കണ്ണൂര്‍: രാജ്യത്തെ പല സംസ്ഥാനങ്ങളിലും നിരോധിച്ചുകൊണ്ടിരിക്കുന്ന കാസിയ കേരളത്തില്‍ നിരോധിക്കുവാനുള്ള നടപടി സ്വീകരിക്കുന്നതില്‍ അധികൃതര്‍ അലംഭാവം കാട്ടുന്നതായി പരാതി. കറുവപ്പട്ടയെന്ന പേരില്‍ രാജ്യത്ത് വിറ്റഴിക്കപ്പെടുന്ന കാസിയ നിരോധിക്കണമെന്നാവശ്യപ്പെട്ട് വര്‍ഷങ്ങളായി നിയമപോരാട്ടം നടത്തുന്ന കണ്ണൂര്‍ പയ്യാമ്പലത്തെ ലിയോനാര്‍ഡ് ജോണാണ് പത്രസമ്മേളനത്തില്‍ പരാതിയുമായി രംഗത്തെത്തിയത്. സ്‌പൈസസ് ബോര്‍ഡിന്റെ റിപ്പോര്‍ട്ട് പ്രകാരം കാസിയ ഇറക്കുമതിക്ക് പിന്നില്‍ വന്‍ അഴിമതിയുണ്ടെന്നും വന്‍ ആരോഗ്യപ്രശ്‌നം സൃഷ്ടിക്കുന്ന ഇത് എത്രയും പെട്ടെന്ന് റിസ്ട്രിക് ഐറ്റം ഫോര്‍ ഇംപോര്‍ട്ടില്‍ ഉള്‍പ്പെടുത്തണമെന്നും വ്യക്തമാക്കിയിട്ടുണ്ട്. ഇക്കാര്യങ്ങള്‍ സൂചിപ്പിച്ചുകൊണ്ടുള്ള കത്ത് ഡയറക്ടര്‍ ജനറല്‍ ഓഫ് ഫോറിന്‍ ട്രേഡ്, ഡല്‍ഹിക്ക് ഏഴ് വര്‍ഷം മുമ്പ് അയച്ചിരുന്നുവെങ്കിലും സ്‌പൈസസ് ബോര്‍ഡിന്റെ ഈ കത്ത് തങ്ങള്‍ക്ക് കിട്ടിയത് ഈ മാസം ഏഴിനാണെന്നാണ് ഡിജിഎഫ്ടി അധികൃതര്‍ പറയുന്നത്. ഈ സംഭവത്തില്‍ നിന്ന് തന്നെ കാസിയ നിരോധിക്കാതിരിക്കുവാന്‍ വേണ്ടി പല ഉന്നതതല നീക്കങ്ങളും നടക്കുന്നുണ്ടെന്നത് വ്യക്തമാണെന്ന് കാസിയയ്‌ക്കെതിരെ ഒറ്റയാള്‍ പോരാട്ടം നടത്തുന്ന കണ്ണൂര്‍ പയ്യാമ്പലം സ്വദേശി ലിയോനാര്‍ഡ് ജോണ്‍ വാര്‍ത്താസമ്മേളനത്തില്‍ പറഞ്ഞു. വിവരാവകാശനിയമപ്രകാരം തനിക്ക് ലഭിച്ച മറുപടിയില്‍ ബോംബെ, ഗുജറാത്ത്, കല്‍ക്കട്ട, മംഗലാപുരം എന്നീ മേജര്‍ തുറമുഖങ്ങള്‍ കാസിയ ഇറക്കുമതി നിരോധിച്ചിട്ടുണ്ട്, എന്നാല്‍ കൊച്ചിയില്‍ കാസിയയുടെ ലോകറെക്കോര്‍ഡ് ഇറക്കുമതിയാണ് ഇപ്പോഴും നടന്നു കൊണ്ടിരിക്കുന്നതെന്നും ലിയോനാര്‍ഡ് ജോണ്‍ പറഞ്ഞു.
കാസിയ നിരോധനത്തിന് ഉദ്യോഗസ്ഥരും കൂട്ടെന്ന് 7 വര്‍ഷം മുമ്പയച്ച കത്ത് ലഭിച്ചത് കഴിഞ്ഞ ദിവസമെന്ന് മറുപടി
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.