സ്വന്തം ലേഖകന്‍
തൊടുപുഴ : വിമോചനയാത്ര നയിച്ചെത്തിയ കുമ്മനം രാജശേഖരന്‍ തൊടുപുഴയിലെ പൗരപ്രമുഖരും സാമുദായിക നേതാക്കളുമായി നടത്തിയ കൂടിക്കാഴ്ച ആവേശകരമായി. എന്റെ നാട് എങ്ങിനെയായിരിക്കണമെന്ന വിഷയത്തിലുള്ള പൗരപ്രമുഖരുടെ അഭിപ്രായങ്ങള്‍ കുമ്മനം ആരാഞ്ഞു. ചടങ്ങില്‍ പങ്കെടുത്തവരെല്ലാം അഭിപ്രായങ്ങളും നിര്‍ദ്ദേശങ്ങളും കുമ്മനത്തെ അറിയിച്ചു. ചിലര്‍ പരിഭവത്തിന്റെ കെട്ടുമഴിച്ചു… തൊടുപുഴ ഹൈറേഞ്ച് ഫുഡ്മാളിനോട് അനുബന്ധിച്ചുള്ള ഹാളിലായിരുന്നു പരിപാടി. തൊടുപുഴയിലെ വിവിധ സാമൂഹിക തലങ്ങളില്‍ പ്രവര്‍ത്തിക്കുന്ന ഇരുന്നോറോളം ആളുകളാണ് കുമ്മനവും ആയി ആശയവിനിമയം നടത്തുന്നതിനും സ്‌നേഹവിരുന്നില്‍ പങ്കെടുക്കുന്നതിനുമായി എത്തിച്ചേര്‍ന്നത്. തൊടുപുഴയിലെ പ്രമുഖ ഡോക്ടര്‍ സാജന്‍ ചാഴികാടന്‍ അധ്യക്ഷത വഹിച്ചു. താലൂക്ക് ഇമാം കൗണ്‍സില്‍ ചെയര്‍മാന്‍കാരിക്കോട് നൈനാര്‍ പള്ളി ഇമാം ജനാബ് കടയ്‌ക്കല്‍ അബ്ദുള്‍ റഷീദ് മൗലി, ചുങ്കം പള്ളി വികാരി ജോര്‍ജ്ജ് പുതുപ്പറമ്പില്‍, മര്‍ച്ചന്റ്‌സ് അസോസിയേഷന്‍ പ്രസിഡന്റ് വി. വേണു, ജനറള്‍ സെക്രട്ടറി ജോസ് എവര്‍ഷൈന്‍, ഹോട്ടല്‍ ആന്റ് റസ്റ്റോറന്റ്‌സ് അസോസിയേഷന്‍ ഇടുക്കി ജില്ല പ്രസിഡന്റ് എം.എന്‍ ബാബു, ഹിന്ദുഇക്കണോമിക് ഫോറം തൊടുപുഴ ചാപ്റ്റര്‍ പ്രസിഡന്റ് എം.ഡി ദിലീപ്, ധന്വന്തരി വൈദ്യാശാല എം.ഡി അനൂപ് നമ്പൂതിരി, ഐക്യ മലഅരയ സഭ സംസ്ഥാന പ്രസിഡന്റ് ദിലീപ്, ശബരി റെയില്‍ ആക്ഷന്‍ കൗണ്‍സില്‍ നേതാവ് അഡ്വ. റഹിം, തൊടുപുഴയിലെ ലയണ്‍സ് ക്ലബ്, റോട്ടറി, ജെ.സീസ് എന്നീ ക്ലബുകളുടെ ഭാരവാഹികള് വിവിധ ഹൈന്ദവ സാമുദായിക സംഘടനയുടെ ഭാരവാഹികള് എന്നിവര്‍ യോഗത്തില്‍ പങ്കെടുത്തു. സംഗമത്തില്‍ പങ്കെടുത്തവരുടെ ചോദ്യങ്ങള്‍ക്കും നിര്‍ദ്ദേശങ്ങള്‍ക്കും ആശങ്കകള്‍ക്കും പുഞ്ചിരിയോടെ കുമ്മനം മറുപടി പറഞ്ഞു. ബിജെപിയുടെ വികസന കാഴ്ചപ്പാടുകള്‍ കുമ്മനം പറഞ്ഞവസാനിച്ചപ്പോള്‍ സദസ്സില്‍ നിന്നുമുയര്‍ന്ന ഹര്‍ഷാരവം സുഹൃദ് സംഗമത്തിന്റെ വിജയം വിളിച്ചോതുന്നതായിരുന്നു.
