കണ്ണൂര്: ജില്ലയിലെ സര്ക്കാര് ആശുപത്രികളിലെ മരുന്നുകളുടെ ഗുണനിലവാരം ഉറപ്പുവരുത്തുന്നതിനായി ഡ്രഗ് സ്റ്റോറുകള് അടിയന്തിരമായും ശീതീകരിക്കാന് നടപടി സ്വീകരിക്കണമെന്ന് കേരള ഗവ.ഫാര്മസിസ്റ്റ് അസോസിയേഷന് ജില്ലാ കണ്വെന്ഷന് ആവശ്യപ്പെട്ടു. ജില്ലയിലെ അന്തരീക്ഷ താപനില 40 ഡിഗ്രിക്ക് മുകളില് ആയ സാഹചര്യത്തില് ഗുണനിലവാരം നിലനിര്ത്തുന്നതിന് സ്റ്റോറുകള് ശീതീകരിക്കണമെന്ന സര്ക്കാര് ഉത്തരവ് പാലിക്കാന് തദ്ദേശ സ്വയംഭരണ സ്ഥാപനങ്ങള് അടിയന്തിര നടപടിയെടുക്കേണ്ടതുണ്ട്.
ജില്ലാ കണ്വെന്ഷനും യാത്രയയപ്പ് സമ്മേളനവും ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് ഉദ്ഘാടനം ചെയ്തു. ജില്ലാ പ്രസിഡണ്ട് സി.കെ.നന്ദനന് അധ്യക്ഷത വഹിച്ചു. ഇ.വി.രാജേന്ദ്രന്, യുവ സിനിമാ സംവിധായകന് ജോണ്സണ് വി.ദേവസ്യ എന്നിവക്ക് സംഘടനയുടെ ഉപഹാരം നല്കി.
സംസ്ഥാന പ്രസിഡണ്ട് എം.എന്.സുനില് ജനറല് സെക്രട്ടറി കെ.എം.മുരളീധരന്, സംസ്ഥാന ട്രഷറര് അഭിലാഷ് ജയറാം, കെ.സി.അഭിത് കുമാര്, പി.സതീദേവി, പി.കെ.വിജയകുമാര്, കെ.സരസ്വതി, വെള്ളച്ചാല് നാരായണന്, പ്രദീപ്കുമാര് പാലേരി, പി.വിനോദ് കുമാര്, എന്നിവര് സംസാരിച്ചു. പി.പി.പ്രദീപ്കുമാര് സ്വാഗതവും യു.കെ.വനജ നന്ദിയും പറഞ്ഞു.
