കണ്ണൂര്‍: കണ്ണൂര്‍ സര്‍വകലാശാലയുടെ ഭരണഭാഷ മലയാളമാക്കിക്കൊണ്ടുള്ള പ്രഖ്യാപനം നടത്തി. 2017 ജനുവരി ഒന്ന് മുതല്‍ സര്‍വ്വകലാശാലയുമായി ബന്ധപ്പെട്ട എല്ലാ എഴുത്തുകുത്തുകളും മലയാളത്തിലായിരിക്കും. ചെറുശ്ശേരി ഓഡിറ്റോറിയത്തില്‍ ഇത് സംബന്ധിച്ച നടന്ന യോഗത്തില്‍ വൈസ് ചാന്‍സലര്‍ ഡോ.എം.കെ.അബ്ദുള്‍ഖാദര്‍ പ്രഖ്യാപനം നടത്തി.
മലയാളത്തില്‍ ഫയലെഴുതുമ്പോള്‍ സമാനമായ മലയാളപദം കണ്ടുപിടിക്കുകയല്ല, മറിച്ച് സാധാരണ ഉപയോഗത്തിലുള്ള ഇംഗ്ലീഷ് പദങ്ങള്‍ അതേപടി ഉപയോഗിക്കുകയാണ് വേണ്ടതെന്ന് യോഗം ഉദഘാടനം ചെയ്ത പ്രശസ്ത സാഹിത്യകാരനായ ടി.പദ്മനാഭന്‍ അഭിപ്രായപ്പെട്ടു. പറഞ്ഞു പതിഞ്ഞ ഇംഗ്ലീഷ് പദങ്ങള്‍ക്ക് മലയാള സമാനരൂപം തേടിയാല്‍ അത് പരിഹാസ്യമാവുമെന്ന് അദ്ദേഹം സഞ്ജയനെ ഉദാഹരിച്ചു കൊണ്ട് പറഞ്ഞു.
അടുത്തമാസം മുതല്‍ സംസ്ഥാനത്തിന് വെളിയിലേക്കും വിദേശത്തേക്കുമുള്ള കത്തുകള്‍ ഒഴികെയുള്ളവ മലയാളത്തിലായിരിക്കുമെന്ന് വൈസ് ചാന്‍സലര്‍ അറിയിച്ചു. ഇവയുടെ നോട്ട്ഫയലുകളും മലയാളത്തിലായിരിക്കും. സര്‍വ്വകലാശാലയിലേക്ക് അയക്കുന്ന സന്ദേശങ്ങളും മലയാളത്തില്‍ ലഭിക്കുമെന്നാണ് പ്രതീക്ഷിക്കുന്നത്
ചടങ്ങില്‍ ബിജിമോള്‍ എംഎല്‍എ മുഖ്യപ്രഭാഷണം നടത്തി. സിന്‍ഡിക്കേറ്റ് മെമ്പര്‍ പ്രകാശന്‍ മാസ്റ്റര്‍, മലയാളം വകുപ്പ് മേധാവി ഡോ.എ.എം.ശ്രീധരന്‍ എന്നിവര്‍ സംസാരിച്ചു. പ്രൊ.വൈസ് ചാന്‍സലര്‍ ഡോ.ടി.അശോകന്‍ സ്വാഗതവും രജിസ്ട്രാര്‍ ഡോ.ബാലചന്ദ്രന്‍ കീഴോത്ത് നന്ദിയും പറഞ്ഞു.
