കണ്ണൂര്: നോണ്വൂവണ് ബാഗുകള് പ്ലാസ്റ്റിക് സഞ്ചികള് പോലെ അപകടകരമല്ലെന്ന് ചിലകോണുകളില് നിന്നുയരുന്ന അവകാശവാദം ശരിയല്ലെന്ന് ജില്ലാ പഞ്ചായത്ത് പ്രസിഡന്റ് കെ.വി.സുമേഷ്, ജില്ലാ കലക്ടര് മീര് മുഹമ്മദലി എന്നിവര് സംയുക്ത പ്രസ്താവനയില് വ്യക്തമാക്കി. കാഴ്ചയില് തുണിസഞ്ചിപോലെ തോന്നിക്കുന്ന നോണ് വൂവണ് ബാഗുകള് പരിസ്ഥിതി സൗഹൃദമാണെന്ന രീതിയില് ജനങ്ങളെ തെറ്റിദ്ധരിപ്പിക്കാന് ശ്രമം നടക്കുന്ന പശ്ചാത്തലത്തിലാണ് വിശദീകരണം.
ഡല്ഹി ഹൈക്കോടതിയുടെ നിര്ദേശത്തെ തുടര്ന്ന് ന്യൂഡല്ഹിയിലെ പ്രശസ്ത ഗവേഷണ സ്ഥാപനമായ ശ്രീറാം ഇന്സ്റ്റിറ്റിയൂട്ട് ഓഫ് ഇന്ഡസ്ട്രിയല് റിസര്ച്ച് നടത്തിയ പഠനത്തില് നോണ്വൂവണ് ബാഗുകള് പ്ലാസ്റ്റിക് പോലെത്തന്നെ അപകടകരമാണെന്ന് കണ്ടെത്തിയതായി സംയുക്ത പ്രസ്താവനയില് വ്യക്തമാക്കി. 2008ല് ന്യൂഡല്ഹിയില് പ്ലാസ്റ്റിക് സഞ്ചികള് നിരോധിച്ചപ്പോള് പകരമായി നോണ്വൂവണ് ബാഗുകള് ഉപയോഗിച്ചതിനെതിരേ പരിസ്ഥിതി പ്രവര്ത്തകര് പരാതി നല്കിയതിനെ തുടര്ന്നായിരുന്നു കോടതി റിപ്പോര്ട്ട് തേടിയത്. നോണ്വൂവണ് സഞ്ചികളില് 98.3 ശതമാനവും പോളിപ്രൊപ്പിലിന് എന്ന പ്ലാസ്റ്റിക്ക് പദാര്ഥമാണ് അടങ്ങിയിട്ടുള്ളതെന്നായിരുന്നു ഇന്സ്റ്റിറ്റിയൂട്ടിന്റെ കണ്ടെത്തല്. ജൈവവിഘടനത്തിന് വിധേയമാവാത്ത നോണ്വൂവണ് ബാഗുകള് പ്ലാസ്റ്റിക്ക് പോലെത്തന്നെ മണ്ണിനോട് ചേരാത്ത പദാര്ഥമാണെന്നും പഠനത്തില് വ്യക്തമായി. ഇക്കാര്യങ്ങള് കാണിച്ച് ഇന്സ്റ്റിറ്റിയൂട്ട് ഡല്ഹി ഹൈക്കോടതിയില് റിപ്പോര്ട്ടും സമര്പ്പിച്ചിരുന്നു.
വസ്തുതകള് ഇതായിരിക്കെ, തെറ്റായ പ്രചാരണങ്ങളില് പൊതുജനങ്ങള് വീണുപോവരുതെന്നും പരിസ്ഥിതിക്ക് ദോഷകരമായ പ്ലാസ്റ്റിക്നോണ് വൂവണ് ബാഗുകള് ഉപയോഗിക്കുന്നതില് നിന്ന് വ്യാപാരികള് വിട്ടുനില്ക്കണമെന്നും പ്രസ്താവനയില് വ്യക്തമാക്കി. ഇത്തരം നിരോധിത സാധനങ്ങള് വിതരണം ചെയ്യുന്നവര്ക്കെതിരായ നടപടികള് വരുംദിനങ്ങളില് കൂടുതല് വ്യാപകമാക്കും.
നഗരങ്ങളിലെ ചില കടകളില് പ്ലാസ്റ്റിക്നോണ് വൂവണ് സഞ്ചികള് ഉപയോഗിക്കുന്നതായി ശ്രദ്ധയില്പ്പെട്ടതായി ശുചിത്വ മിഷന് ജില്ലാകോഓര്ഡിനേറ്റര് വി.കെ. ദിലീപ് അറിയിച്ചു. ഇവര്ക്കെതിരായ നടപടികള് കൂടുതല് ശക്തിപ്പെടുത്തും. വില്പ്പന ആവര്ത്തിക്കുന്നവരുടെ ലൈസന്സ് റദ്ദ് ചെയ്യുന്നതിനുള്ള നടപടികള് സ്വീകരിക്കുമെന്നും പ്രസ്താവനയില് വ്യക്തമാക്കി.
