കൊച്ചി: പരാജയഭീതിയിലെത്തിയ കോണ്ഗ്രസ് അഴിമതി മൂടിവെക്കാന് കോര്പ്പറേഷനില് നിന്നും ഫയലുകള് കടത്തി. പ്രധാന രേഖകളുള്പ്പെടെ നിരവധി ഫയലുകള് ആക്രിക്കടയില് കണ്ടെത്തി. ബിജെപി പ്രവര്ത്തകരാണ് കോണ്ഗ്രസ്സിന്റെ നീക്കം തടയുകയും ഫയലുകള് വീണ്ടെടുക്കുകയും ചെയ്തത്.
ഓഫീസിലെ ജീവനക്കാരുടെ ഹാജര് വിവരമടക്കമുള്ള രേഖകളാണ് ആക്രിക്കടയില് നിന്ന് കണ്ടെത്തിയത്. കോര്പ്പറേഷനിലേക്ക് എത്തിയ വിവിധ അപേക്ഷകളും ജനങ്ങള്ക്ക് നല്കേണ്ട മറുപടികളും ഇതിലുണ്ട്. ഇന്നലെ ഉച്ചയോടെ സി. രാജഗോപാലിന്റെ നേതൃത്വത്തില് ഒരുസംഘം ബിജെപി പ്രവര്ത്തകര് ആക്രിക്കടയില് നിന്ന് ഫയലുകള് കോര്പ്പറേഷന് ഓഫീസിലെത്തിക്കുകയായിരുന്നു.
വിവരാവകാശ അപേക്ഷകള്, ഉടമസ്ഥാവകാശ സര്ട്ടിഫിക്കറ്റുകള് പോലുള്ള സുപ്രധാന സര്ട്ടിഫിക്കറ്റുകള്, കോര്പ്പറേഷനിലെ അറ്റന്റന്സ് രജിസ്റ്റര്, ജീവനക്കാരുടെ ശമ്പളവുമായി ബന്ധപ്പെട്ട രേഖകള് തുടങ്ങിയവയുള്പ്പെട്ടെ ഫയലുകളാണ് ചാക്കില് കെട്ടിയ നിലയില് കണ്ടെത്തിയത്. സൗത്ത് ഓവര്ബ്രിഡ്ജിനു താഴെയും പി.ടി. ഉഷ റോഡിലുമുള്ള രണ്ട് കടകളില് നിന്നുമായി 70ലധികം ചാക്കുകെട്ടുകളാണ് ഉണ്ടായിരുന്നത്.
കോര്പ്പറേഷനിലെ അഴിമതി പുറത്തറിയാതിരിക്കാന് ഫയവുകള് ആക്രിക്കടയിലേക്ക് കടത്തിയതാണെന്നും ഇത്തരത്തില് എഴുപതോളം ചാക്ക് രേഖകള് ആക്രിക്കടയില് ഇനിയുമുണ്ടെന്നും ബിജെപി നേതാക്കള് പറഞ്ഞു.
എന്നാല് ഫയലുകള് ആക്രിക്കടയില് എത്തിയത് എങ്ങിനെയെന്ന് അറിയില്ലെന്നാണ് സെക്രട്ടറി വി.ആര് രാജുവിന്റെ വിശദീകരണം. കോര്പ്പറേഷനിലെ പഴയ രേഖകള് തരം തിരിക്കുന്നതിനായി പടിയാത്തുള്ള കോര്പ്പറേഷന് കോമ്പൗണ്ടില് എത്തിച്ചിരുന്നു. ഫയലുകള് അവിടെനിന്ന് എങ്ങനെ ആക്രിക്കടയില് എത്തിയെന്ന് ആന്വേഷിക്കുമെന്നും ഉത്തരവാദികള്ക്കെതിരെ നടപടിയെടുക്കുമെന്നും സെക്രട്ടറി പറഞ്ഞു.
അതേസമയം കോര്പറേഷനില് നിന്ന് വിളിച്ചു പറഞ്ഞതിന്റെ അടിസ്ഥാനത്തിലാണ് ഫയലുകള് ഉള്പ്പെട്ട ചാക്കുകള് വാങ്ങിച്ചതെന്ന് ആക്രിക്കട നടത്തുന്നയാള് പറഞ്ഞു. വിഷയത്തില് ബിജെപി കോര്പ്പറേഷന് ഓഫീസ് ഉപരോധിച്ചു.
