ് ഇന്ഡീസിന് ജയം. ത്രിരാഷ്ട്ര പരമ്പരയിലെ രണ്ടാം മത്സരത്തില് അയര്ലന്ഡിനെ അഞ്ച് വിക്കറ്റിന്് തോല്പ്പിച്ചു. 328 റണ്സ് വിജയലക്ഷ്യവുമായി കളത്തിലിറങ്ങിയ വിന്ഡീസ് 47.5 ഓവറില് അഞ്ച് വിക്കറ്റ് നഷ്ടത്തില് 331 റണ്സ് നേടി. ആംബ്രൈസ് 126 പന്തില് ഒരു സിക്സും പത്തൊമ്പത് ഫോറും അടക്കം 148 റണ്സ് നേടി.
ഓപ്പണര് ഷായ് ഹോപ്പ് (30), റോസ്റ്റണ് ചെയ്സ് (46), ജൊനാഥന് കാര്ട്ടര് (43), ജെയ്സണ് ഹോള്ഡര് (36) എന്നിവര് വിന്ഡീസ് നിരയില് തിളങ്ങി. മൂന്നാം വിക്കറ്റില് ചെയ്സിനൊപ്പം ആംബ്രൈസ് 128 റണ്സ് കൂട്ടിച്ചേര്ത്തു.
നേരത്തെ ടോസ് നേടി ബാറ്റിങ്ങ് തെരഞ്ഞെടുത്ത അയര്ലന്ഡ് 50 ഓവറില് അഞ്ച് വിക്കറ്റ് നഷ്ടത്തില് 327 റണ്സ് നേടി. ആന്ഡി ബാല്ബിര്ണിയുടെ സെഞ്ചുറിയാണ് അയര്ലന്ഡിനെ മികച്ച സ്കോറിലെത്തിച്ചത്. ബാല്ബിര്ണി 124 പന്തില് നാല് സിക്സും പതിനൊന്ന് ഫോറും അടക്കം 135 റണ്സ് നേടി. ഓപ്പണര് പോള് സ്റ്റിര്ലിങ്ങ് 98 പന്തില് രണ്ട് സിക്സും എട്ട് ഫോറും അടക്കം 77 റണ്സ് നേടി മികച്ച പിന്തുണ നല്കി. അവസാന ഓവറുകളില് കെവിന് ഒബ്രെയ്ന് തകര്ത്തടിച്ചതോടെയാണ് സ്കോര് മുന്നൂറ് കടന്നത്. ഒബ്രെയ്ന് 40 പന്തില് മൂന്ന് വീതം സിക്സും ഫോറും അടക്കം 63 റണ്സ് നേടി. വിന്ഡീസിനായി ഷാനോണ് ഗെബ്രിയേല് രണ്ട് വിക്കറ്റ് വീഴ്ത്തി.
