മലപ്പുറം: ഭാരതപുഴയിലേക്കും സമീപത്തെ ഓടകളിലേക്കും സ്വകാര്യ സ്ഥാപനങ്ങളും വ്യക്തികളും മാലിന്യം തുറന്നു വിടുന്നതിനെതിരെ ശക്തമായ നടപടി സ്വീകരിക്കാന് ജില്ലാ ദുരന്തനിവാരണ സമിതി ഗ്രാമ പഞ്ചായത്തുകള്ക്ക് നിര്ദ്ദേശം നല്കി. കുറ്റിപ്പുറം പഞ്ചായത്തില് കോളറ ബാക്റ്റീരിയ കണ്ടെത്തുകയും പകര്ച്ചവ്യാധികള് വ്യാപകമാകുകയും ചെയ്തിരുന്നു. പ്രദേശത്തെ എല്ലാ കിണറുകളുടെയും വെള്ളത്തിന്റെ ഗുണമേന്മ പരിശോധിക്കാന് ആരോഗ്യ വകുപ്പിന് നിര്ദ്ദേശം നല്കി.
കടല്ക്ഷോഭം കാരണം അപകട ഭീഷണി നേരിടുന്ന പൊന്നാനി ലൈറ്റ് ഹൗസ് സംരക്ഷിക്കുന്നതിന് ജില്ലാ ദുരന്തനിവാരണ അതോറിറ്റിയുടെ ഫണ്ടില് നിന്നും 9.40 ലക്ഷം അനുവദിച്ചു. ജില്ലാ കളക്ടര് അമിത് മീണയുടെ അദ്ധ്യക്ഷതയില് ചേര്ന്ന യോഗത്തിലാണ് തീരുമാനം. യോഗത്തില് ജില്ലാപഞ്ചായത്ത് പ്രസിഡന്റ് എ.പി.ഉണ്ണികൃഷ്ണന്, ഡെപ്യൂട്ടി കളക്ടര് സി.അബ്ദുല് റഷീദ്, ഡിഎംഒ ഡോ.സക്കീന, എ.പ്രേജിത്, പി.പ്രദീപ്, അലി പുതുശ്ശേരി എന്നിവര് പങ്കെടുത്തു.
