പാനൂര്: കതിരൂര് മനോജ് വധം. രാഷ്ട്രീയ കൊലപാതകത്തില് യുഎപിഎ വകുപ്പ് ചേര്ത്ത ആദ്യ കുറ്റപത്രവുമായി സിബിഐ. ആര്എസ്എസ് ജില്ലാശാരീരിക്ക് ശിക്ഷണ്പ്രമുഖ് ഇളന്തോട്ടത്തില് മനോജ് വധത്തിലാണ് ചരിത്രത്തിലാദ്യമായി ഒരു രാഷ്ട്രീയ കൊലപാതകത്തില് അന്വേഷണസംഘം യുഎപിഎ ചുമത്തിയത്. സിപിഎമ്മിന്റെ അക്രമരാഷ്ട്രീയത്തിനേറ്റ നിയമപ്രഹരമായിരുന്നു അത്. ഭീകരവാദികള്ക്കും രാജ്യദ്രോഹികള്ക്കുമെതിരെ പൊതുവില് ചുമത്തുന്ന വകുപ്പാണ് സിപിഎം കണ്ണൂര് ജില്ലാ സെക്രട്ടറി പി.ജയരാജന് അടക്കമുളള പ്രതികളുടെ മേല് ഉളളത്. ഇതിനെതിരെ വിമര്ശനവുമായി പി.ജയരാജന്റെ അഭിഭാഷകന് കെ.വിശ്വന് രംഗത്തു വന്നു. സംസ്ഥാനസര്ക്കാറിന്റെ അനുമതി വാങ്ങി മാത്രമെ യുഎപിഎ പോലുളള നിയമങ്ങള് ചുമത്താവൂ എന്നും ഇതിനെ നിയമപരമായി നേരിടുമെന്നും കെ.വിശ്വന് പ്രതികരിച്ചു. എന്നാല് മനോജ് വധത്തില് തുടക്കം മുതല് തന്നെ അന്വേഷണം നടത്തിയ സംസ്ഥാന പോലീസ്, ആഭ്യന്തരവകുപ്പിന്റെ അനുമതിയോടെ യുഎപിഎ നേരത്തെ ചുമത്തിയതാണെന്നും കുറ്റപത്രം സമര്പ്പിക്കുമ്പോള് വീണ്ടും അനുമതി തേടേണ്ടതില്ലെന്നും അഡ്വ.പി.പ്രേമരാജന് പറഞ്ഞു. കേന്ദ്ര അന്വേഷണ ഏജന്സിയായ സിബിഐ സംസ്ഥാന ആഭ്യന്തരവകുപ്പില് നിന്നും അനുമതി തേടേണ്ടതുമില്ല. ഭീകരവാദികള്ക്കു സമാനമായി കുറ്റകൃത്യം ചെയ്ത്, ജില്ലയില് കലാപമുണ്ടാക്കാനായിരുന്നു അക്രമികളുടെ ലക്ഷ്യം. പി.ജയരാജനാണ് കൊലപാതകത്തിലെ മുഖ്യപ്രതിയെന്ന് വ്യക്തമാക്കിയ സിബിഐ കൊലയാളികള്ക്ക് സഹായം ചെയ്തുകൊടുത്തതടക്കം കുറ്റപത്രത്തില് 15 ഓളം വകുപ്പുകള് ജയരാജനെതിരെ ചുമത്തിയിട്ടുണ്ട്.
കതിരൂര് മനോജ് വധം. രാഷ്ട്രീയ കൊലപാതകത്തില് യുഎപിഎ വകുപ്പ് ചേര്ത്ത ആദ്യ കുറ്റപത്രവുമായി സിബിഐ
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.