ബാലുശ്ശേരി: രൂക്ഷമായ കുടിവെള്ളക്ഷാമം അനുഭവപ്പെടുന്ന കുടുംബങ്ങള്ക്ക് കുടിവെള്ളമെത്തിക്കുന്നതിനായുള്ള ക്ഷേത്രകമ്മിറ്റിയുടെ നടപടി മാതൃകാപരവും ശ്രദ്ധേയവുമാകുന്നു. മാനവസേവയാണ് മാധവസേവയെന്ന മഹത്തായ വാക്യത്തെ അക്ഷരാര്ത്ഥത്തില് സ്വാംശീകരിച്ചുകൊണ്ടാണ് മങ്ങാട് കോവിലകം ശ്രീഭഗവതി ക്ഷേത്ര ശാഖാസമിതി, കുടിവെള്ളത്തിനായി ദുരിതമനുഭവിക്കുന്ന ഒട്ടേറെ കുടുംബങ്ങള്ക്ക് ആശ്വാസത്തിന്റെ തെളിനീര് നല്കുന്നത്. ഈ മഹത്തായ ഉദ്യമത്തിന് ഇന്നു തുടക്കം കുറിക്കും. ഉണ്ണികുളം ഗ്രാമപഞ്ചായത്തിലെ പതിനഞ്ചോളം കുടുംബങ്ങള്ക്കാണ് ഇന്നു മുതല് കുടിവെള്ളം ലഭ്യമാകുക. മങ്ങാട് കോവിലകം ശ്രീഭഗവതിക്ഷേത്രത്തില് നിന്നും അര കിലോമീറ്റര് അകലെയുള്ള കുടംബങ്ങള്ക്കാണ് രണ്ടര ലക്ഷം രൂപയോളം ചെലവഴിച്ചുള്ള ഈ പദ്ധതി.
അതിപുരാതനവും ചരിത്രപ്രസിദ്ധവുമായ ഈ ക്ഷേത്രത്തില് പൊതുജനങ്ങള്ക്ക് ഉപകാരപ്പെടുന്ന ഒട്ടേറെ പ്രവൃത്തികള് നടന്നുവരുന്നുണ്ട്. നിര്ധനരായ കുടുംബങ്ങള്ക്ക് പെന്ഷന്, ചികിത്സാസഹായം, നിര്ധനവിദ്യാര്ത്ഥികള്ക്ക് പഠനോപകരണം വിതരണം, നേത്രദാനസേന തുടങ്ങിയവ ഇതില്പെടുന്നു. വ്യക്തമായ കാഴ്ചപ്പാടും അതു പ്രവൃത്തിപഥത്തിലെത്തിക്കുവാനുള്ള ആത്മാര്ത്ഥമായ ശ്രമവും അതിനായി ഭക്തരുടെയും നാട്ടുകാരുടെയും സഹായവും ഒന്നിച്ചുചേരുന്നതാണ് കോവിലകം ക്ഷേത്രകമ്മിറ്റിയെ വേറിട്ടതാക്കുന്നത്. പതിറ്റാണ്ടുകളോളമായി കുടിവെള്ളത്തിനായി ബുദ്ധിമുട്ടുന്ന കുടുംബങ്ങള്ക്ക് ആശ്വാസം നല്കുന്നതില് ത്രിതല സ്ഥാപനങ്ങളും സര്ക്കാറും പരാജയപ്പെടുമ്പോഴാണ് ക്ഷേത്രസംബന്ധമായ ദൈനംദിന പ്രവര്ത്തനങ്ങള്ക്കിടയില് കാരുണ്യത്തിന്റെ ഉറവ വറ്റാതെ കോവിലകം ക്ഷേത്രം മാതൃകയാകുന്നത്. ഇന്ന് രാവിലെ 10ന് ക്ഷേത്രസന്നിധിയില് നടക്കുന്ന ചടങ്ങില് കേരള ക്ഷേത്രസംരക്ഷണസമിതി സംസ്ഥാന സെക്രട്ടറി ഉണ്ണികൃഷ്ണന് കോലേഴി ഉദ്ഘാടനം ചെയ്യും.
ഉണ്ണികുളം ഗ്രാമപഞ്ചായത്ത് പ്രസിഡന്റ് ബിനോയ് ഇ.ടി, മെമ്പര് അജിത്കുമാര് ഏറാടിയില്, ക്ഷേത്രസംരക്ഷണസമിതി ജില്ലാപ്രസിഡന്റ് കെ.എം. രാമചന്ദ്രന്, രക്ഷാധികാരി ഓടയില് മോഹനന് തുടങ്ങിയവര് പങ്കെടുക്കുമെന്ന് ക്ഷേത്രമ്മിറ്റി പ്രസിഡന്റ് പി.മുകുന്ദന് നായര്, സെക്രട്ടറി അരുണ് കണ്ണന്നൂര്, ട്രഷറര് ഷിബി. വി.വി. എന്നിവര് അറിയിച്ചു.
