കണ്ണൂര്: കണ്ണൂര് യൂണിവേഴ്സിറ്റി നിയമ പഠനവകുപ്പിലെ പ്രശ്നപരിഹാരത്തിനായി എബിവിപി ശക്തമായ സമരത്തിലേക്ക് നീങ്ങുന്നതായി ജില്ലാ കണ്വീനര് പ്രേംസായി പറഞ്ഞു. യൂണിവേഴ്സിറ്റി നിയമപഠന വകുപ്പില് നിരന്തരമായി ഉണ്ടായിക്കൊണ്ടിരിക്കുന്ന പ്രശ്നങ്ങള് പലതവണ അധികൃതരുടെ ശ്രദ്ധയില്പ്പെടുത്തിയിട്ടും പരിഹാരം കാണാതെ പക്ഷപാതപരമമായ രീതിയില് രാഷ്ട്രീയപരമായ മുതലെടുപ്പുകള് മാത്രമാണ് യൂണിവേഴ്സിറ്റി നടത്തിയിട്ടുള്ളത്. യൂണിവേഴ്സിറ്റിയില് വിദ്യാര്ത്ഥികളോടുള്ള ഉത്തരവാദിത്തമില്ലായ്മയുടെ അവസാന തെളിവാണ് യൂണിവേഴ്സിറ്റിക്ക് കീഴിലുള്ള നിയമപഠനവകുപ്പിലെ 11 വര്ഷക്കാലമായി ബാര് കൗണ്സില് ഓഫ് ഇന്ത്യയുടെ അംഗീകാരം വാങ്ങാതെ എല്ലാ വര്ഷവും അഡ്മിഷന് നടത്തുന്നത്. ഇതിലൂടെ നല്ലനാളുകള് സ്വപ്നം കണ്ട് കലാലയത്തിലെത്തിയ വിദ്യാര്ത്ഥികളുടെ ഭാവി വെച്ച് പന്താടുകയും ചെയ്ത യൂണിവേഴ്സിറ്റി നടപടി വിദ്യാര്ത്ഥി വിരുദ്ധവും പ്രതിഷേധാര്ഹവുമാണ്.
ഈ കാലയളവുകളിലെല്ലാംതന്നെ ഫീസ് വര്ധനയുള്പ്പെടെയുള്ള കാര്യങ്ങള് അനധികൃതമായി ചെയ്യുകയും അധ്യാപകനിയമനം ഉള്പ്പെടെയുള്ള അടിസ്ഥാന സൗകര്യം വര്ധിപ്പിക്കാതിരിക്കുകയും ചെയ്തളേഷം കഴിഞ്ഞ 11 വര്ഷത്തോളമായി ഈ കോഴ്സിന് അംഗീകാരമില്ല എന്ന കാര്യം മറച്ചുവെച്ച യൂണിവേഴ്സിറ്റി രജിസ്ട്രാറുടെ നടപടിക്കെതിരെ വിദ്യാര്ത്ഥികള് ഒറ്റക്കെട്ടായി മുന്നോട്ട് വരണമെന്ന് അദ്ദേഹം ആവശ്യപ്പെട്ടു.
ഈ വിഷയവുമായി ബന്ധപ്പെട്ട് പിവിസിയുമായി എബിവിപി നേതാക്കള് ചര്ച്ച നടത്തുകയും ചര്ച്ചയുടെ പരിണതഫലമായി കോഴ്സിന് അംഗീകാരം ലഭിക്കുവാന് വേണ്ട നടപടികള് എത്രയും വേഗം സ്വീകരിക്കുമെന്ന് പിവിസി ഉറപ്പുനല്കുകയും ചെയ്തു. ഈ വിഷയവുമായി ബന്ധപ്പെട്ട ആയിരക്കണക്കിന് വിദ്യാര്ത്ഥികളുടെ ഭാവി മുന്ഗണനയിലെടുത്തുകൊണ്ട് പ്രശ്നപരിഹാരത്തിന് വേണ്ടി യുദ്ധകാലാടിസ്ഥാനത്തില് എബിവിപി നേതൃത്വം ബാര് കൗണ്സില് ഓഫ് ഇന്ത്യയുമായും എച്ച്ആര്ഡി മിനിസ്റ്ററുമായും ബന്ധപ്പെടുമെന്നും പ്രസ്താവിച്ചു.
