മേപ്പയ്യൂര്: ജില്ലയിലെ തന്നെ ഏറ്റവും വലിയ ഗ്രാമീണ സര്ക്കാര് വിദ്യാലയമായ മേപ്പയ്യൂര് ഗവണ്മെന്റ് വൊക്കേഷണല് ഹയര്സെക്കന്ററി സ്കൂള് സമാനതകളില്ലാത്ത തുടര്വിദ്യാലയ മികവിന്റെ പര്യായമായി മാറുന്നു. ജനകീയ മുഖമുള്ള സമഗ്ര വികസന കാഴ്ചപ്പാടുമായി വ്യത്യസ്തതയുള്ള അമ്പത്തിരണ്ട് പദ്ധതികളാണ് വിദ്യാലയത്തില് ആസൂത്രണം ചെയ്യുന്നത്. പാഠ്യ, പാഠ്യാനുബന്ധ പ്രവര്ത്തനങ്ങള്, മണ്ണ്, ജല-പരിസ്ഥിതി സംരക്ഷണം, കലാ-കായിക രംഗങ്ങളിലെ പ്രത്യേക പദ്ധതികള്, സാമൂഹിക ജനകീയ സേവന പദ്ധതികള് തുടങ്ങി രാജ്യത്തിന് തന്നെ മാതൃകയാവുന്ന ഒട്ടേറെ മികവ് പദ്ധതികളാണ് വരുന്ന പത്തുവര്ഷം കൊണ്ട് സ്കൂളില് നടപ്പാക്കുന്നത്.
സ്കൂളിലെ പൂര്വാധ്യാപകന് കൂടിയായ പേരാമ്പ്ര എംഎല്എ കെ. കുഞ്ഞമ്മദ് മാസ്റ്റര് മണ്ഡലം ആസ്തി വികസന ഫണ്ടില് നിന്നും ലഭ്യമാക്കിയ രണ്ട് കോടി രൂപ ഉപയോഗിച്ചുകൊണ്ടാണ് അറുപതിന്റെ നിറവിലെത്തിയ ഈ പൊതു വിദ്യാകേന്ദ്രം സമഗ്ര വികസന പദ്ധതിക്ക് തുടക്കം കുറിക്കുന്നത്. ലോക നിലവാരമുള്ള പതിനഞ്ച് സ്മാര്ട്ട് ക്ലാസുകള് ഉള്പ്പെടുന്ന പുതിയ കെട്ടിടത്തിന്റെ ശിലാസ്ഥാപനവും മുന് എംഎല്എ എ.വി. അബ്ദുറഹിമാന് ഹാജിയുടെ സ്മരണക്കായി നിര്മ്മിക്കപ്പെടുന്ന ഓഡിറ്റോറിയത്തിന്റെ നിര്മാണ പ്രവൃത്തി ഉദ്ഘാടനവും ഇന്ന് നടക്കും.
