ശാസ്ത്രീയനാമം: കസ്‌ക്യൂട്ടവിഫ്‌ളെക്‌സാ
സംസ്‌കൃതം: ആകാശവല്ലി അമരവല്ലി
തമിഴ്: എരുമക്കൊട്ടന്‍
എവിടെ കാണാം: ഇന്ത്യയിലുടനീളം വരണ്ട കാടുകളിലും പുഴ, തോട് തീരങ്ങളിലും വനപ്രദേശങ്ങളിലും വൃക്ഷത്തലപ്പുകളെക്കൂടി പൊതിഞ്ഞുനില്‍ക്കുന്ന ഇലയില്ലാത്ത മഞ്ഞനിറത്തിലുള്ള വള്ളിയാണ്. ഈ വള്ളി വൃക്ഷങ്ങളെയും മറ്റു ചെടികളെയും പൂര്‍ണമായി പൊതിഞ്ഞ് സൂര്യപ്രകാശമേല്‍ക്കാത്ത രീതിയിലാക്കുകയും അതുവഴി ഇതിന്റെ ആക്രമണത്താല്‍ മറ്റു ചെടികള്‍ നശിക്കുകയും ചെയ്യും. ഈ വള്ളി പടര്‍ന്നാല്‍ വനംപോലും നശിക്കും. ഇതിന്റെ കടഭാഗം കണ്ടെത്തുക എളുപ്പമല്ല. അതുകൊണ്ടാണ് ഇതിന് മൂടില്ലാത്താളി എന്ന് പേരുവന്നത്. ഈ വള്ളികള്‍ കടുത്ത ചൂടിനെയും പ്രതിരോധിക്കുമെന്നതിനാല്‍ ഈ വള്ളി പടര്‍ന്നു കിടക്കുന്നിടത്ത് കാട്ടുതീ പടരുകയില്ല.
പ്രത്യുല്‍പാദനം: ഒരു ചെറുകഷണം വള്ളി എവിടെ ഇട്ടാലും അതു പടര്‍ന്നുപന്തലിച്ചുകൊള്ളും. ഒരിക്കല്‍ വന്നുപെട്ടാല്‍ രാസപ്രേയാഗത്താലല്ലാതെ നശിപ്പിക്കുക എളുപ്പമല്ല.
ചില ഔഷധപ്രയോഗങ്ങള്‍: (1) ആകാശവല്ലി ഇടിച്ചുപിഴിഞ്ഞ നീര് കണ്ണിലൊഴിച്ചാല്‍ കണ്ണിലെ ചുവപ്പും ചൊറിച്ചിലും കണ്ണില്‍നിന്നും വെള്ളം ഒലിക്കുന്നതും ശമിക്കും.
(2) ചില ത്വക്‌രോഗകാരണങ്ങളാല്‍ തലമുടി കൊഴിയുന്നതിന് മൂടില്ലാത്താളി അരച്ച് തലയില്‍ ലേപനം ചെയ്താല്‍ മതി. (3) ശരീരത്തില്‍ ചൊരിച്ചിലും വട്ടത്തില്‍ ചൊറിഞ്ഞുതടിക്കുന്നതും (ശീതപിത്തം) മൂടില്ലാത്താളി അരച്ചുപുരട്ടിയാല്‍ ശമിക്കുന്നതാണ്. (4) നീരുള്ള ഭാഗത്ത് ഇതു അരച്ചുതേച്ചാല്‍ നീര് കുറയും. (5) പനിയുള്ളവര്‍ക്കും പനി മാറിയവര്‍ക്കും വിശപ്പില്ലാതെ വരുമ്പോള്‍ മൂടില്ലാത്താളി അരച്ചു മോരില്‍ കലക്കി കുടിക്കുന്നത് നല്ലതാണ്. (10 ഗ്രാം മൂടില്ലാത്താളി 250 മില്ലി മോരില്‍) (6) ഇതേ പ്രയോഗം മൂത്രതടസ്സത്തിനും പൂയസ്രാവം (ഗൊണേറിയ) മൂലം ഉണ്ടാകുന്ന മൂത്രതടസ്സത്തിനും വേദനക്കും പുകച്ചിലും ശമനമുണ്ടാക്കും. (7) ചീനപ്പാവും ആകശവല്ലിയും ചേര്‍ത്ത് അരച്ച് പഴകിയ വൃത്തത്തില്‍ തേയ്‌ക്കുന്നത് വൃണശമനത്തിന് നല്ലത്.
വെള്ളപാണ്ട് (വെണ്‍കുഷ്ഠം) രോഗത്തിനും മുടികൊഴിച്ചിലിനും മുടി നരയ്‌ക്കുള്ള തൈലത്തിനും മൂടില്ലാത്താളി ഒഴിച്ചുകൂടാനാവാത്ത ഔഷധമാണ്.
