കണ്ണൂര്‍: തൊഴിലാളികളുടെ ഉന്നമനത്തോടൊപ്പം രാഷ്ട്രത്തെയും ശക്തിപ്പെടുത്തുക എന്നതാണ് ബിഎംഎസ്സിന്റെ ലക്ഷ്യമെന്ന് സംസ്ഥാന ജനറല്‍ സെക്രട്ടറി വി.വി.ബാലകൃഷ്ണന്‍. തൊഴിലാളികളെ ദേശീയ മുഖ്യധാരയിലെത്തിക്കുകയെന്നതാണ് ബിഎംഎസ്സിന്റെ ദൗത്യം. ഭാരതത്തെ ലോകത്തിലെ ഏറ്റവും വലിയ ശക്തിയായി മാറ്റുന്നതില്‍ ബിഎംഎസ് പ്രതിജ്ഞാബദ്ധമാണെന്നും അദ്ദേഹം പറഞ്ഞു. കണ്ണൂര്‍ പോലീസ് അസോസിയേഷന്‍ ഹാളില്‍ കണ്ണൂര്‍ ജില്ലാ തയ്യല്‍ തൊഴിലാളി സംഘ് (ബിഎംഎസ്) ജില്ലാ വാര്‍ഷിക സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ദേശീയമാനബിന്ദുക്കളായ എല്ലാറ്റിനെയും നിരസിക്കാനും തമസ്‌കരിക്കാനുമുള്ള ബോധപൂര്‍വ്വമായ ശ്രമങ്ങള്‍ രാജ്യത്തിന്റെ വിവിധ കോണുകളില്‍ നിന്ന് ഉയര്‍ന്ന് വരുന്നുണ്ട്. ചില ഗൂഢശക്തികള്‍ എല്ലാറ്റിനെയും എതിര്‍ക്കാനും തകര്‍ക്കാനുമുള്ള പ്രവര്‍ത്തനങ്ങള്‍ നടത്തുന്നുണ്ട്. ഇസ്ലാമിക തീവ്രവാദികളും, കമ്മ്യൂണിസ്റ്റുകളും, മാവോയിസ്റ്റകളും രാജ്യത്തെ അസ്ഥിരപ്പെടുത്താന്‍ അതിശക്തിയായി പ്രവര്‍ത്തിക്കുന്നു. കനയ്യ കുമാറിനെ ചെഗുവേരയോടുപമിച്ച് കൊണ്ടുള്ള പ്രചരണങ്ങള്‍ നാം തിരിച്ചറിയണം. ദല്‍ഹി യൂനിവേഴ്‌സിറ്റി കേന്ദ്രീകരിച്ച് കഴിഞ്ഞ കുറേ കാലമായി രാജ്യദ്രോഹ പ്രവര്‍ത്തനങ്ങള്‍ നടക്കുന്നുണ്ട്. മുന്‍കാലങ്ങളില്‍ സര്‍ക്കാര്‍ ഇതിനെതിരെ ശക്തമായി രംഗത്ത് വന്നിരുന്നില്ല. എന്നാല്‍ ഇപ്പോള്‍ കേന്ദ്രത്തില്‍ അധികാരത്തിലുള്ള ബിജെപി സര്‍ക്കാര്‍ ഇതിനെതിരെ ശക്തമായ ഇടപെടലുകളാണ് സ്വീകരിക്കുന്നത്. രാജ്യദ്രോഹികള്‍ക്ക് കുഴലൂത്ത് നടത്തുന്ന ഇടതു പ്രസ്ഥാനങ്ങള്‍ രാജ്യത്ത് പ്രവര്‍ത്തിക്കുന്നുണ്ട്. ഭയനാകമായ രീതിയിലുള്ള പ്രവര്‍ത്തനങ്ങളാണ് ചില സര്‍വ്വകലാശാലകള്‍ കേന്ദ്രീകരിച്ച് നടക്കുന്നത്. ഇതിനെതിരെ ശക്തമായ പ്രവര്‍ത്തനങ്ങള്‍ നമ്മുടെ രാജ്യത്ത് ആരംഭിച്ച് കഴിഞ്ഞെന്നും അദ്ദേഹം പറഞ്ഞു. തൊഴിലാളികളുടെ ഉന്നമനത്തോടൊപ്പം രാജ്യത്തിന്റെ ഐക്യം ശക്തിപ്പെടുത്തുകയും രാഷ്‌ട്രസ്‌നേഹത്തിലധിഷ്ഠിതമായ ഒരു സമൂഹത്തെ കെട്ടിപ്പടുക്കുകയുമാണ് ബിഎംഎസ്സിന്റെ ലക്ഷ്യം. കൂടുതല്‍ തൊഴിലാളികളെ ബിഎംഎസ്സില്‍ അംഗങ്ങളാക്കി തൊഴിലാളികള്‍ക്ക് അര്‍ഹമായ ആനുകൂല്യം നേടിക്കൊടുക്കാന്‍ നാം മുന്നിട്ടിറങ്ങണമെന്നും അദ്ദേഹം പറഞ്ഞു.
സമ്മേളനത്തില്‍ യൂണിയിന്‍ പ്രസിഡണ്ട് സി.വി.രാജേഷ് അധ്യക്ഷത വഹിച്ചു. ബിഎംഎസ് ജില്ലാ സെക്രട്ടറി സി.വി.തമ്പാന്‍, പി.കൃഷ്ണന്‍, കെ.പി.സതീശന്‍, എം.ബാലന്‍, വി.മണിരാജ്, കെ.പി.രാമചന്ദ്രന്‍ തുടങ്ങിയവര്‍ സംസാരിച്ചു. പുതിയ ഭാരവാഹികളായി സി.വി.രാജേഷ് (പ്രസിഡണ്ട്), കെ.പി.രാമചന്ദ്രന്‍ (പയ്യന്നൂര്‍), അനിരുദ്ധന്‍ (പയ്യാവൂര്‍), വി.വി.കാഞ്ചന (കല്ല്യാട്), കെ.സുരേന്ദ്രന്‍ (വിളക്കോട്) (വൈസ് പ്രസിഡണ്ടുമാര്‍), വനജാ രാഘവന്‍ (ജനറല്‍ സെക്രട്ടറി), ഷൈന രമേശന്‍, കെ.രാജന്‍, എ.കെ.ശാന്ത, ടി.സോന (ജനറല്‍ സെക്രട്ടറിമാര്‍), പി.കെ.പ്രീത (ട്രഷറര്‍) എന്നിവരെ തെരഞ്ഞെടുത്തു. പി.കെ.പ്രീത സ്വാഗതവും വനജ രാഘവന്‍ നന്ദിയും പറഞ്ഞു.
