പാലാ: ടൗണ് സ്റ്റാന്റിനു സമീപം റോഡിലെയും നടപ്പാതയിലെയും കുഴികള് അപകടഭീഷണി ഉയര്ത്തുന്നു. വണ്വേ സംവിധാനമുള്ള പ്രധാന റോഡില് നിന്നും റിവര്വ്യൂ റോഡില് കുഴി രൂപപ്പെട്ടിട്ട് ആഴ്ചകളായെങ്കിലും നികത്താനുള്ള നടപടികള് അധികൃതര് സ്വീകരിച്ചിട്ടില്ല.
ഭാരവാഹനങ്ങള് പോകുന്നതാണ് റോഡ് തകരാന് കാരണമെന്ന് നാട്ടുകാര് പറയുന്നു. കുഴിയിലേക്ക് ഏതാനും കല്ലുകളിട്ട് അപകടസൂചനാ ബോര്ഡുകള് സ്ഥാപിക്കുക മാത്രമാണ് അധികൃതര് ചെയ്തിരിക്കുന്നത്. ഈ ബോര്ഡ് ഇപ്പോള് നിലത്തുവീണ് കിടക്കുകയാണ്.
പ്രധാന റോഡിനും റിവര്വ്യൂ റോഡിനും ഇടയ്ക്കുള്ള ചെറിയ റോഡുകള് സംരക്ഷിക്കേണ്ടത് അത്യാവശ്യമാണ്. നിലവില് കുഴി രൂപപ്പെട്ട റോഡിലൂടെ വാഹനങ്ങള് വളരെ ബുദ്ധിമുട്ടിയാണ് കടന്നുപോകുന്നത്. ഈ ഭാഗത്ത് ഗതാഗതക്കുരുക്കും പതിവാണ്. റോഡ് നിര്മ്മാണത്തിലെ അപാകതയാണ് വന്കുഴികള്ക്ക് കാരണമെന്ന് ആരോപണമുണ്ട്. ടൗണിലെ ഓടകളില് നിന്നുള്ള വെള്ളം ഒഴുകിയെത്തുന്ന പൈപ്പ് ഈ റോഡിനടിയിലാണ്.
കുട്ടികളും സ്ത്രീകളുമടക്കം നൂറുകണക്കിനാളുകള് ഉപയോഗിക്കുന്ന നടപ്പാതിയില് കുഴി രൂപപ്പെട്ടിട്ടു ദിവസങ്ങളായി. ഇവിടെ ചുവപ്പുതുണി കമ്പിയില് കെട്ടി നിര്ത്തിയാണ് കുഴിയുണ്ടെന്ന് മുന്നറിയിപ്പ് നല്കുന്നത്. കുഴിയടക്കാന് അധികൃതര് നടപടി സ്വീകരിക്കുന്നില്ലെന്ന ആക്ഷേപം ശക്തമാണ്. റോഡിലേയും നടപ്പാതയിലെയും കുഴി അടിയന്തരമായി അടയ്ക്കണമെന്ന ആവശ്യം ശക്തമായിട്ടുണ്ട്.
