മടിക്കൈ: ജനാധിപത്യരീതിയില് തെരഞ്ഞെടുക്കപ്പെട്ട ജനപ്രതിനിധികളെ കൊന്നുകൊണ്ടാണ് 1917ല് റഷ്യയില് സിപിഎം ഭരണം പിടിച്ചെടുത്തതെന്നും, അന്ന് തുടങ്ങിയ അക്രമപരമ്പര ഇന്നും സിപിഎം പിന്തുടരുകയാണെന്നും ആര്എസ്എസ് കണ്ണൂര് വിഭാഗ് കാര്യകാരി സദസ്യന് കെ. സജീവന് പറഞ്ഞു.
സിപിഎം അക്രമത്തെ തുറന്നുകാട്ടാന് വേണ്ടി മാര്ക്സിസ്റ്റ് അക്രമവിരുദ്ധ ജനകീയ സമിതി മടിക്കൈ അമ്പലത്തുകരില് സംഘടിപ്പിച്ച് വിശദീകരണ യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മൂന്നര വര്ഷം ഒരു അക്രമ സംഭവവും ഇല്ലാതിരുന്ന കണ്ണൂരില് പയ്യന്നൂരിലെ വിനോദിനെ കൊലപ്പെടുത്തി വീണ്ടും അക്രമത്തിന് സിപിഎം തുടക്കം കുറിച്ചു. തുടര്ന്ന് തലശ്ശേരിയിലെ സുരേഷ്ബാബു, കതിരൂരിലെ മനോജ്, പയ്യന്നൂരിലെ രാമചന്ദ്രന്, പിണറായിയിലെ രമിത്ത് എന്നിവരും സിപിഎമ്മിന്റെ കൊലക്കത്തിക്കിരയായി. സിപിഎമ്മിനു മുന്നില് മുട്ടുമടക്കാന് തയ്യാറാകാത്തതുകൊണ്ടാണ് ആര്എസ്എസിനെ തകര്ക്കാന് സിപിഎം കൊലപാതക പരമ്പര തുടരുന്നത്. കണ്ണൂരില് ഇനി ഒരമ്മയുടെയും കണ്ണുനീര് വീഴാന് പാടില്ലെന്നും അദ്ദേഹം പറഞ്ഞു.
നരേന്ദ്രമോദി സര്ക്കാര് ചരിത്രപരമായ തീരുമാനം എടുത്തപ്പോള് കള്ളപ്പണക്കാരെ സംരക്ഷിക്കാന് സിപിഎം രാപ്പകല് സമരം നടത്തുകയാണെന്നും. സിപിഎം നേതാക്കള് ഇപ്പോള് കൊലപാതകം, പീഡനം, കൂട്ടമാനഭംഗം, തട്ടിക്കൊണ്ടുപോകല്, പിടിച്ചുപറി തുടങ്ങിയ പ്രവര്ത്തനങ്ങളിലൂടെ കുപ്രസിദ്ധിയാര്ജ്ജിക്കുകയാണെന്നും ചടങ്ങില് മുഖ്യപ്രഭാഷണം നടത്തിയ ബിജെപി ജില്ലാ ജനറല് സെക്രട്ടറി എ.വേലായുധന് പറഞ്ഞു.
ബിഎംഎസ് മേഖലാ സെക്രട്ടറി ഗോവിന്ദന് മടിക്കൈ അധ്യക്ഷത വഹിച്ചു. ആര്എസ്എസ് കാഞ്ഞങ്ങാട് മണ്ഡലം സഹകാര്യവാഹ് എ.കൃഷ്ണന്, ബിഎംഎസ് മേഖലാ ട്രഷറര് കെ.ഭാസ്കരന്, പഞ്ചായത്തംഗം ബിജിബാബു തുടങ്ങിയവര് സംബന്ധിച്ചു. ബിജെപി മണ്ഡലം ജനറല് സെക്രട്ടറി അശോകന് മേലത്ത് സ്വാഗതവും, ക്ഷേത്ര സംരക്ഷണ സമിതി ജില്ലാ സെക്രട്ടറി ടി.രമേശന് നന്ദിയും പറഞ്ഞു.
