ഹരിപ്പാട്: നഗരത്തിലെ ഗതാഗതക്കുരുക്കിനും മാലിന്യ നിര്മ്മാര്ജ്ജനത്തിനും ശാശ്വതമായ പരിഹാരം കാണണമെന്നാവശ്യപ്പെട്ട് ബി.ജെ.പി. ഹരിപ്പാട് നഗരസഭ കമ്മറ്റിയുടെ നേതൃത്വത്തില് നഗരസഭയിലേക്ക് മാര്ച്ച് നടത്തി.
അനധികൃത കുടിയേറ്റക്കാരെ ഒഴിപ്പിച്ച് വഴിയോരക്കച്ചവടക്കാരെ പുനരധിവസിപ്പിക്കണമെന്ന് മാര്ച്ച് ഉദ്ഘാടനം ചെയ്ത ജില്ലാ പ്രസിഡന്റ് കെ. സോമന് ആവശ്യപ്പെട്ടു. കുടിയൊഴിപ്പിക്കലുമായി ബന്ധപ്പെട്ട് ദളിത് സ്ത്രീയെ പീഡിപ്പിക്കാന് ശ്രമിച്ചുവെന്ന് നഗരസഭ വൈസ്ചെയര്മാന്റെ പേരില് ആരോപണമുന്നയിച്ച സിപിഎം നഗരസഭയില് എത്തുമ്പോള് കോണ്ഗ്രസ്സിന് വോട്ട് രേഖപ്പെടുത്തുന്ന ഇരട്ടത്താപ്പ് നയമാണ് സ്വീകരിക്കുന്നതെന്നും അദ്ദേഹം പറഞ്ഞു.
പുതിയ നഗരസഭ ഭരണസമിതി അധികാരം ഏറ്റെടുത്തുതിനുശേഷം നടന്നിട്ടുള്ള എല്ലാ അഴിമതിയ്ക്കും കോണ്ഗ്രസ്സിന് ഒത്താശ ചെയ്തുകൊടുക്കുന്ന നടപടിയാണ് സി.പി.എം. സ്വീകരിക്കുന്നതെന്ന് യോഗത്തില് സംസാരിച്ച ബിജെപി ജില്ലാ സെക്രട്ടറി ജി. ജയദേവ് പറഞ്ഞു.
നഗരസഭ പ്രസിഡന്റ് രാജേഷ് അദ്ധ്യക്ഷത വഹിച്ചു. നിയോജകമണ്ഡലം പ്രസിഡന്റ് കെ.എസ്. വിനോദ്, ജനറല് സെക്രട്ടറി പ്രണവം ശ്രീകുമാര്, വൈസ് പ്രസിഡന്റ് ശ്രീനിവാസന്, വിശ്വനാഥ്, ഗീത എസ്.പിള്ള, കര്ഷകമോര്ച്ച ജില്ലാ സെക്രട്ടറി റ്റി. മുരളി, മഹിള മോര്ച്ച ജില്ലാ സെക്രട്ടറി ശാന്തകുമാരി, യുവമോര്ച്ച ജില്ലാ വൈസ് പ്രസിഡന്റ് എച്ച്. ഹര്ഷകുമാര്, ശിവദാസന്, രതീഷ്, രജിത്ത്, അനൂപ്, രാധാകൃഷ്ണന്, രോഹിത്ത്, ഉണ്ണിക്കൃഷ്ണന് എന്നിവര് സംസാരിച്ചു.
