ചമ്പക്കുളം പാലംപണി പുനരാരംഭിച്ചു

മങ്കൊമ്പ്: മുടങ്ങിക്കിടന്ന ചമ്പക്കുളം പാലത്തിന്റെ പണികള്‍ പുനരാരംഭിച്ചു. ഒരു വര്‍ഷക്കാലമായി മുടങ്ങിക്കിടന്ന നിര്‍മാണപ്രവര്‍ത്തനങ്ങള്‍ കഴിഞ്ഞദിവസമാണ് പുനരാരംഭിച്ചത്. നിര്‍മാണത്തിനാവശ്യമായ കമ്പികളും മറ്റും ഇറക്കി പണികള്‍ തുടങ്ങുന്നതിനാവശ്യമായ വൃത്തിയാക്കലുകളാണിപ്പോള്‍ നടക്കുന്നത്. ഏതാണ്ട് മുക്കാല്‍ഭാഗം പണികളും പൂര്‍ത്തിയായ പാലത്തിന്റെ ഒരു സ്പാനും ഇരുകരകളിലെയും അപ്രോച്ചിന്റെ പണികളുമാണ് അവശേഷിക്കുന്നത്. കരാര്‍ നഷ്ടത്തിലായതിനെ തുടര്‍ന്ന് കരാറുകാരന് പണികള്‍ പൂര്‍ത്തിയാക്കാനാകാതെ വരികയും നിര്‍മാണം മുടങ്ങുകയുമായിരുന്നു. 2010ല്‍ 12.5 കോടി രൂപയാണ് സര്‍ക്കാര്‍ പാലത്തിന്റെ നിര്‍മാണത്തിനായി അനുവദിച്ചത്. എന്നാല്‍ ഒരു കോടി രൂപ കുറച്ച് 11.5 കോടി രൂപയ്‌ക്ക് കരാറുകാരന്‍ നിര്‍മാണച്ചുമതലയേല്‍ക്കുകയായിരുന്നു. 2010 മാര്‍ച്ച 12 ന് പാലത്തിന്റെ നിര്‍മാണോദ്ഘാടനം നടന്നു. രണ്ടുവര്‍ഷം കൊണ്ട് പണികള്‍ പൂര്‍ത്തിയാക്കണമെന്നായിരുന്നു കരാറിലെ വ്യവസ്ഥ. ആദ്യഘട്ടത്തില്‍ നല്ലരീതിയില്‍ നടന്ന പണികള്‍ അവസാനഘട്ടത്തില്‍ മുടങ്ങുകയായിരുന്നു.