ഇടുക്കി: മുല്ലപ്പെരിയാര് അണക്കെട്ടിന്റെ 10 ഷട്ടറുകള് അടച്ചു. ഇന്നലെ അവസാനം വിവരം ലഭിക്കുമ്പോള് 140 അടിയാണ് ജലനിരപ്പ്. ഞായറാഴ്ച മുതല് ജലനിരപ്പില് കാര്യമായ വ്യത്യാസം വരാത്തതിനെ തുടര്ന്നാണ് ആകെയുള്ള 13 ഷട്ടറുകളില് 10 എണ്ണം താഴ്ത്തിയത്.
2880 ഘനയടി വെള്ളം ഒഴുകിയെത്തുമ്പോള് 2207 വീതമാണ് തമിഴ്നാട് കൊണ്ടുപോകുന്നത്. 12218 ദശലക്ഷം ഘനയടി വെള്ളമാണ് സംഭരണിയിലാകെ അവശേഷിക്കുന്നത്. ഒഴുക്കി വിടുന്ന വെള്ളത്തിന്റെ അളവ് കുറച്ചതോടെ വണ്ടിപ്പെരിയാര് അടക്കമുള്ള മേഖലകളില് ജനജീവിതം സാവധാനം സാധാരണ നിലയിലേക്ക് എത്തുകയാണ്. ദുരിതാശ്വാസ ക്യാമ്പുകള് പിരിച്ചുവിട്ടിട്ടില്ല. പകല് സമയം ആളുകള് വീടുകളില് എത്തി ശുചീകരണ പ്രവര്ത്തനങ്ങള് നടത്തിവരികയാണ്. പദ്ധതി പ്രദേശത്ത് മഴയുടെ ശക്തിയും കുറഞ്ഞിട്ടുണ്ട്.
