കോട്ടയം: ശിവഗിരി മഠത്തിന് കീഴില്‍ വിരിപ്പുകാലായില്‍ രൂപംകൊള്ളുന്ന ശ്രീനാരായണ അന്തര്‍ദേശീയ യോഗാ സെന്ററിനും ഗവേഷണ കേന്ദ്രത്തിനും വേണ്ടിയുള്ള സ്ഥലത്തിന്റെ പ്രമാണം ഇന്ന് ശ്രീനാരായണ ചാരിറ്റബിള്‍ സൊസൈറ്റിക്കുവേണ്ടി ചെയര്‍മാന്‍ സദാനന്ദന്‍ വിരിപ്പുകാലാ ശിവഗിരി ശ്രീനാരായണ ധര്‍മ്മസംഘം ട്രസ്റ്റ് പ്രസിഡന്റ് സ്വാമി പ്രകാശാനന്ദക്കു കൈമാറും. 11ന് സൊസൈറ്റി ആസ്ഥാനമായ അഡ്വ.പുഷ്‌ക്കരന്‍ ആറ്റുചിറ നഗറിലാണ് സമ്മേളനവേദി. ചടങ്ങുകളുടെ മുന്നോടിയായി രാവിലെ ഏഴരയ്‌ക്ക് ഗുരുദേവന്‍ പ്രതിഷ്ഠാ കര്‍മ്മം നിര്‍വ്വഹിച്ച ശ്രീകുമാരമംഗലം ക്ഷേത്രത്തില്‍ ഗുരുകാണിക്ക സമര്‍പ്പണത്തെത്തുടര്‍ന്ന് 8.30ന് ശ്രീനാരായണ കേന്ദ്രം ചെയര്‍മാന്‍ കെ.കെ.സരളപ്പന്‍ പതാക ഉയര്‍ത്തും. 9ന് പ്രാര്‍ത്ഥനാസദസ്സിന് കേന്ദ്രം സെക്രട്ടറി സി.കെ.വിശ്വന്‍ ദീപം തെളിക്കും. 10.15ന് ശ്രീകുമാരമംഗലം ക്ഷേത്രത്തില്‍ നിന്നും ശിവഗിരിമഠത്തിലെ ഭാരവാഹികളെ വാഹനങ്ങലുടെ അകമ്പടിയോടെ വിരിപ്പുകാല ശ്രീശക്തീശ്വരം ക്ഷേത്രത്തിലേക്കാനയിച്ച് അവിടെനിന്നും ഘോഷയാത്രയായി സമ്മേളനവേദിയിലെത്തും. 11ന് പ്രകാശാനന്ദസ്വാമിയുടെ അദ്ധ്യക്ഷതയില്‍ ധര്‍മ്മസംഘം ട്രസ്റ്റ് ജനറല്‍ സെക്രട്ടറി സ്വാമി ഋതംഭരാനന്ദ സമ്മേളനം ഉദ്ഘാടനം ചെയ്യും. ട്രഷറര്‍ സ്വാമി പരാനന്ദ അനുഗ്രഹപ്രഭാഷണം നടത്തും. ഗുരുധര്‍മ്മ പ്രചരണ സഭാ സെക്രട്ടറി സ്വാമി ഗുരുപ്രസാദ് മുഖ്യപ്രഭാഷണം നടത്തും. പ്രമാണ സമര്‍പ്പണത്തെത്തുടര്‍ന്ന് ചാരിറ്റബിള്‍ സൊസൈറ്റി ഭാരവാഹികളെ ശിവഗിരിമഠം ഭാരവാഹികള്‍ ആദരിക്കും. എം.കെ.പൊന്നപ്പന്‍ പുഷ്‌ക്കരന്‍ ആറ്റുചിറ അനുസ്മരണം നടത്തും. ടി.കെ.ലാല്‍ ജ്യോത്സ്യര്‍, കുറിച്ചി സദന്‍ കൈപ്പുസ്തകം പ്രകാശനം ചെയ്യും. ശ്രീനാരായണ കേന്ദ്രം മേഖലയ്‌ക്ക് ശ്രീനാരായണ നഗര്‍ എന്ന നാമകരണം ചെയ്യണമെന്ന നിവേദനം ഗ്രാമപഞ്ചായത്ത് പ്രസിഡന്റിന് വേണ്ടി വാര്‍ഡംഗം മിനി ബിജുവിന് ചെയര്‍മാന്‍ കെ.കെ.സരളപ്പന്‍ നല്‍കും.
ഫൈനാന്‍സ് കമ്മിറ്റി ചെയര്‍മാന്‍ കെ.എന്‍.ബാബു തുടര്‍പ്രവര്‍ത്തന ഫണ്ട് സ്വീകരിക്കും. അമയന്നൂര്‍ ഗോപി, വി.ടി.ശശീന്ദ്രന്‍, കെ.എന്‍.. ബാല്‍, അഡ്വ.വി.പി.അശോകന്‍, ഇ.എം.സോമനാഥന്‍, ഷിബു മൂലേടം എന്നിവര്‍ പ്രസംഗിക്കും. കെ.വി.വിശ്വനാഥന്‍ കുന്നത്തുകളത്തില്‍ രക്ഷാധികാരിയായി സ്വാഗതസംഘം രൂപീകരിച്ച് പ്രവര്‍ത്തനമാരംഭിച്ചു.
