അമ്പലപ്പുഴ: മാര്ഗ്ഗി സതി അനുസ്മരണവും ഭക്തമീര ചരിതം നങ്യാര്കൂത്ത് അവതരണവും അമ്പലപ്പുഴ നാടകശാലയില് നടക്കും. വ്യാഴാഴ്ച വൈകിട്ട് 5.30ന് സതിയുടെ മകള് കൂടിയായ രേവതി സുബ്രഹ്മണ്യന് ക്ഷേത്രത്തിലെ നാടകശാലയില് നങ്യാര് കൂത്ത് അവതരിപ്പിക്കുന്നത്. മുന്കാലങ്ങളില് അഷ്ടമിരോഹിണി നാളില് നാടകശാലയില് ശ്രീകൃഷ്ണാവതാരം നങ്യാര്കൂത്ത് നടത്തിവന്നിരുന്നത് മാര്ഗ്ഗി സതിയുടെ നേതൃത്വത്തിലായിരുന്നു.
ശ്രീകൃഷ്ണാവതാരവും സീതായനവും കണ്ണകിയും നങ്യാര്കൂത്തിലൂടെ അവതരിപ്പിച്ചിട്ടുള്ള മാര്ഗ്ഗിസതിയുടെ ആഗ്രഹമായിരുന്നു ഭഗവാനെ ഏറ്റവും കൂടുതല് സ്നേഹിച്ചിരുന്ന ഭക്തമീരയുടെ കഥ അവതരിപ്പിക്കുക എന്നത്. എന്നാല് ആഗ്രഹം പൂര്ത്തീകരിക്കാതെ സതി വിടപറയുകയായിരുന്നു. ഇതേത്തുടര്ന്നാണ് മകള് രേവതി സുബ്രഹ്മണ്യന് അമ്മയുടെ ആഗ്രഹം നിറവേറ്റാന് തീരുമാനിച്ചത്. നങ്യാര്കൂത്തിനൊപ്പം നടക്കുന്ന മാര്ഗ്ഗി സതി അനുസ്മരണം കേരള കലാമണ്ഡലം രജിസ്ട്രാര് ഡോ. കെ. സുന്ദരേശന് ഉദ്ഘാടനം ചെയ്യും.
ഡോ. അമ്പലപ്പുഴ ഗോപകുമാര് അദ്ധ്യക്ഷത വഹിക്കും. സന്ദര്ശന് കഥകളി വിദ്യാലയം പ്രസിഡന്റ് ഡോ. പി. വേണുഗോപാലന് അനുസ്മരണ പ്രഭാഷണം നടത്തും.
