മീനങ്ങാടി : മാലിന്യ കൂമ്പാരത്തിനുമുകളില് ഹരിത കേരള മിഷന് ഉദ്ഘാടനം നടത്തിയ അധികൃതര് പക്ഷെ മാലിന്യം നീക്കാനും തയ്യാറാ യില്ല. ശുദ്ധമായ വായു, ശുദ്ധമായ ജലം, ഫലസമ്പുഷ്ടമായ മണ്ണ് അടുത്ത തലമുറക്കും കരുതി വെക്കുക എന്ന ലക്ഷ്യത്തോടുകൂടി സംസ്ഥാന സര്ക്കാര് പ്രഖ്യാപിച്ച ഹരിത കേരളം മിഷന് എന്ന പദ്ധതിയുടെ പഞ്ചായത്ത്തല ഉദ്ഘാടനമാണ് മീനങ്ങാടി ബസ്സ്റ്റാന്റ് പരിസരത്ത് മാലിന്യ കൂമ്പാരങ്ങള്ക്കിടയില് നടത്തിയത്.
ഇതിനോട് ചേര്ന്നുകിടക്കുന്ന ശിശുഭവന് റോഡ് മാലിന്യത്താല് നിറഞ്ഞ് ദുര്ഗന്ധം വമിക്കുന്ന അവസ്ഥയിലാണ് ഉള്ളത്. പകല് സമയങ്ങളില് പോലും മല മൂത്ര വിസര്ജനം നടത്തുന്ന ഈ റോഡിലൂടെ ശിശുഭവനിലേക്ക് പോകുന്ന കുട്ടികള്ക്കും സ്ത്രീകള്ക്കും കാല്നട യാത്രപോലും സാധ്യമല്ല. ഇതിനൊന്നും പരിഹാരം കാണാന് കഴിയാത്ത പഞ്ചായത്ത് ഭരണാധികാരികള് മാലിന്യ കൂമ്പാരങ്ങള്ക്കിടയില് തന്നെ ഹരിതകേരളം പദ്ധതി ഉദ്ഘാടനം നടത്തിയതില് അതിശയോക്തി ഇല്ലെന്നാണ് ജനസം സാരം.
പദ്ധതിയോട് അനുബന്ധിച്ച് ബസ്സ്റ്റാന്റ് പരിസരത്തെ കുളം വൃത്തിയാക്കല് ഉദ്ഘാടനം ഡിവൈഎസ്പി മുഹമ്മദ് ഷാഫി നിര്വഹിച്ചു. കുടുംബശ്രീയുടെയും തൊഴിലുറപ്പ് പദ്ധതിയുടെയും സഹകരണത്തോട് കൂടിയാണ് കുളം വൃത്തിയാക്കുന്നത്. മീനങ്ങാടി പഞ്ചായത്ത് പ്രസിഡണ്ട് ബീന വിജയന് ബ്ലോക്ക് പഞ്ചായത്ത് പ്രസിഡണ്ട് ലത ശശി തുടങ്ങിയവര് പങ്കെടുത്തു.
