പയ്യാവൂര്: പഞ്ചായത്തിന്റെ നേതൃത്വത്തില് മികവുറ്റ കര്ഷകരെ സംഘടിപ്പിച്ച് രൂപം നല്കിയ ഹരിതാ ഫാര്മേഴ്സ് ക്ലബ്ബിന്റെ നേതൃത്വത്തില് പയ്യാവൂര് കാഞ്ഞിരക്കൊല്ലിയിലെ മുക്കുഴിയില് നടത്തിയ ശീതകാല ജൈവ പച്ചക്കറി കൃഷിയുടെ വിളവെടുപ്പ് പയ്യാവൂര് ഗ്രാമപഞ്ചായത്ത് പ്രസിഡണ്ട് ഡെയ്സി ചിറ്റൂപറമ്പില് ഉദ്ഘാടനം ചെയ്തു.
പഞ്ചായത്ത് പരിധിയിലെ വിവിധ പ്രദേശങ്ങളിലായി 25 ഏക്കറോളം സ്ഥലത്താണ് ജൈവകൃഷി നടത്തിയത്. പയര്, പാവല്, പടവലം, തുടങ്ങിയ പച്ചക്കറികളും കപ്പ, കാച്ചില്, ചേന, ചേമ്പ്, കൂര്ക്ക എന്നീ കിഴങ്ങുവര്ഗ്ഗങ്ങളും വിവിധ കൃഷിയിടങ്ങളില് വളരുന്നുണ്ട്. രണ്ടേക്കറില് പൂര്ണ്ണമായി കപ്പകൃഷിയാണ് ഉള്ളത്. വിനോദസഞ്ചാര കേന്ദ്രമായ കാഞ്ഞിരക്കൊല്ലിയിലെ മുക്കുഴി മലമുകളില് നൂറേക്കര് സ്ഥലത്താണ് ശീതകാല പച്ചക്കറികളായ കാബേജ്, കോളിഫ്ളവര് എന്നിവ കൃഷിചെയ്തത്. നബാര്ഡ്, സംസ്ഥാന ഹോര്ട്ടി കള്ച്ചര് മിഷന്, കണ്ണൂര് കൃഷിവിജ്ഞാന കേന്ദ്രം, ഫാം ഫെഡ്, പയ്യാവൂര് കൃഷിഭവന് എന്നിവയുടെ സാങ്കേതിക സഹകരണങ്ങളും കൃഷിയുടെ വിജയത്തിന് പിന്നിലുണ്ട്.
യോഗത്തില് ഫാം ഫെഡ് പ്രസിഡണ്ട് എംഎം മാത്യു അധ്യക്ഷത വഹിച്ചു. എസ്എസ് നാഗേഷ് (നബാര്ഡ്) വില്പന ഉദ്ഘാടനവും ഡോ.ജയരാജ് (കൃഷി വിജ്ഞാന കേന്ദ്രം) മുഖ്യ പ്രഭാഷണവും പി.പി.വിജയന് പദ്ധതി വിശദീകരണവും നടത്തി. അസി.ഡയറക്ടര് ജമീല, ഫാ.ലൂയി മരിയദാസ്, മധുസൂദനന്, മഞ്ചു കുരിശുംമൂട്ടില്, പി.അജീഷ്, ഷാജു തേക്കുംകാട്ടില്, ഷാജി കടൂക്കുന്നേല്, ഡെയ്സി ജോസഫ്, ബിനോയ് ആലുങ്കത്തടത്തില്, പി.കെ.ബാലകൃഷ്ണന്, ആഗ്നസ് വാഴവളപ്പില്, കെ.വി.രഘു, ടി.കെ.കുഞ്ഞുമോന് എന്നിവര് പ്രസംഗിച്ചു.
