ഇരിട്ടി: ഇരിട്ടി താലൂക്ക് ആശുപത്രിയുടെ മുഖംമിനുക്കല് പ്രവൃത്തിക്കെതിരെ ആരോപണങ്ങളുമായി നാട്ടുകാര് രംഗത്ത്. ആശുപത്രി കെട്ടിടങ്ങള് പെയിന്റടിക്കല്, മുറ്റവും പാര്ക്കിംഗ് ഏറിയയും ടൈല്സ് പാകല്, പുതിയ കമാനം നിര്മ്മിക്കല്, ചില ക്വാര്ട്ടേഴ്സുകളുടെ റിപ്പയറിംഗ് എന്നിവയാണ് ഇപ്പോള് ആശുപത്രിയില് നടക്കുന്നത്. ഈ പ്രവൃത്തികളില് വന് അഴിമതി നടക്കുന്നതായാണ് ജനങ്ങളുടെ ആരോപണം.
ബ്ലോക്ക് പഞ്ചായത്താണ് ഇതിന്റെ പ്രവര്ത്തികള്ക്കായി 33 ലക്ഷം രൂപ അനുവദിച്ചിരിക്കുന്നത്. ഇതില് ആശുപത്രിയുടെ മുറ്റവും പാര്ക്കിംഗ് ഏറിയയും ടൈല്സ് വിരിക്കുന്ന പ്രവൃത്തിയിലാണ് ഏറ്റവും വലിയ അഴിമതി നടക്കുന്നതായി ജനങ്ങള് ആരോപിക്കുന്നത്. മുറ്റവും പാര്ക്കിംഗ് ഏരിയയും ഇന്റെര്ലോക്ക് കട്ടകളോ അല്ലെങ്കില് അതുപോലെ ഉറപ്പുള്ള മറ്റെന്തെങ്കിലും വസ്തുക്കളോ ഉപയോഗിക്കേണ്ടതിനു പകരം സാധാരണ വീടിന്റെ അകത്തങ്ങളിലും ലാട്രണുകളിലും മറ്റും ഉപയോഗിക്കുന്ന തീരേ കനംകുറഞ്ഞതും ഗുണനിലവാരമില്ലാത്തതുമായ ടൈലുകളാണ് ഉപയോഗിച്ചിരിക്കുന്നത്. നിത്യവും നൂറുകണക്കിന് ജനങ്ങളെത്തുന്ന ഇവിടെ ശക്തമായ മഴക്കാലത്ത് വഴുക്കല് ഉണ്ടാക്കുന്ന ഇത്തരം ടൈലുകള് രോഗികളും ജനങ്ങളും വഴുതി വീഴാനിടയാക്കുകമൂലം വന് അപകട സാദ്ധ്യത വിളിച്ചു വരുത്തുമെന്നാണു ജനങ്ങളുടെ ആരോപണം. ഇതുകൂടാതെ നിത്യവും വലുതും ചെറുതുമായ നിരവധി വാഹനങ്ങള് കയറിയിറങ്ങുമ്പോള് പാര്ക്കിംഗ് എറിയയില് വിരിച്ചിരിക്കുന്ന ഗുണനിലവാര മില്ലാത്ത ടൈലുകള് പൊട്ടി നുറുങ്ങാനും സാദ്ധ്യത ഏറെയാണെന്ന് ചൂണ്ടിക്കാട്ടപ്പെടുന്നു.
അതേസമയം 1കോടി 30 ലക്ഷം രൂപ ചെലവില് ആശുപത്രിക്കായി നിര്മ്മിച്ച പ്രസവ വാര്ഡു ആറുമാസത്തിലേറെയായി തുറന്നുപ്രവര്ത്തിക്കാതെ നോക്കുകുത്തിയായി നില്ക്കുകയാണ്. ഇതിനാവശ്യമായ വെള്ളവും വെളിച്ചവും മറ്റടിസ്ഥാനസൗകര്യങ്ങളൊന്നും ഒരുക്കാതെ ആശുപത്രിയുടെ മുറ്റം മിനുക്കലിനും കമാനം നിര്മ്മിക്കാനുമൊക്കെയായി ഇത്ര വലിയ തുക ചിലവാക്കുന്നതിനെ യാണ് ജനങ്ങള് ഇപ്പോള് ചോദ്യം ചെയ്യുന്നത്. ആശുപത്രിയുടെ പുതിയ പ്രസവവാര്ഡിന്റെ പ്രവര്ത്തനം അടുത്തൊന്നും നടക്കുന്ന ലക്ഷണമൊന്നും കാണാനില്ല. മുന്പ് ഇവിടെ നടത്തിയ പല പദ്ധതികളമെന്നപോലെ ഈ പുതിയ കെട്ടിടവും ഇനി കാടുകയറി നശിച്ച് പൊളിഞ്ഞു വീഴാറാവും. ബോഴാണ് അധികൃതര് എന്തെങ്കിലും കാട്ടിക്കൂട്ടാനൊരുങ്ങുക. ഈ കെട്ടിട നിര്മ്മാണത്തിലും വന് അഴിമതി നടന്നിട്ടുണ്ടെന്ന് ജനങ്ങള് ആരോപിക്കുന്നുണ്ട്. ഇപ്പോള് ആശുപത്രിയില് നടക്കുന്ന വികസന പ്രവര്ത്തനങ്ങളെക്കുറിച്ചു അധികൃതര് വ്യക്തമായ അന്വേഷണം നടത്തനമെന്നാണ് ജനങ്ങള് ആവശ്യപ്പെടുന്നത്.
