കോഴിക്കോട്: പുതുതായി തെരഞ്ഞെടുക്കപ്പെട്ട കോഴിക്കോട് കോര്‍പ്പറേഷന്‍ ഭരണസമിതിയുടെ ആദ്യയോഗം ഇന്ന് ചേരും. മേയറെയും സ്ഥിരം സമിതി ചെയര്‍മാന്മാരെയും അംഗങ്ങളെയും തെരഞ്ഞെടുക്കുന്നതിന് വേണ്ടിയാണ് ഇതിന് മുമ്പ് യോഗം ചേര്‍ന്നത്. ഇന്ന് രാവിലെ 10.30ന് കോര്‍പ്പറേഷന്‍ കൗണ്‍സില്‍ ഹാളില്‍ മേയര്‍ വി.കെ.സി. മമ്മദ്‌കോയയുടെ അധ്യക്ഷതയില്‍ ചേരുന്ന യോഗത്തില്‍ 107 അജണ്ടകളാണ് കൗണ്‍സിലിന്റെ പരിഗണനക്കായി വരുന്നത്.
പുതിയ ഭരണസമിതി ഭരണം ഏറ്റെടുത്തതിനെതുടര്‍ന്ന് മേയര്‍ വി.കെ.സി. മമ്മദ്‌കോയ പ്രഖ്യാപിച്ച പതിമൂന്നിന പദ്ധതികള്‍ നടപ്പാക്കുന്നത് സംബന്ധിച്ച നടപടികളും ഇന്നത്തെ കൗണ്‍സില്‍ യോഗത്തില്‍ അജണ്ടയായി പരിഗണിക്കുന്നുണ്ട്.
ശുചിത്വമാര്‍ന്ന നഗരം, തെരുവ്‌വിളക്ക് സംവിധാനം കാര്യക്ഷമമാക്കല്‍, ഓഫീസ് സംവിധാനം മെച്ചപ്പെടുത്തല്‍, തെരുവുനായ ശല്യം പരിഹരിക്കാന്‍ നടപടികള്‍, സിറ്റി കണ്‍സള്‍ട്ടേറ്റീവ് കമ്മിറ്റി രൂപീകരണം, പ്രാഥമിക സൗകര്യങ്ങളുടെ നവീകരണം, കൂടുതല്‍ വാഹനപാര്‍ക്കിംഗും, സൗകര്യം ഏര്‍പ്പെടുത്തല്‍, പൊതുശ്മശാനങ്ങളുടെ നവീകരണം, റോഡുകള്‍ യുദ്ധകാലാടിസ്ഥാനത്തില്‍ അറ്റകുറ്റപ്പണി നടത്തല്‍, വിടുകള്‍ക്ക് അനുമതി നല്‍കാന്‍ അദാലത്ത്, കുടിവെള്ള ക്ഷാമം പരിഹരിക്കല്‍, ജൈവകൃഷി പ്രോത്സാഹിപ്പിക്കല്‍, പാലിയേറ്റീവ് പ്രവര്‍ത്തനങ്ങളില്‍ ഇടപെടല്‍ തുടങ്ങിയവയാണ് മേയര്‍ പ്രഖ്യാപിച്ച 13 ഇന പരിപാടികള്‍.
ഇന്ന് നടക്കുന്ന കൗണ്‍സില്‍ യോഗത്തില്‍ ഇതു സംബന്ധിച്ച് കൂടുതല്‍ ചര്‍ച്ചകളും അഭിപ്രായങ്ങളും ഉയര്‍ന്നുവരും. 75 അംഗ ഭരണസമിതിയില്‍ 48 പേര് എല്‍ഡിഎഫ് പ്രതിനിധികളും 20 പേര് യൂഡിഎഫും ഏഴ് പേര് ബിജെപി പ്രതിനിധികളുമാണ്.
