മാണ്ഡ്യ: പൂച്ച ചിലര്ക്ക് ദുശ്ശകുനമാണ്, മറ്റു ചിലര്ക്ക് നല്ല നിമിത്തവും. എലികളുടെ ശത്രു എന്നാണ് പൊതുവെയുള്ള ധാരണ. എന്നാല്, കര്ണാടകത്തിലെ മാണ്ഡ്യക്ക് സമീപമൊരു ഗ്രാമത്തില് പൂച്ചയാണ് ദൈവം. സന്തോഷം തരുന്നതും ദുഃഖങ്ങള് അകറ്റുന്നതുമെല്ലാം പൂച്ചയെന്നാണ് ഈ ഗ്രാമവാസികളുടെ വിശ്വാസം.
മാണ്ഡ്യയില് നിന്ന് 35 കിലോമീറ്റര് അകലെ ബെക്കലലെയാണ് പൂച്ചകളെ ആരാധിക്കുന്ന ഗ്രാമം. 1,000 വര്ഷത്തെ ചരിത്രമുണ്ട് ഈ വ്യത്യസ്തമായ ആരാധനയ്ക്ക്. മങ്കമ്മ എന്ന ദൈവം ഈ ഗ്രാമത്തിലേക്ക് പൂച്ചയുടെ രൂപത്തില് എത്തിയെന്നാണ് ഗ്രാമീണരുടെ വിശ്വാസം. മങ്കമ്മ പൂച്ചയായി പ്രത്യക്ഷപ്പെട്ട സ്ഥലത്ത് മണ്പുറ്റ് രൂപപ്പെട്ടുവെന്നു പറയുന്നു. ഇതാണ് ആരാധനാ കേന്ദ്രം.
ഇതിനു ശേഷം ഗ്രാമത്തെ സംരക്ഷിക്കുന്നത് ഈ ദൈവമെന്നു കരുതി പൂച്ചയെ ആരാധിച്ചു തുടങ്ങിയെന്നും പുരോഹിതനായ ആര്. ബാസവാരാധ്യ പറഞ്ഞു. ഈ ഗ്രാമത്തിലോ പുറത്തോ പൂച്ച ചത്തു കിടക്കുന്നതു കണ്ടാല് അതിനെ വിധിപ്രകാരം സംസ്ക്കരിച്ച ശേഷമേ ഇവിടത്തുകാര് മടങ്ങൂ. പൂച്ചയെ ഉപദ്രവിക്കുന്നവരെയോ, കൊല്ലുന്നവരെയോ വച്ചുപൊറുപ്പിക്കില്ലെന്നും ഗ്രാമത്തില് ചായക്കട നടത്തുന്ന മംഗെ ഗൗഡ പറഞ്ഞു.
ജ്യോതിഷികളുടെ നിര്ദേശപ്രകാരം നാല് ദിവസത്തെ മങ്കമ്മോത്സവവും നടത്തുന്നു. മൂന്നു വര്ഷം മുന്പാണ് ഉത്സവം അവസാനമായി നടത്തിയത്. ഇത്തവണ അതിനുള്ള സമയമായെന്നാണ് ഗ്രാമവാസികള് കരുതുന്നത്.
