കൊച്ചി: ലോക ജനസംഖ്യ ദിനാചരണത്തോടനുബന്ധിച്ച് 11 മുതല് 24 വരെയുള്ള തീയതികളില് സംഘടിപ്പിക്കുന്ന ദേശീയ ജനസംഖ്യ പക്ഷാചരണത്തിന്റെ ജില്ലയില് തുടക്കമായി. തേവര സേക്രഡ് ഹാര്ട്ട് ഹയര് സെക്കന്ററി സ്കൂളില് പ്രൊഫ കെ.വി. തോമസ് എംപി ഉദ്ഘാടനം ചെയ്തു.
11 മുതല് 24 വരെയുള്ള കാലയളവില് രാജ്യവ്യാപകമായി ആചരിക്കുന്ന ഊര്ജിത വയറിളക്കരോഗ നിയന്ത്രണ പക്ഷാചരണത്തിന്റെ ഉദ്ഘാടനം നഗരസഭാ ആരോഗ്യകാര്യ സ്ഥിരംസമിതി അദ്ധ്യക്ഷ അഡ്വ. വി.കെ. മിനിമോള് നിര്വഹിച്ചു. നഗരസഭ കൗണ്സിലര് സി.കെ. പീറ്റര് ചടങ്ങില് അദ്ധ്യക്ഷത വഹിച്ചു.
ജില്ലാ മെഡിക്കല് ഓഫീസര് ഡോ. എന്.കെ. കുട്ടപ്പന്, ആരോഗ്യകേരളം ജില്ലാ പ്രോഗ്രാം മാനേജര് ഡോ. ഹസീന മുഹമ്മദ്, നഗരസഭ കൗണ്സിലര് എലിസബത്ത് ടീച്ചര്, സ്കൂള് പ്രിന്സിപ്പല് ടോമി അന്ത്രപ്പേര്, എന്.എസ്.എസ്. പ്രോഗ്രാം ഓഫീസര് ഫാദര് ടി.വി.തോംസണ് എന്നിവര് സംസാരിച്ചു. തുടര്ന്ന് നടത്തിയ സെമിനാറില് എറണാകുളം ജനറല് ആശുപത്രി സൂപ്രണ്ട് ഡോ. സി.എസ് ഡാലിയ, ജില്ലാ ആര്. സി. എച്ച് ഓഫീസര് ഡോ. ആര്. ശാന്തകുമാരി എന്നിവര് വിഷയാവതരണം നടത്തി. ജില്ലാ മാസ് മീഡിയ ഓഫീസര് സഗീര് സുധീന്ദ്രന് കൃതജ്ഞത പ്രകാശിപ്പിച്ചു.
ജില്ലാ മെഡിക്കല് ഓഫീസിന്റെയും, ദേശീയ ആരോഗ്യ ദൗത്യത്തിന്റെയും എസ്.എച്. ഹയര് സെക്കണ്ടറി സ്കൂള് എന്.എസ്.എസ്. യൂണിറ്റിന്റെയും ആഭിമുഖ്യത്തിലാണ് പരിപാടികള് സംഘടിപ്പിച്ചത്.
ജനസംഖ്യ പക്ഷാചരണത്തിന്റെ ഭാഗമായി തൃപ്പൂണിത്തുറ, പറവൂര്, മൂവാറ്റുപുഴ എന്നിവിടങ്ങളില് കുടുംബാരോഗ്യ മേളകളും സംഘടിപ്പിച്ചിട്ടുണ്ട്. ജില്ലയിലെ വിവിധ ബ്ലോക്ക്, പ്രാഥമിക ആരോഗ്യ കേന്ദ്രങ്ങളിലും പക്ഷാചരണത്തിന്റെ ഭാഗമായി ബോധവല്ക്കരണ ക്ലാസ്സുകളും സെമിനാറുകളും സംഘടിപ്പിച്ചിട്ടുണ്ട്.
