ആലത്തൂര്: ജനങ്ങളെ വിഭജിച്ചു ഭരിക്കുന്ന സര്ക്കാരാണ് കേരളം ഭരിക്കുന്നതെന്ന് ഡോ. സത്യപാല് സിംഗ് എംപി ആരോപിച്ചു.
അക്രമത്തിലൂടെയും തെറ്റായ പ്രചരണങ്ങളിലൂടെയും ജനങ്ങളെ തെറ്റിധരിപ്പിക്കുകയാണ്. ബിജെപി ആലത്തൂര് ലോകസഭാ മണ്ഡലം കണ്വെന്ഷന് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വികസന പ്രവര്ത്തനത്തിലൂടെ ലോകശ്രദ്ധ നേടിയ സര്ക്കാരാണ് കേന്ദ്രം ഭരിക്കുന്നത്.എന്നാല് വികസനത്തിന് എതിര് നല്ക്കുന്ന ഇടതുസര്ക്കാരാവട്ടെ അഴിമതിയുടെ കാവല്ക്കാരാണ്.
നോട്ടുനിരോധനത്തിലൂടെ അഴിമതിക്ക് കൂച്ചുവിലങ്ങിട്ട നേതാവാണ് പ്രധാനമന്ത്രി നരേന്ദ്രമോദി. ജീവന്രക്ഷാ മരുന്നുകള് 90 ശതമാനം വരെ വിലകുറച്ച് സാധാരണക്കാര്ക്ക് ലഭ്യമാക്കാനുള്ള സംവിധാനം ഏര്പ്പെടുത്തി, കര്ഷകര്ക്ക് ഗുണകരമായ ഒട്ടേറെ പദ്ധതികള് നടപ്പിലാക്കി. എന്നാല് കേന്ദ്രം അനുവദിച്ച തുകയുടെ ഒരു ഭാഗം പോലും കര്ഷകര്ക്ക് നല്കാതെ കേന്ദ്രസര്ക്കാരെ വിമര്ശിക്കുകയാണ് ഇടതുസര്ക്കാര്. ഇവര് കേരളത്തിന് ശാപമാണെന്നും അദ്ദേഹം പറഞ്ഞു.
2022ല് എല്ലാ കുടുംബങ്ങള്ക്കും വീടെന്ന സ്വപനം സാക്ഷാത്ക്കരിക്കാനുള്ള ശ്രമത്തിലാണ് കേന്ദ്രസര്ക്കാര്. ബിജെപി ഭരിക്കുന്ന സംസ്ഥാനങ്ങളില് വികസനപ്രവര്ത്തനങ്ങള് പുരോഗമിക്കുകയും കുറ്റകൃത്യങ്ങള് കുറയുകയും ചെയ്തു. എന്നാല് സംസ്ഥാനത്ത് സിപിഎമ്മിന്റെ നേതൃത്വത്തില് അക്രമരാഷ്ട്രീയം നടക്കുന്നു. സാധാരണക്കാരന് സമാധാനത്തോടെ ജീവിക്കാന് കഴിയാത്ത അവസ്ഥയാണെന്നും അദ്ദേഹം പറഞ്ഞു. ബിജെപി മധ്യമേഖലാ ജന.സെക്രട്ടറി പി.വേണുഗോപാല് അധ്യക്ഷതവഹിച്ചു. നേതാക്കളായ എന്.ശിവരാജന്, അഡ്വ.നാരായണന് നമ്പൂതിരി, സി.കൃഷ്ണകുമാര്, അഡ്വ.കെ.കെ.അനീഷകുമാര്്, എം.ലക്ഷ്മണന്, കെ.ശിവദാസ്, എം.കെ.ലോകനാഥന്, പി.എം.ശിവദാസ്, എ.കെ.ഓമനക്കുട്ടന്, ഇ.പി.നന്ദകുമാര്, കെ.ശിവദാസ്, ചന്ദ്രന്, കെ.ജി.പ്രദീപ്കുമാര്, സി.എസ്.ദാസ് എന്നിവര് പങ്കെടുത്തു.
