കണ്ണൂര്‍: കണ്ണൂര്‍ സ്‌പോര്‍ട്‌സ് ഡിവിഷനെ ജി.വി രാജ സ്‌പോര്‍ട്‌സ് സ്‌കൂള്‍ മാതൃകയില്‍ സമ്പൂര്‍ണ കായിക സ്‌കൂളായി മാറ്റണമെന്ന് യുവജനക്ഷേമ-യുവജനകാര്യ നിയമസഭാസമിതി അഭിപ്രായപ്പെട്ടു. വിദ്യാര്‍ഥികള്‍ക്ക് ശാസ്ത്രീയ പരിശീലനം ലഭ്യമാക്കി കായിക രംഗത്ത് മികവുറ്റവരാക്കി മാറ്റാന്‍ ഇത് അനിവാര്യമാണ്. ഇക്കാര്യം സര്‍ക്കാരിനോട് ശുപാര്‍ശ ചെയ്യുമെന്നും സമിതി ചെയര്‍മാന്‍ ടി.വി.രാജേഷ് എംഎല്‍എ പറഞ്ഞു. സ്‌പോര്‍ട്‌സ് ഡിവിഷന് സ്‌കൂള്‍, സ്‌പോര്‍ട്‌സ് ഹോസ്റ്റല്‍, മുണ്ടയാട് ഇന്‍ഡോര്‍ സ്റ്റേഡിയം എന്നിവ സന്ദര്‍ശിച്ച ശേഷം കലക്ടറേറ്റ് കോണ്‍ഫറന്‍സ് ഹാളില്‍ നടന്ന യോഗത്തില്‍ സംസാരിക്കുകയായിരുന്നു അദ്ദേഹം. സമിതി അംഗങ്ങളായ ഹൈബി ഈഡന്‍, കെ.രാജന്‍, ആര്‍.രാജേഷ്, കെ.എസ്.ശബരീനാഥന്‍, ഐ.ബി.സതീഷ് എന്നിവരും സംഘത്തിലുണ്ടായിരുന്നു.
നിലവില്‍ മുനിസിപ്പല്‍ ഹയര്‍ സെക്കന്ററി സ്‌കൂളില്‍ പ്രവര്‍ത്തിക്കുന്ന കണ്ണൂര്‍ സ്‌പോര്‍ട്‌സ് ഡിവിഷന് ആവശ്യമായ കായിക ഉപകരണങ്ങളോ പരിശീലകരോ പരിശീലന സൗകര്യങ്ങളോ ഇല്ല. അത്‌ലറ്റിക്‌സ് വിഭാഗത്തില്‍ നാല് സ്‌പെഷ്യലൈസ്ഡ് പരിശീലകര്‍ വേണ്ടിടത്ത് ഒരാള്‍ മാത്രമാണുള്ളത്. ഫുട്‌ബോള്‍, വോളിബോള്‍, ബാസ്‌ക്കറ്റ് ബോള്‍, തൈക്കോണ്ടോ, ഫുട്‌ബോള്‍ എന്നിവയ്‌ക്ക് പരിശീലകരില്ല.
190ലേറെ കുട്ടികള്‍ താമസിക്കുന്ന സ്‌പോര്‍ട്‌സ് ഹോസ്റ്റലിന്റെ അവസ്ഥ പരിതാപകരമാണ്. നാലു പേര്‍ക്ക് താമസിക്കാവുന്ന മുറിയില്‍ 14 പേരോളമാണ് കഴിയുന്നത്. മുറികള്‍ ബാത്ത് അറ്റാച്ച്ഡ് അല്ലാത്തതിനാല്‍ രാത്രി സമയങ്ങളില്‍ പോലും പുറത്തിറങ്ങി പോവേണ്ട അവസ്ഥയാണ്. പുറത്തുള്ള 20 ശുചിമുറികളില്‍ 11ഉം ഉപയോഗശൂന്യവുമാണ്. പുതിയ സ്‌പോര്‍ട്‌സ് ഹോസ്റ്റലിന്റെ നിര്‍മാണം അഞ്ച് വര്‍ഷം മുമ്പ് ആരംഭിച്ചിരുന്നുവെങ്കിലും പണി പൂര്‍ത്തിയായിട്ടില്ല. മുണ്ടയാട് ഇന്‍ഡോര്‍ സ്റ്റേഡിയത്തോടനുബന്ധിച്ചുള്ള 13 ഏക്കര്‍ സ്ഥലത്തേക്ക് റസിഡന്‍ഷ്യല്‍ സംവിധാനത്തോടെ സ്‌കൂള്‍ മാറ്റാവുന്നതാണെന്ന് സര്‍ക്കാരിനോട് ശുപാര്‍ശ ചെയ്യുമെന്നും അദ്ദേഹം പറഞ്ഞു. സ്‌പോര്‍ട്‌സ് ഡിവിഷന് കായിക വകുപ്പിന് കീഴിലാക്കിയാല്‍ നിലവിലെ പ്രശ്‌നങ്ങള്‍ക്ക് പരിഹാരം കാണാനാവുമെന്നും അദ്ദേഹം അഭിപ്രായപ്പെട്ടു.
വിദ്യാര്‍ഥികള്‍ക്ക് ഹോസ്റ്റലില്‍ നിന്ന് സ്‌കൂളിലേക്കും തിരിച്ചും യാത്ര ചെയ്യാന്‍ വാഹന സൗകര്യമേര്‍പ്പെടുത്താനും ഹയര്‍ സെക്കന്ററി വിദ്യാര്‍ഥികള്‍ക്കും പോക്കറ്റ് മണി ലഭ്യമാക്കാനും സര്‍ക്കാരിനോട് ശുപാര്‍ശ നല്‍കും.
മുനിസിപ്പല്‍ കൗണ്‍സിലര്‍ ലിഷ ദീപക്, നിയമസഭാ ജോ.സെക്രട്ടറി ഗോപകുമാരന്‍പിളള, ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് ഒ.കെ വിനീഷ്, മുനിസിപ്പല്‍ സ്‌കൂള്‍ ഹെഡ്മാസ്റ്ററും സ്‌പോര്‍ട്‌സ് ഹോസ്റ്റല്‍ ചീഫ് വാര്‍ഡനുമായ സി.പി.പ്രസൂനന്‍, ഹയര്‍ സെക്കന്ററി പ്രിന്‍സിപ്പല്‍ ടി.വിമ, പിടിഎ പ്രസിഡന്റ് സാജിദ് തുടങ്ങിയവര്‍ സ്‌കൂളില്‍ നടന്ന ചര്‍ച്ചയില്‍ പങ്കെടുത്തു.
