ശ്രീകാര്യം: പരിസ്ഥിതി സൗഹൃദമല്ലാത്ത നിര്‍മ്മാണത്തിലെ സുരക്ഷാ വീഴ്ച ലോക പരിസ്ഥിതി ദിനത്തില്‍ കവര്‍ന്നത് നാലു ജീവനുകള്‍. പാങ്ങപ്പാറയിലെ പത്തൊമ്പത് നില ഫഌറ്റ് നിര്‍മ്മാണത്തിലെ ഭൂവികസനം യാതൊരുവിധ സുരക്ഷാ മാനദണ്ഡങ്ങളും പാലിച്ചില്ലെന്ന് ആക്ഷേപം ശക്തമാണ്. റോഡില്‍ നിന്ന് ചരിവായി കിടന്ന ഭൂമി ഒരു കുടുംബത്തിലെ വിവിധ ആളുകളുടേതായിരുന്നു. മൂന്നേക്കറോളം വരുന്ന ഈ ഭൂമിയാണ് പത്തൊമ്പത് നില ഫഌറ്റ് നിര്‍മ്മാണത്തിനായി കോഴിക്കോട് കേന്ദ്രമായി പ്രവര്‍ത്തിക്കുന്ന ലാഡര്‍ എന്ന കണ്‍സ്ട്രക്ഷന്‍ കോ-ഓപ്പറേറ്റീവ് സൊസൈറ്റി വാങ്ങി ഫഌറ്റ് നിര്‍മ്മാണം നടത്തുന്നത്.
ചരിവായ ഭൂമി അറുപത് അടിയോളം താഴ്ചയില്‍ താഴ്‌ത്തി താഴത്തെ ഭൂനിരപ്പിന് സമാനമാക്കിയാണ് നിര്‍മ്മാണം. അറുപത് അടി താഴ്ചയില്‍ മണ്ണ് ഇടിച്ചു താഴ്‌ത്തിയ ഭാഗത്ത് വേനല്‍ക്കാലത്തു സുരക്ഷാ ഭിത്തി നിര്‍മ്മിക്കാതെ മഴ ആരംഭിച്ചപ്പോള്‍ നടത്തിയ ഭിത്തി നിര്‍മ്മാണമാണ് അപകടം വിളിച്ചു വരുത്തിയത്. ഇത്രയേറെ ഉയരത്തിലെ മണ്ണ് നനഞ്ഞു കുതിര്‍ന്നിരിക്കുന്ന സമയത്ത് സുരക്ഷാഭിത്തി നിര്‍മ്മാണം നടത്തുന്നത് സുരക്ഷിതമല്ലെന്ന് കമ്പനി തിരിച്ചറിഞ്ഞില്ല.
മണ്ണ് ഇടിച്ചു താഴ്‌ത്തുമ്പോള്‍ ചരിവായി ഇടിക്കണമെന്ന എന്‍ജിനീയറിംഗ് തത്വം ഇവിടെ പാലിക്കപ്പെട്ടില്ല. തൂക്കായി മണ്ണിടിച്ചു നിറുത്തിയ ശേഷമാണ് അതിനിടയില്‍ കമ്പികെട്ടി കോണ്‍ക്രീറ്റ് മതില്‍ ഉയര്‍ത്താന്‍ ശ്രമം നടന്നത്. മുകളിലെ കുതിര്‍ന്ന മണ്ണ് ഇടിഞ്ഞു വീഴാന്‍ കാരണമായത് ഇതുകൊണ്ടാണ്. മണ്ണിന്റെ ഇടിക്കുന്ന താഴ്ചയ്‌ക്കനുസരിച്ച് അതിര്‍ത്തിയില്‍ നിന്നും നിശ്ചിത ദൂരം സ്ഥലം വിട്ട ശേഷമാണ് മണ്ണ് ഇടിക്കേണ്ടതെന്ന നിയമവും ഇവിടെ പാലിച്ചില്ല.
അപകട സ്ഥലത്തിനു മുകളില്‍ അഞ്ചോളം കെട്ടിടങ്ങള്‍ നിലവിലുണ്ട്. ഈ കെട്ടിടങ്ങളും അപകട ഭീഷണി ഉയര്‍ത്തുന്നു. ഇവിടെയുള്ള കെട്ടിടത്തില്‍ നിന്നും കേവലം രണ്ട് മീറ്റര്‍ ദൂരം മാത്രമാണ് അപകട സ്ഥലത്തെ അറുപതടി താഴ്ചയുള്ള സ്ഥലം.
മണ്ണിടിഞ്ഞ് വീണ് നാലുപേര്‍ മരിച്ച സംഭവത്തില്‍ നിയമങ്ങള്‍ പാലിക്കാതെയുള്ള നിര്‍മ്മാണ പ്രവര്‍ത്തനങ്ങളാണ് നടന്നിരിക്കുന്നത്. പരാതികള്‍ ഉയര്‍ന്നിട്ടും നടപടികള്‍ സ്വീകരിക്കാത്തതില്‍ ദുരൂഹതയുണ്ടെന്നും മനുഷ്യ ജീവന് വില കല്‍പ്പിക്കാതെയുള്ള ഇത്തരം നിര്‍മ്മാണ പ്രവര്‍ത്തനങ്ങള്‍ക്ക് ചുക്കാന്‍ പിടിക്കുന്നവര്‍ക്കെതിരെ കര്‍ശന നടപടികള്‍ വേണമെന്നും സ്ഥലം സന്ദര്‍ശിച്ച ബിജെപി സംസ്ഥാന പ്രസിഡന്റ് കുമ്മനം രാജശേഖരന്‍ പറഞ്ഞു. കുറ്റക്കാര്‍ക്കെതിരെ ശക്തമായ നടപടികള്‍ സ്വീകരിക്കണമെന്ന് സ്ഥലം സന്ദര്‍ശിച്ച ബിജെപി മുന്‍ അധ്യക്ഷന്‍ വി.മുരളീധരന്‍ പറഞ്ഞു.
സംഭവത്തെക്കുറിച്ച് അന്വേഷിച്ച് റിപ്പോര്‍ട്ട് നല്‍കാന്‍ കളക്ടറോട് മുഖ്യമന്ത്രി ആവശ്യപ്പെട്ടു. മരിച്ച ഇതര സംസ്ഥാന തൊഴിലാളികളുടെ മൃതദേഹം നാട്ടിലെത്തിക്കാന്‍ വേണ്ട സഹായം ചെയ്യാനും ജില്ലാ ഭരണകൂടത്തോട് മുഖ്യമന്ത്രി നിര്‍ദ്ദേശിച്ചു.
