ചെറുതോണി: സ്വകാര്യ ബസ് തടഞ്ഞു നിര്ത്തി എട്ടംഗസംഘം കണ്ടക്ടറെ മര്ദ്ദിച്ചു. കട്ടപ്പന – അടിമാലി റൂട്ടില് സര്വ്വീസ് നടത്തുന്ന കൊച്ചിന് ബസ്സിലെ ജീവനക്കാരനായ വാഴക്കുളം വാലുമ്മേല് ആല്ബിന് സെബാസ്റ്റ്യന് (25) ആണ് മര്ദ്ദനമേറ്റ് ഇടുക്കി മെഡിക്കല് കോളേജില് ചികിത്സ തേടിയത്. കഴിഞ്ഞ ദിവസം വൈകിട്ട് 6.30 ന് കരിമ്പന് അട്ടിക്കളത്തിന് സമീപമാണ് സംഭവം. അട്ടിക്കളം ബസ്സ്റ്റോപ്പിലെത്തുന്നതിന് മുമ്പ് യാത്രക്കാരെന്ന ഭാവത്തില് വാഹനത്തിന് കൈകാണിച്ച് എട്ടുപേര് കയറുകയും ബസിനുള്ളില് കയറിയ ഉടന്തന്നെ ഒരാള് ആല്ബിന്റെ മുഖത്ത് വടികൊണ്ട് അടിക്കുകയും ചെയ്തു. തുടര്ന്ന് കൂടയുള്ളവരും ചുറ്റും നിന്ന് മര്ദ്ദിച്ച് ബസിനുള്ളില് വീഴിച്ചെന്ന് ആല്ബിന് പറഞ്ഞു. തുടര്ന്ന് യാത്രക്കാരായ രണ്ട് പോലീസുകാരുള്പ്പടെ മുപ്പതോളം വരുന്ന ആളുകള് ബലപ്രയോഗത്തിലൂടെ ഇവരെ ബസിനുള്ളില് നിന്നും ഇറക്കി വിടുകയായിരുന്നു. രണ്ട് മാസങ്ങള്ക്ക് മുമ്പാണ് ആല്ബിന് ഈ വാഹനത്തില് ജോലി ചെയ്തു തുടങ്ങിയത്. ഒരാഴ്ച കാലത്തെ അവധിക്കു ശേഷം തിരികെ വ്യാഴാഴ്ചയാണ് ജോലിയില് പ്രവേശിച്ചത്. യാത്രയ്ക്കിടയിലോ, പുറത്തു വച്ചോ താന് ആരുമായി പ്രശ്നങ്ങള് ഉണ്ടായിട്ടില്ലെന്നും മുന്വൈരാഗ്യത്തിനുള്ള സാധ്യതകളൊന്നും അറിയില്ലെന്നും ഇയാള് പറഞ്ഞു. തലയ്ക്കും, കൈകാലുകള്ക്കും ശക്തമായ പരിക്കേറ്റിട്ടുണ്ട്. മുമ്പ് ഈ വാഹനത്തില് ജോലി ചെയ്തിരുന്ന ജീവനക്കാരെ തേടിയെത്തിയവരാണോ ആളുമാറി തന്നെ മര്ദ്ദിച്ചതെന്നും ആല്ബിന് സംശയമുണ്ട്. കഞ്ഞിക്കുഴി പോലീസ് കേസ് രജിസ്റ്റര് ചെയ്ത് അന്വേഷണം ആരംഭിച്ചു.
സ്വകാര്യ ബസ് തടഞ്ഞ് നിര്ത്തി ഗുണ്ടാ സംഘം കണ്ടക്ടറെ മര്ദ്ദിച്ചു
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.