കണ്ണൂര്: നഗരപ്രദേശങ്ങളിലും സ്ഥലപരിമിതിയുള്ള വീടുകളിലും താമസിക്കുന്നവര്ക്ക് ഉറവിട മാലിന്യ സംസ്കരണത്തിന് പുതിയൊരു റിങ് കമ്പോസ്റ്റ് മാതൃക അവതരിപ്പിക്കുകയാണ് ആലക്കോട് സ്വദേശിയായ കെ എ സെബാസ്റ്റ്യന്. കണ്ണൂരില് നടക്കുന്ന പുഷ്പോല്സവവേദിയിലാണ് മാലിന്യനിര്മാര്ജനത്തിന് വേറിട്ട മാതൃകയുമായി സെബാസ്റ്റ്യന്റെ സ്റ്റാള്.
സെബാസ്റ്റ്യന് കണ്ടുപിടിച്ച റിങ് കമ്പോസ്റ്റിന് നിരവധി സവിശേഷതകളുണ്ട്. അരയടി താഴ്ചയില് കുഴി എടുത്ത് അതിനു മുകളില് ടാങ്കും സഌബും അതിന് പിടിയോടുകൂടിയ അടപ്പും വെച്ചാണ് റിംഗ് കമ്പോസ്റ്റ് സംവിധാനം ഒരുക്കുന്നത്. അടുക്കളമാലിന്യവും മറ്റും ഇതില് നിക്ഷേപിക്കാം. ദിവസങ്ങള് കൊണ്ട് അത് ജൈവ വളമായി മാറും.
സെബാസ്റ്റ്യന്റെ റിങ് കമ്പോസ്റ്റ് ഇതിനകം സംസ്ഥാനത്തിനകത്തും പുറത്തുമായി നിരവധിപേര് തൃപ്തികരമായി പരീക്ഷിച്ചിട്ടുണ്ട്. കണ്ണൂര് ജില്ലാ കലക്ടര്, സബ് കലക്ടര്, ഡിഐജി എന്നിവരുടെ വീടുകളില് റിങ് കമ്പോസ്റ്റ് സംവിധാനം സ്ഥാപിക്കാനായത് വലിയ അംഗീകാരമാണെന്ന് സെബാസ്റ്റ്യന് പറയുന്നു. ആലക്കോട് പഞ്ചായത്തിലെ സ്കൂളുകളിലും ജില്ലയിലെ സര്ക്കാര് സ്ഥാപനങ്ങളിലും ദേവാലയങ്ങളിലും ഫഌറ്റുകളിലും സെബാസ്റ്റ്യന് റിങ് കമ്പോസ്റ്റ് സ്ഥാപിച്ചിട്ടുണ്ട്. ഉത്തര്പ്രദേശ്, ഒഡിഷ തുടങ്ങി മറ്റു സംസ്ഥാനങ്ങളിലുള്പ്പെടെ സെബാസ്റ്റ്യന് വേസ്റ്റ് മാനേജ്മെന്റിനെക്കുറിച്ച് ക്ലാസുകള് എടുക്കാറുണ്ട്.
റിങ് കമ്പോസ്റ്റിന് പുറമേ മണ്ണിര കമ്പോസ്റ്റ്, അലങ്കാര മല്സ്യകൃഷി, വളര്ത്തുപക്ഷികള്, ഔഷധസസ്യങ്ങളുടെ കൃഷിയും വിപണനവും തുടങ്ങിയ കാര്യങ്ങളും ചെയ്യുന്നുണ്ട്. പരീക്ഷണങ്ങള്ക്കു കൂട്ടായി ഭാര്യ സെലിനും മക്കളായ ബോണിയും ടോണിയും ഒപ്പമുണ്ട്.
