കണ്ണൂര്: കഴിഞ്ഞദിവസം ഡല്ഹി മെട്രോ റെയില്വേ കോര്പ്പറേഷന്റെതായി വന്ന തലശ്ശേരി-മൈസൂര് റെയില്പ്പാതയെക്കുറിച്ചുള്ള പഠന റിപ്പോര്ട്ട് നിര്ഭാഗ്യകരമാണെന്നും ഇത് തള്ളിക്കളയണമെന്നും നോര്ത്ത് മലബാര് ചേമ്പര് ഓഫ് കോമേഴ്സ് ആവശ്യപ്പെട്ടു. ഏറെ നാളത്തെ ഉത്തരമലബാറുകാരുടെ നിരന്തരമായ മുറവിളിക്ക് ശേഷമാണ് പ്രസ്തുത റെയില്വേ ലൈനിനെപ്പറ്റി പഠനം നടത്താന് തന്നെ റെയില്വേ മന്ത്രാലയം തീരുമാനിച്ചത്. ഇതുവരെ നടത്തപ്പെട്ട പഠനങ്ങളെല്ലാം അനുകൂലവുമായിരുന്നു. എന്നാല് ഇപ്പോള് നിലമ്പൂര്-നന്ദന്കോട് റെയില് തെക്കന് കേരളത്തിനും തമിഴ്നാട്ടിനും മാത്രമേ ഉപയോഗപ്രദമാകൂ എന്നറിഞ്ഞിട്ടും മലബാറുകാരുടെ സ്വപ്ന പദ്ധതി നടപ്പില് വരുത്താതെ ഓരോരോ കാരണം പറഞ്ഞ് മുടക്കം നില്ക്കുന്നത് ഉത്തര മലബാറുകാരോട് കാണിക്കുന്ന നീതികേടാണെന്ന് യോഗം വിലയിരുത്തി.
അഴീക്കല് പോര്ട്ട് യാഥാര്ത്ഥ്യമാകുന്നതോടു കൂടി കൊടക്-കൂര്ഗ്ഗ് മേഖലയിലെ ഉല്പ്പന്നങ്ങള് അഴീക്കല് പോര്ട്ടിലെത്തിക്കാന് മൈസൂര്-തലശ്ശേരി റെയില്പ്പാത അത്യന്താപേക്ഷിതമാണ്. ആയിരക്കണക്കിന് വിദ്യാര്ത്ഥികള് ബംഗളൂരുവില് പഠിക്കുകയും ആയിരക്കണക്കിന് ഉദ്യോഗാര്ത്ഥികള് ഐടി മേഖലയിലെ ജോലി ആവശ്യാര്ത്ഥവും നിരവധി മലയാളികള് കച്ചവട ആവശ്യത്തിനായും ചികിത്സാ ആവശ്യങ്ങള് നിറവേറ്റുന്നതിനും ഏറെ സഹായകരമായിരിക്കും തലശ്ശേരി-മൈസൂര് റെയില്പ്പാത. മറ്റ് ഏജന്സികളെക്കൊണ്ട് വീണ്ടും പഠനം നടത്തി പദ്ധതി പ്രാവര്ത്തികമാക്കാന് വേണ്ട നടപടികള് എത്രയും വേഗത്തില് കൈക്കൊള്ളണമെന്ന് നോര്ത്ത് മലബാര് ചേമ്പര് ഓഫ് കോമേഴ്സ് കേന്ദ്ര റെയില്വേ മന്ത്രാലയത്തിനയച്ച നിവേദനത്തില് ആവശ്യപ്പെട്ടു.
യോഗത്തില് പ്രസിഡണ്ട് സി.വി.ദീപക്, വൈസ് പ്രസിഡണ്ട് മാത്യു സാമുവേല്, ഓണററി സെക്രട്ടറി സച്ചിന് സൂര്യകാന്ത്, ജോയന്റ് സെക്രട്ടറി പി.ഷാഹിന്, ട്രഷറര് എ.കെ.റഫീഖ്, റെയില്വേ സബ് കമ്മറ്റി ചെയര്മാന് വിഷ്ണു ഖണ്ഡേല്വാള് തുടങ്ങിയവര് സംസാരിച്ചു.
