കണ്ണൂര്: ലോകകപ്പില് കൊറിയയോട് തോറ്റു പുറത്തായ ജര്മന് ടീമിന്റെ ആരാധകര്ക്ക് കണ്ണൂര് കലക്ടറുടെ വക ഫേസ്ബുക്ക് പോസ്റ്റ്. ബുധനാഴ്ച രാത്രി നടന്ന മത്സരത്തില് ദക്ഷിണ കൊറിയ ജര്മനിയെ 2-0ന് പരാജയപ്പെടുത്തിയതിന് തൊട്ടുപിന്നാലെയാണ് ജര്മനിക്കുവേണ്ടി കണ്ണൂരില് സ്ഥാപിച്ചിട്ടുള്ള ഫഌക്സ് ബോര്ഡുകള് നീക്കം ചെയ്യണമെന്ന് ഓര്മിപ്പിച്ച് കളക്ടര് പോസ്റ്റ് ചെയ്തത്. ജര്മനി ലോകകപ്പിന്റെ ഗ്രൂപ്പുഘട്ടത്തില് തന്നെ തോറ്റു പുറത്തായതില് മനംനൊന്തിരിക്കുന്ന ആരാധകരെ തന്റെ ഔദ്യോഗിക ഫെയ്സ്ബുക് പേജിലൂടെയാണ് കലക്ടര് മിര് മുഹമ്മദലി ഓര്മ്മിപ്പിച്ചത്. ജര്മന് ആരാധകര് ഉടന് ഫഌക്സെടുത്തു മാറ്റണമെന്നാണ് കലക്ടര് ആവശ്യപ്പെട്ടിരിക്കുന്നത്. കണ്ണൂരിലെ എല്ലാ ജര്മന് ആരാധകരും ജര്മന് ടീമിനു വേണ്ടി വെച്ച ഫ്ളെക്സുകള് സ്വമേധയാ നീക്കം ചെയ്യുമെന്ന് പ്രതീക്ഷിക്കുന്നുവെന്നാണ് കലക്ടര് അഭിപ്രായപ്പെട്ടത്.
ബുധനാഴ്ച നടന്ന മത്സരത്തില് എതിരില്ലാത്ത രണ്ടു ഗോളുകള്ക്കാണു ജര്മനി ദക്ഷിണ കൊറിയയോടു തോറ്റത്. ഇതോടെ ഗ്രൂപ്പിലെ അവസാന സ്ഥാനക്കാരായാണു ലോക ചാമ്പ്യന്മാരുടെ മടക്കം. ജര്മനിയോടു വല്ല വിരോധവുമുണ്ടെങ്കില് പറഞ്ഞാല് മതി ഇങ്ങനെ ഫേസ്ബുക്ക് പോസ്റ്റിടലാണോ എന്ന് ആരാധകര് കമന്റിടുന്നുണ്ട്. ഫ്ളെക്സ് വയ്ക്കാന് മാത്രമല്ല, എടുത്തുമാറ്റാനും അറിയാമെന്നും ചിലര് പറഞ്ഞിട്ടുണ്ട്.
