കണ്ണൂര്‍: കരിപ്പാല്‍ സോമേശ്വരി ദേവസ്വത്തിന്റെ പേരില്‍ കഴിഞ്ഞ ദിവസം നടന്ന പൊതുയോഗം നിയമവിരുദ്ധമാണെന്ന് കരിപ്പാല്‍ തറവാട് ക്ഷേത്ര പരിപാലന ട്രസ്റ്റ് ഭരണസമിതി യോഗം വ്യക്തമാക്കി. വാര്‍ഷിക പൊതുയോഗം എന്ന പേരില്‍ നടത്തിയ യോഗത്തില്‍ പുതിയ ഭാരവാഹികളെ തെരഞ്ഞെടുത്തു എന്നു പത്രവാര്‍ത്തയിലൂടെ മാത്രമാണ് യോഗത്തെക്കുറിച്ച് തറവാട്ടംഗങ്ങള്‍ പറയുന്നത്. കരിപ്പാല്‍ സോമേശ്വരി ദേവസ്വംകാര്യ നടത്തിപ്പുകമ്മറ്റിയാണ് കഴിഞ്ഞ കുറേവര്‍ഷങ്ങളായി കരിപ്പാല്‍ സോമേശ്വരി ക്ഷേത്രത്തിന്റെയും നാഗത്തിന്റെയും നടത്തിപ്പുമായി ബന്ധപ്പെട്ട കാര്യങ്ങള്‍ നിര്‍വ്വഹിക്കുന്നത്. ഈ കമ്മറ്റിയില്‍ 13 അംഗങ്ങളുള്ളതില്‍ നാല് പേരെ തറവാട് ക്ഷേത്ര പരിപാലന ട്രസ്റ്റ് നോമിനേറ്റ് ചെയ്യുന്നതാണ് കീഴ്‌വഴക്കം. ബാക്കി ഒമ്പത് പേരെ തറവാട്ടംഗങ്ങളും കരിപ്പാല്‍ പ്രദേശത്തെ നാട്ടുകാരും അടങ്ങുന്ന വാര്‍ഷിക പൊതുയോഗം തെരഞ്ഞെടുക്കുകയാണ് പതിവ്. ഇതില്‍ ഒരാളെ സെക്രട്ടറിയായും തറവാട് തായ്‌വഴി പ്രതിനിധികളിലൊരാള്‍ പ്രസിഡണ്ടും മറ്റൊരാള്‍ വൈസ് പ്രസിഡണ്ടുമാവുകയും ചെയ്യും.
നിലവിലെ പ്രസിഡണ്ട് കരിപ്പാല്‍ പുതിയ വീട് തായ്‌വഴില്‍പെട്ട കെ.പി.രാഘവനാണ്. ദേവസ്വം പ്രസിഡണ്ട് കെ.പി.രാഘവന്റെ അറിവോ സമ്മതമോ ഇല്ലാതെയാണ് വാര്‍ഷിക ജനറല്‍ബോഡി എന്ന പേരില്‍ ചിലര്‍ ചേര്‍ന്ന് പൊതുയോഗം നടത്തിയത്. ഈ യോഗത്തില്‍ ആകെ പങ്കെടുത്തത് അമ്പതോളം ആളുകളാണ്. രണ്ടായിരത്തിലധികം അംഗങ്ങളുള്ള കരിപ്പാല്‍ തറവാട്ടിലെ അംഗങ്ങളെ വിവരം അറിയിക്കാതെയാണ് പൊതുയോഗം നടത്തിയത്. ഇത് ഒരു കാരണവശാലും കരിപ്പാല്‍ തറവാട് അംഗീകരിക്കില്ലെന്ന് ട്രസ്റ്റ് ഭരണസമിതിയോഗം വ്യക്തമാക്കി. തറവാടിന്റെ കുടുംബക്ഷേത്രങ്ങളുടെ ആചാരാനുഷ്ഠാനങ്ങളെ തകര്‍ക്കാനുള്ള ഏതു നീക്കത്തെയും നിയമപരമായി നേരിടാന്‍ യോഗം തിരുമാനിച്ചു. യോഗത്തില്‍ ക്ഷേത്രപരിപാലന ട്രസ്റ്റ് പ്രസിഡണ്ട് ശിവദാസന്‍ കരിപ്പാല്‍ അധ്യക്ഷത വഹിച്ചു. കരിപ്പാല്‍ സോമേശ്വരി ദേവസ്വ കമ്മറ്റി പ്രസിഡണ്ട് കെ.പി.രാഘവന്‍, മുഖ്യരക്ഷാധികാരി കെ.കെ.നാരായണന്‍ മാസ്റ്റര്‍, മാതൃസമിതി പ്രസിഡണ്ട് കെ.കെ.യശോദ, കെ.കെ.സത്യന്‍, കെ.പി.ദാമോദരന്‍, കെ.കെ.ബാലകൃഷ്ണന്‍, കെ.പി.ജനാര്‍ദ്ദനന്‍, കെ.എ.പി.രവീന്ദ്രന്‍, കെ.കെ.രാമചന്ദ്രന്‍ മാസ്റ്റര്‍ എന്നിവര്‍ സംസാരിച്ചു. കെ.കെ.രാഘവന്‍ സ്വാഗതവും കെ.കെ.നാരായണന്‍ നമ്പ്യാര്‍ നന്ദിയും പറഞ്ഞു. കരിപ്പാല്‍ തറവാട് ക്ഷേത്ര പരിപാലന ട്രസ്റ്റിന്റെ വാര്‍ഷിക പൊതുയോഗം മാര്‍ച്ച് 25ന് നടത്താനും യോഗം തീരുമാനിച്ചു.
