കോട്ടയം: ആവേശത്തിന്റെ അലയൊലി ഉയര്ത്തി ദേശീയ ജനാധിപത്യസഖ്യം ജില്ലാ നേതൃസംഗമം കോട്ടയത്ത് നടന്നു. സ്ത്രീകള് അടക്കമുള്ള നൂറുകണക്കിന് പ്രദേശിക നേതാക്കള് സമ്മേളനത്തില് അണിനിരന്നു.
അണികളുടെ അടങ്ങാത്ത ആവേശത്തില് മുദ്രാവാക്യത്തിന്റെ അകമ്പടിയോടയാണ് എന്ഡിഎ നേതാക്കളെ നിഷറഞ്ഞുകവിഞ്ഞ സമ്മേളന നഗരിയിലേക്ക് ആനയിച്ചത്. കോട്ടയം സുമംഗലി ആഡിറ്റോറിയത്തില് നടന്ന സമ്മേളനം കേന്ദ്ര ആരോഗ്യവകുപ്പ് മന്ത്രി ജെ.പി. നദ്ദ ഉദ്ഘാടനം ചെയ്തു. ബിജെപി ജില്ലാ പ്രസിഡന്റ് എന്. ഹരി അദ്ധ്യക്ഷത വഹിച്ചു. സംസ്ഥാന പ്രസിഡന്റ് കുമ്മനം രാജശേഖരന് മുഖ്യപ്രഭാഷണം നടത്തി.
മാറിമാറി കേരളം ഭരിച്ച ഇടതു-വലതു ഭരണത്തിന്കീഴില് കേരളം ദരിദ്രസംസ്ഥാനമായി മാറിയതായി അദ്ദേഹം പറഞ്ഞു. ഭക്ഷ്യ സുരക്ഷയില്ലാത്ത സംസ്ഥാനമായി കേരളം മാറി. 26ലക്ഷം ടണ് അരി ഉപഭോഗമുള്ള സംസ്ഥാനത്ത് 6ലക്ഷം ടണ് അരിമാത്രമാണ് ഉത്പാദിപ്പിക്കുന്നത്. ആകെ ഉപഭോഗത്തിന്റെ 13 ശതമാനം മാത്രമാണ് ഉത്പാദനം നടക്കുന്നത്. അഞ്ചുവര്ഷം മുമ്പ് അഞ്ചുവര്ഷം ഹെക്ടര് ഭൂമിയില് കൃഷിചെയ്തിരുന്നെങ്കില് വയലുകള് നികത്തിയതിലൂടെ ഇന്ന് 2ലക്ഷം ഹെക്ടര് നിലത്തുമാത്രമായി കൃഷി ഒതുങ്ങി. പരിസ്ഥിതിയെ തകര്ക്കുന്ന നടപടിയിലൂടെ കുടിവെള്ള ക്ഷാമവും ഭക്ഷ്യക്ഷാമവും കാലാവസ്ഥാ വ്യതിയാനവും സംസ്ഥാനത്ത് സംജാതമായി.
നാല്പത് നദികളും വറ്റിവരണ്ടു. നീതിന്യായ വ്യവസ്ഥകള് പാടേ തകര്ന്നു. നാല്പത്തിരണ്ട് പ്രധാന വ്യവസായ സ്ഥാപനങ്ങള്ക്ക് പൂട്ടുവീണു. ആദിവാസികള്ക്കുള്ള ക്ഷേമഫണ്ടുകള് കൊള്ളയടിക്കപ്പെട്ടു.
നീതിയുടെ നിലനില്പ്പിനായി ആദിവാസികള് നില്പ്പുസമരം നടത്തിയിട്ടും പ്രയോജനമുണ്ടായില്ല. ഇടത്തോട്ടും വലത്തോട്ടുമുള്ള മാറ്റമല്ല മുന്നോട്ടുള്ള മാറ്റമാണ് കേരളത്തിന് വേണ്ടത്.
ഇതിന് കേരളത്തിന്റെ രാഷ്ട്രീയ നവോത്ഥാന മണ്ഡലത്തില് എന്ഡിഎ സൂര്യതേജസ്സായി മാറിയിരിക്കുകയാണെന്നും അദ്ദേഹം പറഞ്ഞു. കേരള കോണ്ഗ്രസ്സ് സംസ്ഥാന പ്രസിഡന്റ് പി.സി. തോമസ്, സോഷ്യലിസ്റ്റ് കേരള കോണ്ഗ്രസ്സ് സംസ്ഥാന പ്രസിഡന്റ് വി.വി. രാജേന്ദ്രന്, പ്രജാ സോഷ്യലിസ്റ്റ് പാര്ട്ടി സംസ്ഥാന സെക്രട്ടറി കെ.കെ. പൊന്നപ്പന്. ബിജെപി മേഖലാ പ്രസിഡന്റ് അഡ്വ. നാരായണന് നമ്പൂതിരി, ബിഡിജെഎസ് ജില്ലാ പ്രസിഡന്റ് എം.പി. സെന്, ജെഎസ്എസ് ജില്ലാ ജനറല്സെക്രട്ടറി ടി.കെ. മോഹനന് എന്ഡിഎ സ്ഥാനാര്ത്ഥികളായ ചങ്ങനാശ്ശേരി-ഏറ്റുമാനൂര് രാധാകൃഷ്ണന്, ഏറ്റുമാനൂര്-എ.ജി. തങ്കപ്പന്, കോട്ടയം-അഡ്വ. എം.എസ് കരുണാകരന്, വൈക്കം-നീലകണ്ഠന് മാസ്റ്റര്, പുതുപ്പള്ളി-അഡ്വ. ജോര്ജ്ജ് കുര്യന്, പൂഞ്ഞാര്-എം.ആര്. ഉല്ലാസ്സ്, കടുത്തുരുത്തി-സ്റ്റീഫന് ചാഴികാടന്, കര്കമോര്ച്ച സംസ്ഥാന പ്രസിഡന്റ് പി.ആര്. മുരളീധരന്, ബിജെപി സംസ്ഥാന കമ്മറ്റി അംഗങ്ങളായ ബി. രാധാകൃഷ്ണ മേനോന്, ടി.എന്. ഹരികുമാര്, ജില്ലാ ജനറല് സെക്രട്ടറിമാരായ കെ.പി. സുരേഷ്, ലിജിന്ലാല്, സെക്രട്ടറി കെ.ജി. കണ്ണന്, ബിഡിജെഎസ് ജില്ലാസെക്രട്ടറി എന്.കെ. രമണന് എന്നിവര് പ്രസംഗിച്ചു.
