ആലപ്പുഴ: കുട്ടനാട് പാക്കേജ് പുനരുജ്ജീവിപ്പിക്കാന് ധാരണ. ഇക്കാര്യം ആവശ്യപ്പെട്ട് കേന്ദ്രസര്ക്കാരിനെ സമീപിക്കുമെന്ന് മന്ത്രി ജി.സുധാകരന് അറിയിച്ചു. ആലപ്പുഴയിൽ മുഖ്യമന്ത്രിയുടെ അധ്യക്ഷതയിൽ ചേർന്ന അവലോകന യോഗത്തിലാണ് മന്ത്രി ഇക്കാര്യം വ്യക്തമാക്കിയത്.
ജലനിയന്ത്രണ സംവിധാനങ്ങള് നടപ്പിലാക്കും. മടകെട്ടാത്ത പാടശേഖരങ്ങള്ക്കെതിരെ ശക്തമായ നടപടിയെടുക്കാനും തീരുമാനമായി. കുട്ടനാട്ടിലെ പ്രളയത്തില് 1000 കോടിയുടെ നഷ്ടമെന്ന് ജി.സുധാകരന് പറഞ്ഞു. റോഡുകള് നന്നാക്കാന് മാത്രം 500 കോടി രൂപ വേണമെന്നും മന്ത്രി പറഞ്ഞു.
അതേ സമയം ആലപ്പുഴയിലെ പ്രളയമേഖലകള് മുഖ്യമന്ത്രി സന്ദര്ശിക്കാത്തതിനെതിരെ രൂക്ഷവിമര്ശനമാണ് പ്രതിപക്ഷം ഉന്നയിച്ചിരുന്നത്. ഇത് വിവാദമായതോടെ മുഖ്യമന്ത്രി കുട്ടനാട്ടില് എത്തുമെന്ന് മന്ത്രിമാര് പിന്നീട് അറിയിച്ചിരുന്നതാണ്. കുട്ടനാട്ടിലെ പ്രളയബാധിത പ്രദേശങ്ങളില് ജില്ലയിലെ മൂന്നുമന്ത്രിമാരും സ്ഥലം എംഎല്എയും എത്താത്തതു കടുത്ത പ്രതിഷേധത്തിന് ഇടയാക്കിയിരുന്നു.
മന്ത്രി ജി. സുധാകരന് ആദ്യമായി വെള്ളപ്പൊക്കം ദുരിതം വിതച്ച പ്രദേശങ്ങളില് വന്നത് കേന്ദ്രമന്ത്രിക്കൊപ്പമായിരുന്നു. സ്വന്തം വീടുള്പ്പെടുന്ന പ്രദേശമായിട്ടും തോമസ് ചാണ്ടി തിരിഞ്ഞുനോക്കിയില്ലെന്നും ആക്ഷേപമുയര്ന്നു.
