കോഴിക്കോട്: പുനരുദ്ധാരണ പ്രവര്ത്തനങ്ങള് പുരോഗമിക്കുന്ന പൊന്നങ്കോട്ടുകുന്ന് ശ്രീ തൃക്കൈപ്പറ്റ മഹാക്ഷേത്രം ഉത്തര കേരളത്തില് അത്യപൂര്വ്വമായി നടക്കുന്ന ശ്രീചക്ര നവാവരണ പൂജക്ക് വേദിയാകുന്നു. പൂജക്കുള്ള ഒരുക്കങ്ങള് ക്ഷേത്രത്തിലും പരിസരപ്രദേശങ്ങളിലും പുരോഗമിക്കുകയാണ്. 24 ന് നടക്കുന്ന ശ്രീചക്ര നവാവരണ പൂജയ്ക്കുള്ള മേരുവും നിലവിളക്കും 15 ന് ക്ഷേത്രത്തില് എത്തിച്ചേരും. 15 മുതല് 24 വരെ ആദ്ധ്യാത്മിക പ്രഭാഷണം, കലാപരിപാടികള്, സാസ്ക്കാരിക സമ്മേളനം എന്നിവ നടക്കും. 21,22,23, തിയ്യതികളില് മഹാഗണപതിഹോമം, മഹാമൃത്യുഞ്ജയ ഹോമം, മഹാസുദര്ശന ഹോമം, ഭഗവതിസേവ എന്നിവ നടക്കും.
കോഴിക്കോട് നഗരാതിര്ത്തിയില് ദേശീയ പാത ബൈപാസിനടുത്ത്, നെല്ലിക്കോട്, കോവൂര്, പാലാഴി ദേശങ്ങള് സന്ധിക്കുന്ന പൊന്നങ്കോടുകുന്നില് സൈബര് പാര്ക്കിനു സമീപം സഹസ്രാബ്ദങ്ങള്ക്കു മുമ്പ് നിലനിന്നിരുന്നതും നൂറ്റാണ്ടുകളായി നശിച്ചു കിടക്കുന്നതുമായ ഈ ക്ഷേത്ര സമുച്ചയത്തിന്റെ പുനരുദ്ധാരണ പ്രവര്ത്തനങ്ങള് നടന്നു കൊണ്ടിരിക്കുന്ന പശ്ചാത്തലത്തിലാണ് ശ്രീചക്രപൂജക്ക് ഇവിടം വേദിയാകുന്നത്. ക്ഷേത്രം തന്ത്രി തരണനല്ലൂര് പടിഞ്ഞാറെമന പത്മനാഭന് നമ്പൂതിരിപ്പാടാണ് പൂജക്ക് മുഖ്യകാര്മ്മികത്വം വഹിക്കുന്നത്. കേരളീയ പൂജാ-തന്ത്രവിധിക്കനുസരിച്ച് ചിട്ടപ്പെടുത്തി, നൃത്തം, സംഗീതം,വാദ്യം എന്നിവ സഹിതം വിവിധതരം പായസങ്ങള്, 28 തരം വിശിഷ്ട നിവേദ്യങ്ങള് എന്നിവയോടെയാണ് പൂജ നടത്തുന്നത്.
പൂജക്കുവേണ്ടി ചെന്നൈയില് പ്രത്യേകം നിര്മ്മിച്ച ശ്രീചക്രത്തിന്റെ ത്രിമാനരൂപമായ മേരു കൊടുങ്ങല്ലൂര് ഭഗവതി ക്ഷേത്രത്തില് നിന്നും പയ്യന്നൂര് കുഞ്ഞിമംഗലം മൂശാരികോവിലില് നിര്മ്മിച്ച നിലവിളക്ക് മാടായിക്കാവില് നിന്നും രഥയാത്രയായി കൊണ്ട് വരും.
പ്രധാന ക്ഷേത്രങ്ങളിലെ ദര്ശനത്തിനും സ്വീകരണത്തിനും ശേഷം മേരുവും നിലവിളക്കും 15 ന് വൈകുന്നേരം ശ്രീതൃക്കൈപ്പറ്റ മഹാക്ഷേത്രത്തിലെത്തിച്ചേരും. ശ്രീചക്ര പൂജാസങ്കേതത്തില് എത്തിച്ചേരുന്ന മേരുചക്രവും നിലവിളക്കും ചിദാനന്ദപുരിസ്വാമികളുടെ നേതൃത്വത്തില് സ്വീകരിക്കും. തുടര്ന്ന് സ്വാമി പ്രഭാഷണം നടത്തും. 16 മുതല് 23 വരെ വൈകുന്നേരങ്ങളില് എല്. ഗീരീഷ് കുമാര്, ഡോ.സി. കൃഷ്ണന് നമ്പൂതിരി, ഡോ. കാരുമാത്ര വിജയന് തന്ത്രികള്, ഡോ. പ്രിയദര്ശന് ലാല്, പട്ടയില് പ്രഭാകരന്, എ.കെ.ബി.നായര് ഡോ. എം.ജി.ശശിഭൂഷണ് മുതലായവര് പ്രഭാഷണം നടത്തും. സാംസ്കാരിക സമ്മേളനം, കലാപരിപാടികള്, ഭജന എന്നിവയും ഉണ്ടാകും. കേരളത്തിനകത്തും പുറത്തുമുള്ള വിശിഷ്ട വ്യക്തികളും പങ്കെടുക്കും. ക്ഷേത്രത്തിലെത്തിച്ചേരുന്ന ഭക്തജനങ്ങള്ക്ക് ശ്രീചക്രപൂജ ദിവസം പ്രസാദ ഊട്ടും മറ്റ് ദിവസങ്ങളില് രാവിലെയും വൈകുന്നേരവും ലഘുഭക്ഷണവുമുള്പ്പെടെയുള്ള എല്ലാ സൗകര്യങ്ങളുമേര്പ്പെടുത്തുന്നുണ്ട്.
ശ്രീചക്രപൂജയുടെ അനുബന്ധമായ പരിപാടികളുടെയും സുഗമവും വിജയകരവുമായ നടത്തിപ്പിനു വേണ്ടി വിവിധ സന്യാസിമഠങ്ങളിലെ സ്വാമിമാര്, പ്രമുഖ രാഷ്ട്രീയ- സാംസ് കാരിക നേതാക്കള്, പൗരപ്രമുഖര്, നാട്ടുകാര് എന്നിവരുള്പ്പെടുന്ന വിപുലമായ സംഘാടക സമിതി രൂപീകരിച്ചിട്ടുണ്ട്.
ബി.ഗിരിരാജന് ചെയര് മാനും അങ്കത്തില് അജയ്കുമാര് വര്ക്കിംഗ് ചെയര് മാനും വയലക്കര അനില് കുമാര് ജനറല് കണ്വീനറും വേണുഗോപാലന് പ്രോഗ്രാം കമ്മിറ്റി കണ്വീനറുമായ സമിതിയാണ് ശ്രീചക്ര നവാവരണ പൂജയ്ക്ക് നേതൃത്വം നല്കുന്നത്. എ.കെ.ബി.നായര് ചെയര്മാനും കെ.വിശ്വനാഥക്കുറുപ്പ് പ്രസിഡന്റും കെ. മുരളീധരന് ജനറല് സെക്രട്ടറിയുമായ ജീര്ണ്ണോദ്ധാരണ നവീകരണസമിതിയാണ് നവീകരണപ്രവര്ത്തനങ്ങള്ക്ക് നേതൃത്വം നല്കുന്നത്.
