കണ്ണൂര്‍: നിയമസഭാ തെരഞ്ഞെടുപ്പില്‍ നിന്ന്‌ തളിപ്പറമ്പ്‌ സിറ്റിംഗ്‌ എംഎല്‍എ ജെയിംസ്‌മാത്യു പിന്‍മാറിയത്‌ പാര്‍ട്ടി നിര്‍ദ്ദേശത്തെ തുടര്‍ന്ന്‌. ഇത്തവണ തെരഞ്ഞെടുപ്പില്‍ മത്സരിക്കാനില്ലെന്ന്‌ ജെയിംസ്‌ മാത്യു കഴിഞ്ഞ ദിവസം പറഞ്ഞിരുന്നു. പാര്‍ട്ടി പ്രവര്‍ത്തനത്തില്‍ സജീവമാകാനാണ്‌ തെരഞ്ഞെടുപ്പില്‍ മത്സരിക്കാത്തതെന്നായിരുന്നു ജെയിംസ്‌ മാത്യു നല്‍കിയ വിശദീകരണം. എന്നാല്‍ തളിപ്പറമ്പില്‍ എം.വി.ഗോവിന്ദനെ മത്സരിപ്പിക്കുന്നതിന്‌ വേണ്ടി ജെയിംസ്‌ മാത്യുവിനെ പാര്‍ട്ടി നേതൃത്വം ഇടപെട്ട്‌ മാറ്റുകയായിരുന്നു. സിപിഎം അധികാരത്തില്‍ വരികയാണെങ്കില്‍ എം.വി.ഗോവിന്ദനെ മന്ത്രിസഭയിലെടുക്കാനാണ്‌ പാര്‍ട്ടിയുടെ തീരുമാനം. തളിപ്പറമ്പിന്‌ പകരം ഇരിക്കൂര്‍ നിയോജകമണ്ഡലത്തില്‍ മത്സരിക്കാനാണ്‌ പാര്‍ട്ടി നേതൃത്വം ജെയിംസ്‌ മാത്യുവിനോട്‌ ആവശ്യപ്പെട്ടത്‌. എന്നാല്‍ 2006 ല്‍ മത്സരിച്ച്‌ പരാജയപ്പെട്ട ഇരിക്കൂറില്‍ ഇക്കുറി ചാവേറാകാനില്ലെന്നാണ്‌ ജയിംസ്‌ മാത്യുവിന്റെ നിലപാട്‌. തളിപ്പറമ്പില്‍ മത്സരിക്കുന്നില്ലെങ്കില്‍ താന്‍ തെരഞ്ഞെടുപ്പിനില്ലെന്ന്‌ പറഞ്ഞ്‌ ജയിംസ്‌ മാത്യു നിലപാട്‌ വ്യക്തമാക്കുകയായിരുന്നു. ഔദ്യോഗിക വിഭാഗത്തിന്‌ അനഭിമതനായ ജെയിംസ്‌മാത്യുവിനെ മത്സരിപ്പിക്കുന്നതില്‍ പാര്‍ട്ടി സംസ്ഥാന ഘടകത്തിന്‌ താല്‍പര്യമില്ലായിരുന്നു. തളിപ്പറമ്പിലെ ഒരു സ്‌കൂള്‍ അധ്യാപകന്റെ ആത്മഹത്യയുമായി ബന്ധപ്പെട്ട കേസില്‍ പ്രതിചേര്‍ക്കപ്പെട്ട ജെയിസ്‌ മാത്യുവിനെ കോടതി റിമാന്റ്‌ ചെയ്‌ത്‌ ജയിലിലടച്ചിരുന്നു.
സംസ്ഥാന സെക്രട്ടേറിയറ്റ്‌ അംഗങ്ങളില്‍ പകുതി പേര്‍ മാത്രം മത്സരിച്ചാല്‍ മതിയെന്ന തീരുമാനം ഉണ്ടെങ്കിലും ഇദ്ദഹത്തിന്റെ കാര്യത്തില്‍ ഇളവു നല്‍കുമെന്നാണ്‌ സൂചന. ഗോവന്ദന്‍ മാസ്റ്റര്‍ 1996ലും 2001 ലും തളിപ്പറമ്പ്‌ മണ്‌ഡലത്തില്‍ നിന്നും നിയമസഭയിലേക്കു തെരഞ്ഞെടുക്കപ്പെട്ടിട്ടുണ്ട്‌. പിന്നീട്‌ സംഘടനാ കാര്യങ്ങളില്‍ സജീവമാവുകയായിരുന്നു. പിണറായിയുടെ അടുത്ത ആളായാണ്‌ ഗോവിന്ദന്‍ മാസ്റ്ററെ വിശേഷിപ്പിക്കുന്നത്‌. പിണറായി നയിച്ച രണ്ട്‌ കേരള മാര്‍ച്ചുകളിലും ഗോവിന്ദന്‍ മാസ്റ്റര്‍ അംഗമായിരുന്നു. ഇടതു പക്ഷം അധികാരത്തിലെത്തിയാല്‍ മന്ത്രി സ്ഥാനത്തേക്കു നിര്‍ദ്ദേശിക്കപ്പെടുന്ന പേരും ഇദ്ദേഹത്തിന്റെതാവും. 2006 ല്‍ തളിപ്പറമ്പ്‌ മണ്‌ഡലത്തെ പ്രതിനിധീകരിച്ചിരുന്ന സി.കെ.പി പത്മനാഭന്‌ 2011 ല്‍ സീറ്റ്‌ നിഷേധിച്ചതിനെത്തുടര്‍ന്ന്‌ പാര്‍ട്ടി ഘടകത്തിലുണ്ടായ ഉണ്ടായ പ്രശ്‌നങ്ങള്‍ പരിഹരിക്കപ്പെട്ടത്‌ ജെയിംസ്‌ മാത്യു സ്ഥാനാര്‍ഥിയായി എത്തിയതോടെയാണ്‌. സിപിഎമ്മിന്റെ ഉറച്ച മണ്ഡലങ്ങളിലൊന്നാണ്‌ തളിപ്പറമ്പില്‍ ജയിംസ്‌ മാത്യുവിനെ ഏകപക്ഷീയമായി മാറ്റിയതില്‍ അണികള്‍ക്കിടയില്‍ പ്രതിഷേധം ശക്തമാണ്‌.
