കണ്ണൂര്: മാലിന്യനിര്മാര്ജന-ജലസംരക്ഷണ-കൃഷിവ്യാപന പ്രവര്ത്തനങ്ങളിലൂടെ കേരളത്തെ ഹരിതാഭമാക്കാനുള്ള മഹത്തായ ദൗത്യത്തില് കണ്ണൂര് ജില്ലയും ഒറ്റക്കെട്ടായി ഇന്ന് പങ്കുചേരും. പുഴകളും കുളങ്ങളും വൃത്തിയാക്കിയും തെരുവോരങ്ങളിലെ മാലിന്യങ്ങള് നീക്കിയും തരിശുഭൂമിയില് കൃഷിയിറക്കിയും പ്ലാസ്റ്റിക് ഹര്ത്താലാചരിച്ചും ജില്ലയിലെ ആയിരത്തിലേറെ തദ്ദേശ സ്ഥാപന വാര്ഡുകളില് ഹരിതകേരള മിഷന്റെ ഉദ്ഘാടന ദിനമായ ഇന്ന് ആബാലവൃദ്ധം ജനങ്ങള് കര്മരംഗത്തിങ്ങും. മുഴുവന് സ്കൂളുകളിലും നടക്കുന്ന വിവിധ പ്രവര്ത്തനങ്ങളിലൂടെ ഇളം തലമുറയും ഇതില് പങ്കാളികളാവും.
ഹരിത കേരളം മിഷന്റെ ജില്ലാതല ഉദ്ഘാടനം പ്രസിദ്ധമായ ചിറക്കല് ചിറ ശുചീകരണത്തിലൂടെ നടക്കും. രാവിലെ എട്ടിന് ആരംഭിക്കുന്ന പരിപാടിയില് മന്ത്രിമാരായ കെ കെ ശൈലജടീച്ചര്, രാമചന്ദ്രന് കടന്നപ്പള്ളി, സാഹിത്യകാരന് ടി പത്മനാഭന്, ചിറക്കല് രാജ സി കെ രവീന്ദ്രവര്മ, മുന്മുഖ്യമന്ത്രി ഇ.കെ നായനാരുടെ പത്നി ശാരദ ടീച്ചര്, തുടങ്ങിയ രാഷ്ട്രീയ, കലാ, സാഹിത്യ, സാംസ്കാരിക, കായിക, മാധ്യമ രംഗത്തെ പ്രമുഖര് സന്നിഹിതരാവും.
ചിത്രകാരന്മാരായ കെ കെ മാരാര്, എബി എന് ജോസഫ്, മാപ്പിളപ്പാട്ട് കലാകാരനും ഫോക്ലോര് അക്കാദമി വൈസ് ചെയര്മാനുമായ എരഞ്ഞോളി മൂസ, കായിക താരങ്ങളായ പി വി ധനേഷ്, കെ എം ഗ്രീഷ്മ, ഷിന്്റു ജോര്ജ് തുടങ്ങിയവരും എംപിമാര്, എംഎല്എമാര്, ഐ.ജി ദിനേന്ദ്ര കശ്യപ്, എസ്.പി സഞ്ജയ് കുമാര് ഗുരുഡിന് എന്നിവരും പരിപാടിയില് സംബന്ധിക്കും. എന്എസ്എസ് വളണ്ടിയര്മാര്, എന്സിസി കേഡറ്റുമാര്, തൊഴിലുറപ്പ് തൊഴിലാളികള്, കുടുംബശ്രീ പ്രവര്ത്തകര് എന്നിങ്ങനെ സമൂഹത്തിന്റെ നാനാ രംഗങ്ങളിലുള്ളവരും ഹരിതകേരളം മിഷനില് ഒന്നിച്ച് അണിനിരക്കും. ജില്ലാ പഞ്ചായത്ത്, ചിറക്കല് ഗ്രാമ പഞ്ചായത്ത്, ജില്ലാ ഭരണകൂടം എന്നിവ കൈകോര്ത്താണ് ചിറ നവീകരണത്തിനായുള്ള പ്രവര്ത്തനങ്ങള് ഏകോപിപ്പിക്കുന്നത്.
തലശ്ശേരി മൂഴിക്കര വണ്ണത്താന്കുളം നവീകരണം രാവിലെ 8.30ന് സാഹിത്യകാരന് എം മുകുന്ദന് ഉദ്ഘാടനം ചെയ്യും. ഹരിതകേരള മിഷന് പ്രചാരണത്തിന്റെ ഭാഗമായി ജില്ലയുടെ വിവിധ ഭാഗങ്ങളില് വിളംബര ജാഥകള് നടന്നു. മിഷന് പ്രവര്ത്തനങ്ങളുടെ ഭാഗമായി സംഘടിപ്പിക്കുന്ന സ്വാപ് ഷോപ്പുകളിലേക്കുള്ള ഇലക്ട്രോണിക് സാധനങ്ങള്, തുണി ത്തരങ്ങള് തുടങ്ങിയവയുടെ ശേഖരണവും പലയിടളിലും ആരംഭിച്ചു. മിഷന് ഉദ്ഘാടന പരിപാടികള് ജനകീയ പങ്കാളിത്തത്തോടെ വന്വിജയമാക്കുന്നതിന് വിപുലമായ ഒരുക്കങ്ങളാണ് തദ്ദേശ സ്ഥാപനങ്ങളുടെ നേതൃത്വത്തില് നടത്തിയിരിക്കുന്നത്.
ജില്ലാ പഞ്ചായത്ത് പ്രസിഡണ്ട് കെ വി സുമേഷ് ചെയര്മാനും ജില്ലാ കലക്ടര് മിര് മുഹമ്മദലി സെക്രട്ടറിയുമായ ജില്ലാ മിഷനാണ് പ്രവര്ത്തനങ്ങള്ക്ക് നേതൃത്വം നല്കുന്നത്.
