കണ്ണൂര്: വളപട്ടണത്ത് ദളിത് യുവാവിനെ പോപ്പുലര് ഫ്രണ്ട് സംഘം കൊലപ്പെടുത്തിയത് താലിബാന് മോഡലില്. 2010 ഏപ്രില് 17 നാണ് കുന്നുംകൈ സ്വദേശിയായ കാരക്കാടന് വിനേഷിനെ പൊയ്തുംകടവില് താലിബാന് മോഡലില് കൊലപ്പെടുത്തി റോഡരികിനോട് ചേര്ന്ന കടവരാന്തയില് പരസ്യമായി കെട്ടിത്തൂക്കിയത്. വിനീഷിനെ മണിക്കൂറുകളോളം പീഡിപ്പിച്ച് രക്തക്കുഴലുകള് മുറിച്ച് രക്തം വാര്ന്നൊഴുകി മരണം ഉറപ്പ് വരുത്തിയ ശേഷം കെട്ടിത്തൂക്കുകയായിരുന്നു.
വിനീഷിനെ പീഡിപ്പിച്ച മുറിയിലും തൂക്കിലേറ്റിയ ബില്ഡിങ്ങിന്റെ മുന്വശത്തെ ഓടയിലും മൃതശരീരം കൊണ്ടുപോയി കിടത്തിയ ടെറസ്സിലും വസ്ത്രങ്ങളിലുമെല്ലാം രക്തം കട്ടപിടിച്ചിരുന്നു. രക്തം ചോര്ത്തിക്കളയാനായി കൊലയാളികള് കാലിലും കൈകളിലും മുറിവുകളുണ്ടാക്കിയിരുന്നു. വിദഗ്ദ പരിശീലനം ലഭിച്ചവര്ക്ക് മാത്രമേ ഇത്തരം കൊല നടപ്പാക്കാന് സാധിക്കൂ എന്ന് വ്യക്തമാണ്. വിനീഷ് താമസിച്ചിരുന്ന ലോഡ്ജിന്റെ മുറിക്ക് മുന്നില് റോഡിനഭിമുഖമായി പരസ്യമായി തൂക്കിലേറ്റിക്കൊണ്ട് സമൂഹത്തെ ഭയപ്പെടുത്തുന്നതിന് വേണ്ടിയാണ് കൊലപാതകം ആസൂത്രണം ചെയ്ത് നടപ്പിലാക്കിയത്. തുടക്കത്തില് അസ്വാഭാവിക മരണത്തിനാണ് കേസെടുത്തതെങ്കിലും വളപട്ടണം പോലീസ് നടത്തിയ അന്വേഷണത്തില് പതിമൂന്ന് പേരെ പ്രതിചേര്ത്തിരുന്നു.
എന്നാല് കൊലപാതകം നടത്തിയ രീതിയും കൊലപാതകം നടത്തിയവരുടെ ക്രിമിനല് പഞ്ചാത്തലവും പരിഗണിച്ച് സമ്രഗമായ അന്വേഷണം നടത്താനോ പ്രതികള്ക്കെതിരെ ശക്തമായ നടപടി സ്വീകരിക്കാനോ പോലീസ് തയ്യാറായില്ല. തുടക്കത്തില് തന്നെ പ്രതികളെ അറസ്റ്റ് ചെയ്യാന് നീക്കം നടക്കുന്നതിനിടെ തന്നെ അന്വേഷണ ഉദ്യോഗസ്ഥനെ മാറ്റിയിരുന്നു. മരണം ആത്മഹത്യയാണെന്ന് വരുത്തിത്തീര്ക്കാന് ഇന്ക്വസ്റ്റ് റിപ്പോര്ട്ടില് തിരുത്തല് വരുത്തിയതായും ആരോപണമുയര്ന്നിരുന്നു. തുടക്കത്തില് കസ്റ്റഡിയിലെടുത്തവരെ കൊലപാതകവുമായി ബന്ധമുള്ളവരാണെന്ന് വ്യക്തമായിട്ടും അറസ്റ്റ് ചെയ്യാതെ വിട്ടയച്ചു.
കൊലപാതകം ആസൂത്രണം ചെയ്തുവെന്ന് കരുതുന്ന പോപ്പുലര് ഫ്രണ്ട് നേതാവിനെ പ്രതിചേര്ക്കാതെ സാക്ഷിപ്പട്ടികയില് ഉള്പ്പെടുത്തിയതായും ആരോപണമുയര്ന്നിരുന്നു. കൊലപാതകം, ദേശവിരുദ്ധ പ്രവര്ത്തനം തുടങ്ങിയ കുറ്റങ്ങള് ചുമത്തേണ്ട കേസായിട്ടും കേവലം ആത്മഹത്യാ പ്രേരണാക്കുറ്റം മാത്രമാണ് പ്രതികള്ക്കെതിരെ ചുമത്തിയത്. കുറ്റവാളികള്ക്ക് നിയമത്തിന്റെ മുന്നില് നിന്ന് രക്ഷപ്പെടാന് കഴിയും വിധം കേസ് അവസാനിപ്പിക്കാനാണ് പോലീസ് ശ്രമിച്ചത്. കണ്ണൂര് ജില്ലയില് പോപ്പുലര് ഫ്രണ്ട് സംഘം 1995 മുതല് 2018 വരെ പത്ത് പേരെ കൊലപ്പെടുത്തിയിട്ടുണ്ടെങ്കിലും അതിമൃഗീയമായി നടപ്പിലാക്കിയതാണ് വിനീഷിന്റെത്. മുസ്ലീം സ്ത്രീകളെ ഉപദ്രവിക്കുന്ന ആരെയും പോപ്പുലര് ഫ്രണ്ടുകാര് വെറുതെ വിടാറില്ലെന്ന് പ്രതികളുടെ കുറ്റസമ്മത മൊഴിയില് നിന്ന് തന്നെ കൊലപാതകത്തിന്റെ കാരണം വ്യക്തമാക്കിയിരുന്നു. എന്നാല് വസ്തുതകള് പരിശോധിച്ച് സമഗ്രമായ അന്വേഷണം നടത്താതെ തിടുക്കപ്പെട്ട് പോലീസ് കേസ് അവസാനിപ്പിക്കുകയായിരുന്നു.
