കണ്ണൂര്: മണ്ണിന്റെയും മനസ്സിന്റെയും ആരോഗ്യസംരക്ഷണത്തിലൂടെ മാത്രമേ സുസ്ഥിര വികസനമെന്ന സങ്കല്പ്പം യാഥാര്ഥ്യമാവൂ എന്ന് ജില്ലാ പഞ്ചായത്ത് പ്രസിഡന്റ് കെ.വി സുമേഷ് അഭിപ്രായപ്പെട്ടു. ലോക മണ്ണ് ദിനത്തോടനുബന്ധിച്ച് സുസ്ഥിര ഉല്പ്പാദനം മണ്ണിന്റെ ആരോഗ്യ പരിപാലനത്തിലൂടെ എന്ന വിഷയത്തില് സംഘടിപ്പിച്ച ജില്ലാതല കര്ഷക പരിശീലനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സമൂഹത്തിന്റെ സ്വാര്ഥ ചിന്ത ഇന്ന് മണ്ണിനെയും മനസ്സിനെയും നശിപ്പിച്ചിരിക്കുന്നു. തത്വദീക്ഷയില്ലാത്ത പ്രകൃതി ചൂഷണത്തിനും നശീകരണത്തിനുമുള്ള അടിസ്ഥാന കാരണം ലോകത്തെ തന്നിലേക്ക് ചുരുക്കിയവന്റെ ഇടുങ്ങിയ മനസ്സാണ്. മണ്ണിനും മനസ്സിനും നഷ്ടമായ ആരോഗ്യം വീണ്ടുകിട്ടുമ്പോള് മാത്രമേ വികസനം അര്ഥവത്താകൂ എന്നും അദ്ദേഹം പറഞ്ഞു.
യാത്രി നിവാസില് നടന്ന ചടങ്ങില് പ്രിന്സിപ്പല് കൃഷി ഓഫീസര് ഓമന കെ അധ്യക്ഷത വഹിച്ചു. ആത്മ പ്രൊജക്ട് ഡയരക്ടര് വല്സമ്മ എം.പി പദ്ധതി വിശദീകരിച്ചു. ശില്പശാലയുടെ ഭാഗമായി നടന്ന പ്രദര്ശനം ജില്ലാ പഞ്ചായത്ത് വികസന സ്റ്റാന്റിംഗ് കമ്മിറ്റി ചെയര്മാന് വി.കെ സുരേഷ്ബാബു ഉദ്ഘാടനം ചെയ്തു. കണ്ണൂര് കാര്ഷിക വികസന കേന്ദ്രം മേധാവി ഡോ ജയരാജ് പി വിഷയാവതരണം നടത്തി. മൊബൈല് മണ്ണ് പരിശോധന കേന്ദ്രം കൃഷി ഓഫീസര് സി.വി ജിദേഷ്, അസി. സോയില് കെമിസ്റ്റ് വിനോദ്കുമാര് വി.പി, അശ്വിന് തുടങ്ങിയവര് സംസാരിച്ചു.
