കുമളി: സാധാരണ ജനങ്ങളെ വാഗ്ദാനങ്ങള് നല്കി വഞ്ചിക്കുന്ന കാര്യത്തില് കോണ്ഗ്രസും കമ്മ്യൂണിസ്റ്റ് പാര്ട്ടികളും തമ്മില് പരസ്പര ധാരണയിലാണെന്ന് ബി ഡി ജെ എസ് ജില്ലാ പ്രസിഡന്റ് പി രാജന് പറഞ്ഞു. വണ്ടിപെരിയാറില് എന് ഡി എ പീരുമേട് നിയോജകമണ്ഡലം തെരഞ്ഞെടുപ്പ് കണ്വെന്ഷന് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
പാവപ്പെട്ട തൊഴിലാളികളുടെ ദയനീയ ജീവിത സാഹചര്യങ്ങള് കണ്ടില്ലെന്ന് നടിച്ചുകൊണ്ട് ഭൂമാഫിയകള്ക്ക് സര്ക്കാര് ഭൂമിയുള്പ്പെടെ തീറെഴുതി കൊടുക്കാന് ഉമ്മന്ചാണ്ടി സര്ക്കാര് അതീവതാല്പര്യം കാണിച്ചപ്പോള് അവരോടൊപ്പം നിന്ന തൊഴിലാളി പാര്ട്ടിയുടെ മണ്ഡലത്തിലെ ജനപ്രധിനിധി ഇപ്പോള് തൊഴിലാളികള്ക്ക് വേണ്ടി മുതലക്കണ്ണീര് ഒഴുക്കുന്നത് പൊതുജനം തിരിച്ചറിയണമെന്നും അദ്ദേഹം സമ്മേളനത്തില് പറഞ്ഞു. സി പി എമ്മിന്റെ അക്രമ രാഷ്ട്രീയത്തിനു ഭരണ കക്ഷി വേണ്ട ഒത്താശ ചെയ്യുമ്പോള് പകരം ഉമ്മന്ചാണ്ടി സര്ക്കാര് നടത്തുന്ന അഴിമതി സി പി എം കണ്ടില്ലെന്നു നടിക്കുകയാണെന്ന് സമ്മേളനത്തില് പങ്കെടുത്ത ബി ജെ പി ജില്ലാ പ്രസിഡന്റ് ബിനു ജെ കൈമള് പറഞ്ഞു. പാര്ട്ടി നിയോജകമണ്ഡലം പ്രസിഡന്റ് സി സന്തോഷ് കുമാറിന്റെ അദ്ധ്യക്ഷതയില് ചേര്ന്ന കണ്വെന്ഷനില് പീരുമേട് മണ്ഡലത്തിലെ തൊഴിലാളികള് ഉള്പെടെയുള്ള നൂറുകണക്കിന് പ്രവര്ത്തകര് പങ്കെടുത്തു. സ്ഥാനാര്ത്ഥി കെ കുമാര്, എന് ഡി എ ഘടക കക്ഷി നേതാകളായ ബാബു കുര്യന്, ബെന്നി പെരുമ്പള്ളി, തുടങ്ങിയവരും സംസാരിച്ചു.
ബി ജെ പിയുടെയും, ബിഡിജെഎസിന്റെയും പഞ്ചായത്തു കമ്മറ്റികളുടെ മുഴുവന് ഭാരവാഹികളും പങ്കെടുത്തു.കണ്വെന്ഷനുകളിലെ ജനസാന്നിധ്യം മുന്നണികളെ ഞെട്ടിച്ചിരിക്കുകയാണ്.
