ബില്ഡേഴ്സ് അസോസിയേഷന് കൊച്ചിയില് നടത്തിയ ബില്ഡേഴ്സ് ദിനാചരണം കെഎംആര്എല് മാനേജിങ് ഡയറക്ടര് ഏലിയാസ് ജോര്ജ് ഉദ്ഘാടനം ചെയ്യുന്നു. അബ്ദുള് ഫൈസി, ആര്. രാജേഷ്, മനോജ് മാത്യു, ഫസല് അലി, അബ്ദുള് ജബ്ബാര് എന്നിവര് സമീപം
കൊച്ചി: കാര് യാത്രക്കാരെ മെട്രോയിലേക്ക് ആകര്ഷിക്കുന്നതിനായി രാജ്യത്തെ മറ്റ് മെട്രോകളിലില്ലാത്ത മൂല്യവര്ധിത സൗകര്യങ്ങള് കൊച്ചിയിലൊരുക്കുമെന്ന് കെഎംആര്എല് മാനേജിങ് ഡയറക്ടര് ഏലിയാസ് ജോര്ജ് പറഞ്ഞു. എല്ലാ കോച്ചുകളിലും വൈ-ഫൈ സൗകര്യം, 6 വീതം എല്സിഡി സ്ക്രീനുകള്, വാര്ത്തകളറിയാനുള്ള സൗകര്യം, വിനോദ പരിപാടികള് എന്നിവയാണ് ഇപ്പോള് ആസൂത്രണം ചെയ്തിട്ടുള്ളതെന്ന് ബില്ഡേഴ്സ് അസോസിയേഷന് ഓഫ് ഇന്ത്യയുടെ ബില്ഡേഴ്സ് ഡേ ആചരണച്ചടങ്ങില് അദ്ദേഹം വ്യക്തമാക്കി.
ഓണ്ലൈന് ഷോപ്പിങ് ഉല്പന്നങ്ങള് മെട്രോ സ്റ്റേഷനുകളില് ഡെലിവറി ചെയ്യുന്നതിനുള്ള സൗകര്യവുമൊരുക്കുന്നതാണ്. നഗരത്തിലേക്ക് കാറുകളും മറ്റ് സ്വകാര്യ വാഹനങ്ങളും വരാതിരിക്കുന്നത് നിലവിലുള്ള ഗതാഗതക്കുരുക്കഴിക്കാനും സഹായകമാണെന്ന് ഏലിയാസ് ജോര്ജ് ചൂണ്ടിക്കാട്ടി.ധനികര് കാറുകളുപേക്ഷിച്ച് പൊതുഗതാഗത മാര്ഗങ്ങള് സ്വീകരിക്കുന്നതാണ് വികസനത്തിന്റെ ലക്ഷണം.
മെട്രോ സ്റ്റേഷനുകളുടെ പരിസരം ടൂറിസ്റ്റ് കേന്ദ്രങ്ങളാക്കി മാറ്റും. സംസ്ഥാനത്തിന്റെ പരിസ്ഥിതി പാരമ്പര്യം വിളിച്ചോതുന്നവയായിരിക്കും സ്റ്റേഷനുകള്. പശ്ചിമഘട്ടത്തിന്റെ പാശ്ചാത്തലത്തില് അണിയിച്ചൊരുക്കുന്ന ആലുവ സ്റ്റേഷനാണ് ഇതില് പ്രാധാനം. മറ്റ് സ്റ്റേഷനുകളായ കുസാറ്റ്, ഇടപ്പള്ളി, ചങ്ങമ്പുഴ നഗര്, ജവഹര്ലാല് നെഹ്റു സ്റ്റേഡിയം, എംജി റോഡ് എന്നിവയുടെ അടിസ്ഥാന വിഷയം യഥാക്രമം സംസ്ഥാനത്തിന്റെ സമുദ്രയാന ചരിത്രം, കേരളത്തിന്റെ സുഗന്ധ വ്യഞ്ജനങ്ങള്, സംസ്ഥാനത്തിന്റെ സാംസ്കാരിക-കലാ പാരമ്പര്യം, സ്പോര്ട്സ്, എറണാകുളം നഗരത്തിന്റെ ചരിത്രം എന്നിവയായിരിക്കും.
മെട്രോ വന്നതുകൊണ്ട് മാത്രം കൊച്ചിയുടെ ഗതാഗത പ്രശ്നങ്ങള് പരിഹരിക്കാന് കഴിയില്ലെന്ന് മനസ്സിലാക്കിയതിന്റെ അടിസ്ഥാനത്തിലാണ് കെഎംആര്എല് മുന്നോട്ടു പോകുന്നതെന്ന് ഏലിയാസ് ജോര്ജ് പറഞ്ഞു. ഭൂമിയുടെ ദൗര്ലഭ്യം കാരണം നഗരത്തില് റോഡ് വികസനം കാര്യമായി സാധ്യമല്ലാത്തതിനാല് ജലഗതാഗതം വികസിപ്പിക്കാനാണ് ശ്രമം. യൂണിഫൈഡ് മെട്രോപ്പോളിറ്റന് ട്രാന്സ്പോര്ട് അതോറിറ്റി (ഉംട) യാണ് സമഗ്ര പൊതുഗതാഗത ശൃംഖലയ്ക്ക് രൂപം നല്കുന്നത്. 747.28 കോടി രൂപ ചെലവില് നടപ്പാക്കുന്ന സമഗ്ര ജലഗതാഗത പദ്ധതിയുടെ ഭാഗമായി പതിനാലിടങ്ങളിലേക്ക് ബോട്ട് സര്വീസ് ആരംഭിക്കും.
38 ജെട്ടികള് ഇതിന്റെ ഭാഗമായി നിര്മ്മിക്കും. 2019ന് മുന്പ് ഈ പദ്ധതി പൂര്ണമായും നടപ്പിലാക്കും. എം.ജി. റോഡ് സൗന്ദര്യവല്ക്കരണം, ഹോസ്പിറ്റല് റോഡ് നവീകരണം, എളംകുളം മെട്രോ സ്റ്റേഷനെ സുഭാഷ് ബോസ് റോഡുമായി ബന്ധിപ്പിക്കുന്ന പ്രൊജക്റ്റ്, പനമ്പിള്ളി നഗര് കനാല് തീരത്ത് ജോഗിങ് ട്രാക്ക്, പാര്ക്കിങ് ഏരിയ, കോഫി കിയോസ്ക്, ഇടപ്പള്ളിയില് മള്ട്ടി മോഡല് ഹബ് എന്നിവയും മെട്രോയുടെ ഭാഗമായി നടപ്പാക്കുമെന്ന് ഏലിയാസ് ജോര്ജ് പറഞ്ഞു. ബില്ഡേഴ്സ് അസോസിയേഷന് ഓഫ് ഇന്ത്യ ദേശീയ വൈസ് പ്രസിഡന്റ് ഫസല് അലി, കേരള ഘടകം ചെയര്മാന് ആര്. രാജേഷ്, മനോജ് മാത്യു, അബുദുള് ഫൈസി, അബ്ദുള് ജബ്ബാര് എന്നിവരും പ്രസംഗിച്ചു.
