കണ്ണൂര്: നിയമസഭാ തെരഞ്ഞെടുപ്പില് വിഷന് ഡോക്യുമെന്റ് തയ്യാറാക്കുന്നതിന്റെ ഭാഗമായി കേരളത്തിന് പുതിയൊരു ജനകീയ വികസന മാതൃക തയ്യാറാക്കാന് ബിജെപി ഒരുങ്ങുന്നു. ഇതിനായി കേരളത്തിലെ ഓരോ വോട്ടര്മാരെയും നേരില്ക്കണ്ട് കേരള വികസനത്തെക്കുറിച്ചുളള ജനങ്ങളുടെ കാഴ്ചപ്പാടുകള് തിരിച്ചറിയാനായി എന്റെ കേരളം എന്ന പേരില് ബിജെപി സംഘടിപ്പിക്കുന്ന ബൃഹദ് പ്രചരണ പരിപാടിക്ക് തുടക്കമായി. കണ്ണൂര് സ്റ്റേഡിയം കോര്ണറില് നടന്ന പരിപാടി ബിജെപി ജില്ലാ അധ്യക്ഷന് പി.സത്യപ്രകാശ് ഉദ്ഘാടനം ചെയ്തു. കണ്ണൂര് മണ്ഡലം പ്രസിഡണ്ട് ടി.സി.മനോജ് അധ്യക്ഷത വഹിച്ചു. പി.കെ.വേലായുധന്, എ.ഒ.രാമചന്ദ്രന് എന്നിവര് സംസാരിച്ചു.
കേരള വികസനത്തെക്കുറിച്ചുള്ള സ്വപ്നങ്ങളും പ്രതീക്ഷകളും പങ്കുവെക്കൂ എന്ന അഭ്യര്ത്ഥനയോടെ കേരളത്തിലെ 140 നിയോജക മണ്ഡലങ്ങളിലും വികസന ചര്ച്ചകളും സെമിനാറുകളും സംവാദങ്ങളും നടത്തുന്നതാണ് പരിപാടി. ഇന്നലെ മുതല് 12 വരെ എല്ലാ ദിവസവും വൈകുന്നേരം 6 മുതല് 8.30 വരെയാണ് പരിപാടി. 140 നിയോജക മണ്ഡലങ്ങളിലെ വോട്ടര്മാരുമായി ബിജെപി സംസ്ഥാന പ്രസിഡണ്ട് കുമ്മനം രാജശേഖരന് നടത്തുന്ന വികസന ചര്ച്ചയാണ് ഈ പരിപാടിയിലെ മുഖ്യ ആകര്ഷണം. സാമൂഹ്യപ്രവര്ത്തകരും വിവിധ മേഖലകളിലെ വിദഗ്ധരും അടങ്ങുന്ന അഞ്ചംഗ പാനലാണ് ചര്ച്ച നയിക്കുക. വീഡിയോ കോണ്ഫറന്സിങ്ങ് സംവിധാനം വഴി ഒരേസമയം 14 നിയോജക മണ്ഡലങ്ങളിലെ വോട്ടര്മാരുമായി കുമ്മനം ചര്ച്ച നടത്തും. ഇതിനായി വീഡിയോ കോണ്ഫറന്സിങ്ങ് സംവിധാനം സജ്ജീകരിച്ച ഹൈടെക് വാനുകളാണ് ഓരോ മണ്ഡലത്തിലും എത്തുക. ഇന്ന് കാസര്കോട്, ധര്മ്മടം, 4 ന് ഉദുമ, തലശ്ശേരി, 5 ന് കാഞ്ഞങ്ങാട്, കൂത്തുപറമ്പ്, 7 ന് തൃക്കരിപ്പൂര്, മട്ടന്നൂര്, 8 ന് പയ്യന്നൂര്, പേരാവൂര്, 9 ന് കല്യാശ്ശേരി, 10 ന് തളിപ്പറമ്പ്, 11 ന് ഇരിക്കൂര്, 12 ന് അഴീക്കോട് എന്നീ മണ്ഡലങ്ങളിലാണ് പരിപാടികള് നടക്കുക.
