ചെറുതോണി: അവിചാരിതമായി ദുരന്ത വാര്ത്തയെത്തിയപ്പോള് തങ്കമണി ഗ്രാമം ഞെട്ടിത്തരിച്ചുപോയി…. ഇന്നലെ വൈകിട്ട് അഞ്ച് മണിയോടെയാണ് അപകടത്തില് മരണമടഞ്ഞ വാഴയില് ഷൈനിന്റെ ഫോണ് കോളെത്തിയത്…. പക്ഷേ ആ ഫോണില് സംസാരിച്ചത് ഷൈനായിരുന്നില്ല…. അപകട സ്ഥലത്തുനിന്നും കിട്ടിയ ഷൈനിന്റെ ഫോണെടുത്ത് ഒരു തമിഴ്നാട്ടുകാരനാണ് ദുരന്തവാര്ത്ത തങ്കമണിക്കാരെ അറിയിച്ചത്. ഉടന് തന്നെ തങ്കമണിയില് നിന്നും വേളാങ്കണ്ണി തീര്ത്ഥ യാത്രയ്ക്ക് പോയവരുടെ ഫോണിലേക്ക് വിളിച്ചെങ്കിലും എല്ലാ ഫോണുകളും നിശ്ചലമായിരുന്നു. പിന്നീട് ദേവതാരുപെട്ടി പോലീസിലേക്ക് നാട്ടുകാര് വിളിച്ചു. അപ്പോഴാണ് അപകടത്തില് തങ്ങളുടെ പ്രിയപ്പെട്ട ഏഴ് പേര് മരണപ്പെട്ടതായി നാട്ടുകാര് അറിയുന്നത്. ഉടന് തന്നെ പതിനഞ്ചോളം വാഹനങ്ങളില് തങ്കമണിക്കാര് തേനിയിലേക്ക് പോയി. ഇടുക്കി തങ്കമണി വാഴയില് ഷൈന്, മുള്ളാനിക്കല് ബേബി (60), വെട്ടുകാട്ടില് അജീഷ് (32), പടലാംകുന്നേല് മോന്സി (35), വെണ്മണി ഇളംതുരുത്തിയില് ജസ്റ്റിന്(30) കരിപ്പാപറമ്പില് ബിനു (33) എന്നിവരാണ് മരിച്ചത്. തേനിക്ക് സമീപം പെരിയകുളം വട്ടലഗുണ്ട് എന്ന സ്ഥലത്താണ് അപകടമുണ്ടായത്. ഗുരുതരമായി പരിക്കേറ്റ തങ്കമണി പേരുംകവല ഷൈന് (38)നെ തേനി സര്ക്കാര് ആശുപത്രിയില് പ്രവേശിപ്പിച്ചിരിക്കുകയാണ്. മൃതദേഹങ്ങള് തേനി ഗവ. ആശുപത്രിയിലെ മോര്ച്ചറിയിലേക്ക് മാറ്റി. അപകടത്തില് മരിച്ച ബേബിയാണ് വാഹനം ഓടിച്ചിരുന്നത്. മരിച്ച വാഴയില് ഷൈന്റേതായിരുന്നു ട്രാവലര്. ഇദ്ദേഹം ടൈല് കോണ്ട്രാക്ട് ജോലി നടത്തിവരുകയായിരുന്നു. ഇയാളുടെ ജോലിക്കാരാണ് മരണമടഞ്ഞത്. വാഹനങ്ങള് നേര്ക്കുനേര് കൂട്ടിയിടിച്ചാണ് അപകടം നടന്നത്. വാഹനത്തില് ഏഴ് പേരാണുണ്ടായിരുന്നത്. മൃതദേഹങ്ങള് ഇന്ന് പോസ്റ്റുമോര്ട്ടം നടപടികള് പൂര്ത്തിയാക്കി ഉച്ചയോടെ നാട്ടിലെത്തിക്കാനാണ്്
ശ്രമിക്കുന്നത്. ജില്ല പോലീസ് നേതൃത്വം തമിഴ്നാട് പോലീസുമായി ബന്ധപ്പെട്ട് നടപടികള് നീക്കുന്നുണ്ട്.
